Miaka 48 ya Uhuru: Tusake mabadiliko ya kweli tupate uhuru wa kweli-3

Katika makala zangu zilizotangulia nilieleza kwamba kumbukumbu ya miaka ni wakati wa kutafakari taifa letu lilipotoka, lilipo na tunapotaka liende. Katika makala hizo niliitathmini hali ya kiuchumi na kijamii miaka 48 baada ya uhuru na kuhimitimisha kwamba; uhuru wa kiuchumi na kijamii katika taifa letu utapatikana kupitia mabadiliko ya kweli, yenye kuhimili misukosuko ya ukoloni mamboleo; na kujenga taifa lenye kutumia vizuri rasilimali katika kutoa fursa kwa raia wake huku likilinda utadamuni za haki za kijamii (social justice). Katika makala hii nigeukie tathmini ya kisiasa nikiamini kwamba takafakari kuhusu uhuru haipaswi kufanyika tarehe 9 Disemba pekee bali ni mchakato unaopaswa kuendelezwa na mtanzania yoyote mwenye kuamini kwamba uhuru wa kweli, si uhuru wa bendera bali ni uhuru dhidi ya umasikini, ujinga, maradhi na ufisadi. Uhuru wa kweli, ni uhuru wenye kuleta maendeleo kisiasa, kijamii na kiuchumi.

Mwaka 1961, tulipata uhuru wa kisiasa wa kujitawala na kufanya maamuzi ya kisiasa kwa kushusha bendera ya mkoloni na kupandisha ya Tanganyika. Hii ilikuwa pia ishara ya kubadili watawala kutoka wakoloni kwenda kwa viongozi wazawa kupitia chama cha TANU. Lakini je, ni kweli tuna uhuru wa kweli wa kisiasa ama tuna uhuru wa bendera?

Baada ya Uhuru, viongozi wa kwanza wakiongozwa na Mwalimu Nyerere walianza mikakati ya kujenga taifa (National Building) kwa kuchukua maamuzi magumu ya kujaribu kuleta uhuru na umoja. Kuanzia katika maamuzi kama ya ‘uhuru na umoja’, ‘uhuru na kazi’ na hata baadaye ‘uhuru na maendeleo’; huku kauli mbiu kama ‘siasa ni kilimo’ zikitumika kusukuma ajenda husika.

Baadhi ya maamuzi magumu ya kisiasa ni pamoja na: Muungano katika ya Tanganyika na Zanzibar mwaka 1964; kufutwa kwa Mfumo wa Vyama vingi mwaka 1965; kutangazwa kwa Azimio la Arusha mwaka 1967 kulikofuatiwa na utaifishaji (nationalization) wa njia kuu za kiuchumi- kwa kile kilichoelezwa kuwa ni kufuata siasa ya ujamaa na kujitegemea; kufutwa kwa dhana ya serikali za mitaa mwaka 1972 na kuanzishwa kwa madaraka mikoani nk. Kwa ujumla kati ya kipindi cha mwaka 1961 mpaka 1985 taifa lilioongozwa kufanya maamuzi mengi ya kisiasa yenye taathira kubwa ya kiuchumi na kisiasa ambayo inaonekana hadi leo. Si lengo la makala haya kuchambua kila uamuzi na faida na hasara zake; katika kipindi husika ambacho Urais wa taifa letu uliongozwa na Mwalimu Julius Nyerere.

Kwa ujumla maamuzi mengi yaliyofanyika wakati huo yaliwezesha kujengwa kwa taifa lenye umoja; hata hivyo maamuzi hayo hayo yamedumaza utamaduni wa ushindani katika taifa letu iwe ni kwenye sekta za kiuchumi na hata siasa yenyewe. Mathalani, uamuzi wa kufanya chama kishike hatamu, ulifanya moja kwa moja taasisi ambazo zinapawa kuwa huru kugeuzwa kuwa mihimili ya chama kinachotawala; kuanzia vyama vya wafanyakazi, asasi za kiraia na hata jeshi ambalo baada ya maasi(mutiny) ya mwaka 1964, jeshi mpya la wazalendo(JWTZ) liliundwa na askari kutoka umoja wa vijana wa TANU(TYL). Uhuru wa fikra uliminywa kiitikadi, kisheria na kimatendo kwa kutumia kivuli cha kutaka kujenga umoja wa kitaifa. Wakati huo huo, katika kipindi husika kuliendelezwa kwa kiasi kikubwa sheria na mfumo wa utawala tuliorithi kutoka kwa mkoloni.

Awamu ya Pili ya Utawala Tanzania kati ya mwaka 1985 mpaka mwaka 1995 chini ya Rais wa wakati huo- Ali Hassan Mwinyi; nao ulikuwa na maamuzi yake ambayo ni muhimu kukumbukwa kihistoria. Kwa kiasi kikubwa maamuzi hayo ya kisiasa yakifanyika kwa shinikizo kutoka nje, ambapo maamuzi ya kiuchumi ndiyo kwa kiwango kikubwa yaliyokuwa yakiamua hatma ya mwelekeo wa kisiasa. Kwa masharti ya Benki ya Dunia (WB) na Taasisi ya Fedha ya Kimataifa(IMF), Tanzania ikafanya ‘geuka nyuma’ ya kisiasa, kwa maelezo ya kufuata sera za ubinafsishaji na soko huria. Kumbe mambo yote yalikuwa ni barakoa (mask) ya kutupeleka kwenye utamaduni wa ubinafsi na soko holela. Kati ya matukio ya kukumbukwa wakati huo ni pamoja na: Maamuzi ya Zanzibar ya mwaka 1991 ambayo yalifuta misingi muhimu ya Azimio la Arusha, hususani iliyohusu maadili ya uongozi na nchi kuingia katika mfumo wa vyama vingi mwaka 1992. Hata hivyo, mageuzi yote hayakuendena na kuandikwa kwa katiba mpya, na matokeo yake ni sheria na hata utamaduni wa kisiasa kuendeleza misingi ya chama tawala kuwa chama dola; mithili ya nchi kuendelea kuwa katika mfumo wa chama kimoja. Ripoti za Tume ya Nyalali na Tume ya Kisanga zinaweza kutupa picha ya ziada ya hali ya kisiasa katika kipindi husika na maamuzi ambayo yalipaswa kufanyika.

Awamu ya tatu ya utawala chini ya urais wa Benjamin Mkapa kati ya mwaka 1995 mpaka mwaka 2005 ulitaasisisha misingi ya soko holela na ubinafsi na hivyo kuliondoa taifa katika misingi ya uwajibikaji na kulitumbikiza katika utamaduni wa ufisadi. Ukiweka katika mizani, mafanikio ya Mkapa katika kuweka misingi ya kiuchumi iliyojikita zaidi katika utandawazi, uwekezaji wa kigeni na unyonyaji wa kodi toka kwa wananchi masikini hayawezi kulingana na hasara ya ufisadi na uuzaji wa rasilimali ambao ulifanyika katika awamu yake ya utawala. Ni katika kipindi hicho hicho ambacho maamuzi ya siasa zetu katika uchaguzi, yameanza kuwekwa katika nguvu zilizo nje ya nguvu ya umma wa watanzania. Uhuru wa kisiasa unazidi kuterereka kwa uhuru wa kiuchumi kupotea na taratibu tumeingia katika ukoloni mamboleo huku watawala wa ndani wakiwa ni makuwadi tu wa siasa za nje zinazotuongoza.

Awamu ya nne imeingia mwaka 2005 chini ya Rais Jakaya Kikwete na kuahidi kuendeleza yale yaliyoachwa na awamu ya tatu kwa ari, nguvu na kasi mpya. Kauli tata baada ya safari za mara kwa mara za nje ya nchi na hali tete ya migogoro katika sekta ya ardhi hususani kati ya wawekezaji kutoka nje na wazawa ni mambo ambayo yanahitaji tafakari ya kina tupate mwelekeo mbadala wa kisiasa, kiuchumi na kijamii.

Miaka 48 baada ya uhuru; tumeweka reheni uhuru wetu wa kisiasa; CCM imeshindwa kutoa uongozi wa kisiasa na kufanya taifa kudumbukia katika siasa chafu na uongozi mbovu. Ombwe hili la uongozi, lenye ishara zote za kushindwa kufanya maamuzi bora katika masuala ya msingi yanayolikabili taifa; limesababisha misingi ya haki na utawala wa sheria inazidi kupuuzwa.

Toka CHADEMA na viongozi wake kwa kushirikiana na vyama vingine tutoe orodha ya mafisadi (list of shame) mnamo Septemba 15, 2007; mafisadi wameendelea kuachwa wakitamba na kuliteteresha taifa. Mtiririko wa matukio unaonyesha kwamba CCM imetekwa na mafisadi, mivutano ndani ya NEC yao na mpasuko wa dhahiri katika kikao cha Wabunge wao na wazee wa chama chao cha hivi karibuni Dodoma; ni ishara za hali hiyo. Lakini watanzania wakumbuke kwamba kutekwa huku na mafisadi, chanzo chake ni viongozi wengi walioko madarakani kuingizwa kwa nguvu ya fedha za ufisadi. Pamoja na Spika wa Bunge kuapa kwamba suala la utekelezaji wa maazimio ya Bunge kuhusu Richmond kumalizika kikao cha Novemba; kikao kimemalizika bila suala hilo kumalizika. Ufisadi wa EPA nawe umefanyiwa usanii wa hali ya juu wa kisiasa, kwa bahati mbaya ukiongozwa na mkuu wa nchi. Hotuba ya Rais Kikwete aliyoitoa bungeni ya kutamka msamaha kwa waliorejesha fedha za wizi; ni sehemu ya hali hiyo. Mhimili wa Bunge, umeshindwa kumwajibisha Rais katika hili kwani hata hotuba hiyo ya Rais pamoja na ahadi za Spika kuwa ingejadiliwa bungeni mpaka leo haijawahi kutolewa. Nachukua fursa hii kutoa mwito kwa ikulu kuiweka wazi Hotuba hiyo ya Rais Kikwete ijadiliwe na umma; kwani muda mrefu sana umepita toka tuelezwe kwamba hotuba hiyo imerudishwa ikulu ‘kukarabatiwa’. Kushindwa huku kuwa na kumbukumbu za Bunge zilizohadharani (Hansard) za suala nyeti kama hili la Hotuba ya Rais Bungeni kuhusu hali ya taifa (state of the nation address) na aibu kwa Spika aliyetangaza kuendesha bunge kwa viwango na kasi.

CCM hii hii leo inabuka kuwaghilibu watanzania kuwa imeanza kutafuta vyanzo visafi vya fedha za kampeni zake. Wakati wetu ni huu; tusidanganyike. Wachukue hatua kwanza kuhusu kampuni ya Kagoda na mengineyo ambayo fedha zake zilitumika kwa wagombea wa chama hicho kwenye kampeni za mwaka 2005. Watanzania wakumbuke kwamba utapeli kama huu wa kisiasa ulifanyika katika uchaguzi uliopita ambapo viongozi hawa hawa wa CCM walizunguka kupokea michango ya wafanyabiashara; kumbe wafanyabiashara hao ndio wale wale wa EPA. CCM iwaeleze watanzania ina mkakati gani wa kuchota fedha chafu katika uchaguzi wa 2010 ambao utakwenda sambamba na mfumo wa kuzisafisha kupitia kinachoitwa michango toka kwa wapenzi na wanachama wake?

Uchaguzi wa vitongoji, vijiji na mitaa uliofanyika mwaka huu ulikuwa ni aibu kwa taifa na ishara ya wazi ya CCM kuhubiri demokrasia huku ikipanga kila mbinu za kupora ridhaa ya umma miaka 48 baada ya uhuru. Kutokana na serikali yenyewe ya CCM kujisimamia yenyewe uchaguzi; Waziri Mkuu Mizengo Pinda alikiuka kanuni alizozitunga mwenyewe kwa kutoa tangazo kwenye vyombo vya habari Julai 25, 2009 kuwa uandikishaji wa wapiga kura ungefanyika kwa siku 21 kama kanuni zilivyohitaji katika mwezi Septemba. Lakini cha kushangaza, akatoa tangazo lingine baadaye chini ya siku tisini ambazo kanuni zimeelekeza la kutaka uandikishaji ufanyike mwezi Oktoba; na hivyo kufanya usikamilike chini ya siku 21 kabla ya uchaguzi kama kanuni zilivyohitaji. Akaenda mbele zaidi kutenga kanuni zenye kutoa mwanya kwa watendaji wa kiserikali kusimamia chaguzi hizo na hivyo kutoa mwanya wa uvurugaji wa uchaguzi. Uchaguzi wenye wapiga kura wachache waliolazimishwa kuandika wenyewe majina ya wagombea na vyama vyao. Kwa vyovyote vile, uchaguzi huu hauwezi kuwa kipimo kamili cha mwelekeo wa kisiasa katika uchaguzi wa mwaka 2010 ambao utasimamiwa na chombo tofauti kwa sheria na taratibu tofauti. CCM ikatengeneza mazingira ya kutumia uchaguzi huu kukatisha tama matumaini ya mabadiliko. Waziri Mkuu mwenyewe akawa mstari wa mbele kulipotosha bunge kwa kutangaza matokeo, kabla hata Wizara ya TAMISEMI haijamilisha kupokea matokeo toka maeneo mbalimbali ya nchi. Hivyo, idara ya kumbukumbu za Bunge(hansard) inapaswa itoe hotuba ile hadharani kama ilivyo; taifa liweze kujadili kama kweli matokeo yale ni kamili ama zilikuwa ni propaganda tu za kufanya umma uamini kwamba CCM ilishida kwa kiwango kilichotajwa. Hata hivyo, pamoja na hujuma zote vipo vyama vilivyopanda kisiasa ukilinganisha matokeo ya mwaka 2004 na haya ya 2009; CHADEMA ikiwa kinara katika kundi hilo.

Kama kuna tishio la umoja na amani ya nchi basi ni uchaguzi katika nchi ambayo watawala hawataki kuachia madaraka. CCM inajivuna kwamba inafanya chaguzi za amani huku doa pekee likitajwa kuwa ni chaguzi za Zanzibar. Lakini ukweli ni kuwa hali ya CCM kutumia nguvu za dola, na makada wake kutumia vikundi vya kiharamia kumwaga damu ni utamaduni wao kila wanapozidiwa, kwenye pande zote mbili za Muungano. Viongozi wa CCM ni vinara wa vurugu kwenye chaguzi za marudio kama ilivyothibitika Kiteto, Tarime, Busanda na Biharamulo. CCM ya sasa na viongozi wake ni tishio kwa amani na usalama wa taifa letu hususani katika kipindi cha chaguzi. Kizazi kipya kijikumbushe ujumbe wa Malcom X, ‘ballot or bullet’; tuwabane CCM na mawakala wao kwa nguvu ya umma, tuwaeleze wazi kwamba amani ni tunda la haki. Uzoefu duniani unaonyesha kuwa risasi haziwezi kushindana na umma wenye kutaka kuleta mabadiliko kidemokrasia kupitia sanduku la kura.

Katika kutafuta uhuru wa kweli wa kisiasa tuendelee kudai mabadiliko ya katiba ili tuweze kubadili sheria na mazingira ya kisiasa pamoja na CCM imehodhi mamlaka ya umma na kukataa kuandikwa kwa katiba mpya nchini. Watanzania wasitarajie CCM kwa uwingi wake bungeni ikubali kuandikwa kwa katiba mpya na tume huru ya uchaguzi. CCM wanajua kuwa kuandikwa kwa katiba mpya kutaweka misingi ya uwajibikaji, ikiwemo kushughulikiwa kikamilifu kwa mafisadi. CCM inahofu pia kuwa kuundwa kwa tume huru ya uchaguzi kutakiondoa chama hicho madarakani. Tutumie mbinu mbadala kusukuma mabadiliko yanayokusudiwa kwa kuunganisha Nguvu ya Umma. Kama ilivyowezekana wagombea wa upizani kushinda katika baadhi ya wajimbo ndivyo ambavyo inapaswa kuwa katika chaguzi zinazofuata. Katiba mpya itaandikwa baada ya kufanya mabadiliko ya kuondoa hodhi ya chama kimoja bungeni na kuchagua uongozi mbadala.

Ili kupata uhuru wa kweli kwa kisiasa tunahitaji mabadiliko ya mfumo wa kiutawala. Haiwezekani tukaendelea kuwa na mfumo wa utawala tuliorithi kwa mkoloni wa kuwapa madaraka makubwa viongozi wa kuteuliwa kama wakuu wa wilaya na wakuu wa mikoa; hodhi ya utawala ikiwa kwa serikali kuu badala ya kuongozwa kwa nguvu ya umma kupitia viongozi waliochaguliwa na umma kidemokrasia. Kwa pamoja tunapaswa kufanya maamuzi ya kulitoa taifa letu katika kufilisika kimaadili na kiitikadi na kukubaliana tunu za kitaifa zenye kuwezesha misingi ya uwajibikaji. Uhuru wa kweli wa kisiasa utakuja kwa kubadili uongozi na kuweka madarakani uongozi wenye dira, maadili na msimamo wa kufanya ukombozi wa taifa kisiasa na hatimaye kuleta tija kiuchumi na manufaa ya kijamii. Hivyo, tuuchukulie uchaguzi wa viongozi kama harakati za kutafuta uhuru wa kweli; tukiacha uchaguzi wetu kutawaliwa na nguvu za ziada nje ya ridhaa ya umma iwe ni kwa fedha haramu au shinikizo la ndani na nje tunaitumbukiza nchi yetu katika ukoloni mamboleo. Uhuru wa kweli ni pamoja na uhuru wa kuchagua na kuchaguliwa katika chaguzi huru na haki na uhuru wa kushiriki katika maamuzi ya kisiasa kwa ujumla. Tukiacha viongozi wa kisiasa wakatutawala kwa mwelekeo wao, bila maridhiano ya pamoja; tutakuwa tumepata uhuru tu wakuondoa wakoloni toka nchi za kigeni na kuingiza ‘wakoloni’ wa ndani. Ni muhimu siasa zetu zitatuwezesha kunufaika na rasilimali zetu: iwe ni vipaji vyetu, kodi zetu au maliasili za nchi yetu. Tunahitaji mjadala wa kitaifa kufikia azma hiyo.

Taarifa kwa Umma: Serikali itoe tamko hatua iliyofikiwa

TAMKO KWA VYOMBO VYA HABARI

TAARIFA YA KURUGENZI YA MAMBO YA NJE YA CHADEMA KWA SERIKALI NA WATANZANIA KUHUSU RIPOTI YA KUNDI LA WATAALAMU WA UMOJA WA MATAIFA YATOLEWA

• CHADEMA tunahimiza watanzania kuipitia ripoti ya UN ambayo imetafsiriwa na kuchambuliwa katika lugha ya kiswahili.
• “Tuchafuke tusafishe tujisafishe: kujadili ni uzalendo wa kutetea maslahi ya taifa”-Mkurugenzi wa Mambo ya Nje (CHADEMA), John Mnyika
• Waziri Mwinyi atoe tamko la kujibu Tuhuma toka ripoti ya Kundi la Wataalamu wa UN zizazohusu Ulinzi na Jeshi


Taarifa inatolewa kwa umma kupitia vyombo vya habari kuhamasisha umma kupitia taarifa ya awali iliyotafsiriwa katika lugha ya Kiswahili kuhusu Ripoti ya UN inayopatikana kupitia www.chadema.or.tz ili kuendeleza mjadala wa umma kuhusu ripoti husika.

Aidha kupitia Kurugenzi ya Mambo ya Nje inatoa mwito kwa Serikali kuweza kutoa tamko kuhusu hatua zilizofikiwa za maandalizi ya taarifa ya Serikali kuhusu ripoti ya UN. Hii ni kwa sababu siku chache zimebakia kwa serikali kuwasilisha ripoti yake kwa Umoja wa Mataifa huku mpaka sasa serikali haijawasiliana na wananchi ama walau wawakilishi wa wananchi kupata maoni yao ili kujenga msimamo wa pamoja kama taifa kuhusu yaliyoibuliwa na ripoti husika.

Tunatoa mwito pia kwa Umoja wa Mataifa (UN) nao ukayatafakari masuala yaliyomo kwenye taarifa yetu ya awali wakati inapojiandaa kuipitia Taarifa ya Serikali ya Tanzania kuhusu Ripoti husika ambayo serikali kupitia kwa Balozi wake wa Kudumu kwenye Umoja wa Mataifa (Dr Mahiga) imetangaza kwamba itawasilisha mwezi huu wa Disemba mwaka 2009. Watanzania na Umoja wa Mataifa(UN) wazingatie kuwa maoni hayo ya Serikali inayoongozwa na CCM si msimamo wa Watanzania wote kwa kuwa si wananchi, wala vyama vyao, wala wawakilishi wao(kwa maana ya wabunge wa kambi zote) wamehusishwa katika kuandaa ripoti husika. Hivyo, Watanzania na hata Umoja wa Mataifa, unapaswa kuzingatia kuwa mjadala kuhusu ripoti hii unapaswa kuendelea ili Taifa la Tanzania lipate msimamo wa pamoja kuhusiana na ripoti husika; ili wawakilishi wetu kwenye UN wakazungumze matakwa ya watanzania badala la maoni yao binafsi ama ya serikali inayoongozwa na chama kimoja ndani ya mfumo wa vyama vingi. Ni muhimu nikarudia pia kutoa rai niliyoitoa awali kwamba ripoti ya Kikundi cha wataalamu kilichoundwa na UN ipaswa pia kujadiliwa muktadha wa Orodha ya Mafisadi (list of shame) iliyotolewa na CHADEMA.

Aidha ikumbukwe kuwa tunakubaliana na hoja kwamba Serikali ya Tanzania imechafuliwa katika Ripoti hiyo ya UN kwa baadhi ya viongozi wake, ama raia wake kutajwa kwa namna moja au nyingine katika ripoti hiyo; aidha serikali yenyewe kama taasisi imechafuliwa kwa kuonyeshwa kwamba haitekelezi kikamilifu maazimio ya Umoja wa Mataifa (UN) ambayo serikali yetu ni mwanachama. Lakini nchi ya Tanzania kama taifa, na watu wake wote kwa ujumla wake; hawajachafuliwa. Kama Nchi ya Tanzania, na wananchi wake wote wakatoa kauli ya pamoja ya kuwatetea watu wachache ndani na nje ya serikali waliotajwa katika kashfa hii; hapo ndipo tutakapochafuka wote kwa ujumla wake. Lakini kama Nchi yetu, na watu wake; tukakubaliana kuchukua hatua ya kusafisha uchafu unaoichafua sisi na taifa letu; ni wazi tutasafishika na heshima ya taifa letu itaendelea kulindwa na kujilinda kote duniani.

Kwa kutumia lugha ya picha; ni kama vile nchi yetu ni mtaro; sasa mtaro unaweza kuwa na uchafu, ukipiga kelele kwamba hakuna uchafu wakati uchafu unaonekana basi utaonekana una utamaduni wa uchafu ndio maana unaona ni jambo la kawaida kuwa kwenye mazingira ya uchafu; wewe ni mchafu. Lakini ukichukua hatua ya kuingia ndani ya mtaro, na zana zako za kusafishia; utachafuka kidogo, utaweza kusafisha mtaro, utatoka na utajisafisha. Mtaro utabaki safi, na wewe utabaki safi; na wewe na mtaro wako wote mtakuwa safi na kuitwa wasafi.

Kadhilika kwa Tanzania, mjadala huu kuhusu uchafu iliotolewa na ripoti ya UN unapaswa kuendelea ili tuujue vizuri uchafu wenyewe wakati wa mjadala huu tutaonekana kuwa tuna uchafu lakini tutaweza kuingia tukachafuka kidogo tukausafisha na nchi yetu itabaki ikiwa safi na sisi wenyewe tutathibitika mbele ya jamii ya kimataifa kuwa ni wasafi na hatupendi uchafu na unapojitokeza tunachukua hatua za kuuondoa.
Hivyo, tunatoa taarifa hii kwa tahadhari kubwa ya kizalendo kwa kuwa najua suala hili linagusa kwa namna au nyingine vyombo vyeti na masuala tete yanayoelekezwa kwa nchi yetu yanayogusa jeshi, polisi, usalama wa taifa, chama tawala, serikali yake, na viongozi wake. Mambo tunayoyaandika yanagusa genge la mafisadi na watumiaji vibaya wa madaraka; wengine wakiwa ni wafanyabiashara, wengine wakiwa ni viongozi, wengine wakiwa ni wahalifu waliokubuhu na waasi wenye kufanya mauaji.

Katika mukatadha huo, ni muhimu kwa wananchi kuendelea kupuuza kauli za wenye kueneza uchochezi kwamba CHADEMA iache siasa zenye kuichafua Tanzania; eti itangulize ‘uzalendo’. Wananchi wajiulize ni nani anaichafua Tanzania; kati ya waliofanya ufisadi na/ama kutumia madaraka vibaya na kuitumbukiza Tanzania katika kashfa kama hizi za usafirishaji wa silaha na utoroshaji wa madini kutoka maeneo yenye vita vya wenyewe kwa wenyewe au mtu anayetaka mjadala kuhusu suala hili ili utoke msimamo wa pamoja wa wazalendo wote wenye kukerwa na mambo hayo ili kulirudisha taifa kwenye mkondo unaostahili wenye kulinda heshima ya Tanzania kitaifa na kimataifa?

Hawa wangetaka kutanguliza maslahi ya pamoja ya Tanzania wasingekurupuka kutoa kauli ya serikali ya CCM bila kushirikisha umma wa watanzania ama wawakilishi wa wananchi. Viongozi wa serikali hawana haki ya kusema kwa niaba ya watanzania katika masuala tata bila kupata maoni yetu au ya kambi yetu bungeni. Wananchi tuwaambie wazi watu kama hao kwamba; kila wanachokisema ni msimamo wao na serikali ya chama chao au taasisi zao; hakiwakilishi msimamo wa watanzania wote.

Waambie wazi kuwa kama wanataka watanzania tusivuane nguo hadharani; walio kwenye mamlaka ; kabla ya kutoa kauli, walau waombe maoni ya wawakilishi wa wananchi au taasisi zinazowakilisha wananchi; diplomasia iliyokomaa inatambua umuhimu wa maridhiano baina ya viongozi kabla ya kutoka hadharani katika masuala tete ya kitaifa. Tuko tayari kwa majadiliano kama watanzania kuhusu suala hili ili tutoke na msimamo wa pamoja kama taifa. Kuhoji uzalendo wa wanaotaka watanzania waliotajwa kwenye ripoti ya Kikundi cha Wataalamu kilichoundwa na UN ni sawa na kuwatetea mafisadi ama waliotumia vibaya madaraka yao waliotuhumiwa kwenye ripoti husika.

Ikumbukwe kuwa tuhuma za Tanzania kujihusisha na vita vya DRC zilianza toka wakati taifa hili linaasisiwa. Tofauti ya watawala wa sasa ni kwamba uongozi wa Nyerere ulikuwa unasema wazi kuwa unasaidia waasi, na UN inajua. Lakini wakati ule walioitwa waasi ni wazalendo waliokuwa wakipambana dhidi ya watawala wa kidikteta ambao walikuwa ni makuwadi wa ubeberu na ukoloni mamboeleo katika Afrika. Sera ya wakati huo ya mambo ya nje ya Tanzania ilikuwa ni kuleta ukombozi Afrika nzima (hata ikiwa ni kwa kuunga mkono vita vya msituni) na kueneza umajumuhi wa kiafrika (Pan Africanism).

Serikali ya sasa ipo tofauti; kwanza haina msimamo endelevu; pili, sera yake ya mambo ya nje haieleweki; tatu, masuala ya sasa ya usafirishaji wa silaha ama utoroshaji wa madini toka maeneo yenye vita ambao yanasemwa kuwa yanafanywa na serikali ama watanzania yanahusu zaidi miradi binafsi ya watu ambayo wanaindesha kwa ama kuzitumia taasisi za kiserikali au kuruhusu mianya kwa kutowajibika kusimamia utawala wa sheria ikiwemo kuheshimu maazimio ya Umoja wa Mataifa (UN) ambayo nchi yetu imetia saini.

Hivyo wapenda demokrasia na maendeleo ndani na nje ya Tanzania wanapaswa kuunga mkono rai tuliyoitoa Disemba Mosi, 2009: Kwamba wazalendo wote, waliokerwa na Tanzania ‘kuchafuliwa’ na ripoti hiyo ya Kikundi cha Wataalamu wa UN, wanapaswa kuwashinikiza watanzania wote wanaoishi Dar es salaam, Kigoma na kote duniani ambao wametajwa kwenye taarifa hiyo kwa majina yao; wajitokeze kutoa kauli za kusafisha majina yao, tukiridhika na hoja zao, katika utetezi wao; basi na sisi tutajiunga katika kundi la kuwatetea na kuwasafisha. Viongozi na taasisi za serikali zilizotajwa kwa namna moja au nyingine katika taarifa hiyo iwe kwa majina au kwa matukio zijitokeze kuelezea kutajwa kwao; tukiridhika na maelezo yao na vielezo vyao, tutajiunga katika kazi ya kizalendo ya kuwatetea na kuwasafisha. Na hii isiwe kwa taarifa ya UN pekee; iwe pia Orodha ya Mafisadi, katika vipengele vinavyohusiana na Kampuni za Meremeta, Tangold, Deep Green nk.

Kosa kubwa la Wizara ya Mambo ya Nje na Mahusiano ya Kimataifa katika sakata hili ni kufikiri kwamba yenyewe tu ndiyo inayowajibika kulitolea ufafanuzi na taarifa kuhusu tuhuma zilizoibuliwa na Kundi la wataalamu lililoundwa na UN. Narudia tena kumuomba Waziri Mkuu Mizengo Pinda kuwashinikiza Mawaziri wengine ambao sekta zao zimeguswa kutoa kauli za kujibu ama kufafanua hoja zilizoibuliwa ndani ya ripoti hiyo, ambayo tayari Wizara ya Mambo ya Nje ameshafanya kosa la kisiasa la kuitumbukiza serikali kwenye malumbano mapema kwa kuliibua suala hili na kuituhumu UN kabla hata Tanzania kufafanua ama kujieleza kwenye Kamati ya Vikwazo. Kwa kuanzia ni muhimu kwa Wizara ya Mambo ya Usalama wa Raia na ile ya Ulinzi na Jeshi la Kujenga taifa zikatoa maelezo na vielelezo kuhusu suala hili. Hivyo, mawaziri wanaopaswa kufutia kutoa kauli ni: Waziri wa Ulinzi na Jeshi la Kujenga Taifa; Hussein Mwinyi na Waziri wa Usalama wa Raia; Lawrence Masha.


Ikumbukwe kuwa Wizara ya Ulinzi ilishatoa kauli fupi ya kukanusha tu kwa ujumla bila kujibu hoja kwa hoja. Hatahivyo, pamoja na kuwa natambua kwamba ni muhimu kwa Jeshi letu, kutunza siri za mikakati yetu ya kijeshi. Wizara ya Ulinzi na Jeshi La Kujenga Taifa ina wajibu wa kutoa kauli za ufafanuzi; na awasilishe maelezo na vielelezo ili serikali ipeleke UN yenye kujibu maswali yafuatayo: Je, kwa kuwa aliyekuwa Balozi wa Tanzania Burundi ambaye alikuwa ni mmoja wa majenerali wa jeshi, namba yake ya simu imetajwa kutumika kuwasiliana na waasi; JWTZ haina sera ya kuendelea kuwatumia maafisa wake waandamizi wa jeshi wanaoitwa wastaafu, wanaotumwa kwenye nchi zenye vita kama ilivyo DRC kuweza kufanya kwa barokoa ya ubalozi majukumu yanayoyofanana na uambata wa kijeshi? (Millitary attacheship). Kama hivyo ndivyo, wizara inaweza kutuambia ni mawasiliano gani ya kijeshi yalikuwa yakifanyika baina ya namba ya simu ya balozi wetu na makamanda wa vikundi vya waasi DRC hususani FDLR na maswahiba wao ndani FARDC? Kwa kuwa mabalozi wetu kuwasiliana na vikundi vya waasi katika nchi ambazo serikali yetu inatambua serikali zake za kiraia ni jambo lisilokubalika na halina uhusiano wowote na ‘siri kuu za jeshi’ wala ‘maslahi ya taifa’; kwanini nini serikali isituleze mawasiliano yaliyokuwa yakiendelea kama inavyotuhimiwa kwenye ripoti ya kundi la Wataalamu lililoundwa na UN? ( Ni muhimu kwa Waziri Mwinyi kutoa tamko hivi sasa kwa kuwa aliyekuwa Balozi wa Tanzania Burundi ameshaondoka katika Ubalozi husika na hana tena kinga kamili ya Kibalozi. Je uamuzi wa Rais Kikwete kuteua Balozi Mpya wa Tanzania Burundi hivi karibuni unauhusiano wowote na kutajwa kwa jina la balozi wa Zamani katika ripoti ya UN?).

Kwa kuwa silaha za kivita ni kubwa, sio ndogo kama sindano kiasi kwamba zinaweza kupita bila kuonekana; Wizara ya ulinzi inazielezeaje tuhuma ya silaha kupitishwa Tanzania ambazo zimeelezwa na Kundi la Wataalamu wa UN kwa maelezo na vielelezo? Wizara inaweza kulieleza taifa silaha hizo zimekwenda nchi gani na kwa makubaliano gani ya kijeshi? Mwisho, kwa kuwa Kamati ya Vikwazo ya UN kuhusu DRC iliundwa toka mwaka 2004; pamoja na kuwa ripoti ya Kundi la Wataalamu wa UN imegusia zaidi miaka ya 2007 mpaka 2009; Wizara inazizungumziaje taarifa zilizozagaa katika mitandao mbalimbali zinazohusisha Meremeta, Tangold; Deep Green na makampuni mengine yaliyosajiliwa kwa majina ya vigogo wa serikali ya awamu ya tatu ambayo yanatajwa kuhusika na biashara haramu za silaha na utoroshaji wa madini toka maeneo yenye vita; kampuni ambazo mojawapo serikali imesema kwamba inahusika na JWTZ? Izingatiwe kuwa CHADEMA ilishaweka msingi wa taarifa hizo kwenye orodha ya mafisadi iliyotolewa 15 Septemba 2009.


Masuala haya na mengine mengi zaidi nikayoyachambua kadiri siku zinavyokwenda yanapaswa kujadiliwa na wananchi ama wawakilishi wao; ili tuweze kutoka na msimamo wa pamoja. Pia UN na Kundi la Wataalamu wake kuiuliza serikali itoe maelezo ya kina wakati wa mapitio ya taarifa husika. Ni utaratibu wa kawaida kwamba ufuatiliaji kama huu uliofanywa kwa kuwa ulihusu Tanzania; serikali itapewa fursa kuandika ripoti ya nchi (country report) kufafanua mambo ambayo yametajwa kabla ya kamati ya vikwazo kufanya maamuzi yake ama kuikubali ripoti husika na mapendekezo yake ama kutoa maelekezo mbadala ya kutaka uchunguzi zaidi katika maeneo ambayo Kundi la Wataalamu limeeleza katika ripoti yake kuwa uchunguzi wake bado haujamilika. Inashangaza kwamba serikali inatumia nguvu kubwa, kubeza ripoti hii na kutishia wanahabari wasiendelee kuandika wakati ripoti imeweka bayana kwamba uchunguzi bado haujakamilika; serikali itaweka wapi uso wake kama uchunguzi zaidi ukaibua uchafu zaidi? “Tuchafuke tusafishe tujisafishe: kujadili ni uzalendo wa kutetea maslahi ya taifa”


Imetolewa leo tarehe 20 Disemba, 2009 Mkoani Tanga; Tanzania:




John Mnyika
Mkurugenzi wa Mambo ya Nje na Mahusiano ya Kimataifa
0754694553

Miaka 48 ya Uhuru: Tusake mabadiliko ya kweli tupate uhuru wa kweli-2

Katika makala yangu iliyotangulia nilieleza kwamba kumbukumbu ya miaka ni wakati wa kutafakari taifa letu lilipotoka, lilipo na tunapotaka liende. Takafakari hii haipaswi kufanyika tarehe 9 Disemba pekee bali ni mchakato unaopaswa kuendelezwa na mtanzania yoyote mwenye kuamini kwamba uhuru wa kweli, si uhuru wa bendera bali ni uhuru dhidi ya umasikini, ujinga, maradhi na ufisadi. Uhuru wa kweli, ni uhuru wenye kuleta maendeleo kisiasa, kijamii na kiuchumi. Katika makala hiyo iliyotangulia niliitathmini hali ya kiuchumi miaka 48 baada ya uhuru na kuhimitimisha kwamba; uhuru wa kiuchumi katika taifa letu utapatikana kupitia mabadiliko ya kweli, yenye kuhimili misukosuko ya ukoloni mamboleo; na kujenga taifa lenye kutumia vizuri rasilimali katika kutoa fursa kwa raia wake. Leo tutafakari sekta nyingine.

Nchi hii imewekwa rehani kijamii; ndoto ya waasisi wa taifa hili la kujenga taifa lenye uhuru na umoja inafifia. Viongozi wa CCM wanatembea kifua mbele wakizusha mijadala ya ukabila na udini yenye kuligawa taifa. Umoja kati yao umetoweka na sasa wanaparuana wao kwa wao. Chini ya sera mbovu za CCM matabaka yanazidi kumea katika taifa, pengo kati ya masikini na matajiri linazidi kukua kila kukicha. Umasikini unazidi kuongezeka. Utafiti wa hivi karibuni unaonyesha kwamba kati ya mwaka 2005 Rais Kikwete na CCM walioahidi maisha bora kwa kila mtanzania mpaka sasa; katika kila watanzania kumi; saba wamesema kwamba hali yao ya maisha haijawa bora. Na kati yao; asilimia hamsini hali yao imekuwa mbaya zaidi. Nyufa hizi ni tishio kwa amani ya nchi yetu.

Miaka 48 baada ya uhuru, huduma za kijamii zinazidi kudorora; kwa kiwango cha huduma hizo na hata upatikanaji hususani kwa watanzania masikini. Elimu ni sehemu ya uhuru wa kweli kwa vijana; kwa Tanzania ya leo mfumo mzima wa elimu ujenga matabaka. Ukiwa mkoani Dar es salaam na kutembelea shule mbalimbali kuanzia chekechea mpaka sekondari; baina ya shule binafsi na za umma, utofauti wa mazingira ya kusomea ni wa kiwango cha juu. Pamoja na kuongezeka kwa idadi ya madarasa katika shule za umma, bado kuna tatizo la ubora wa madarasa yenyewe yaliyojengwa kwa ukilinganisha na kiwango cha fedha za michango ya wananchi zilizotumika. Kijana wa mtazanzania wa kawaida anasoma katika shule yenye kiwango duni cha elimu kutokana na uhaba wa walimu na vifaa vya kufundishia. Ishara ya kuporomoka huko kwa elimu, ni wimbi la viongozi wa serikali hiyo hiyo inayosimamia kususa kusomesha watoto wao katika shule za umma. Tunahitaji sera na uongozi mbadala; huu ni wakati wetu, tusidanganyike.

Vijana wa vyuo vikuu ni wajibu wao kuwa mstari mbele kusaka mabadiliko; kwani ni mashuhuda wa namna ambavyo serikali inavyofanya matumizi ya anasa, fedha za umma zikipotea kwa ufisadi. Hatima ya yote mzigo unarudi kwa mwanafunzi na wazazi wake kupitia sera za uchangiaji ambao wengine imewanyima fursa ya kusoma.


Miaka 48 baada ya uhuru vijana wanapoteza maisha yao kwa wingi kwa magonjwa yanayoweza kutibika kama malaria na hata kipindupindu. Pamoja na sera ya uchangiaji kuwa mzigo wa watanzania walio wengi bado vifaa na madawa havipatikani hususani katika hospitali na zahanati za umma. Vijana wa kike wajawazito, ambao kila mara matukio ya vifo vya watoto wao kutokana ubovu wa huduma za afya wanaweza kutoa vizuri zaidi kilio hiki. Chini ya utawala wa sasa huduma za jamii kwa ujumla zimegeuzwa bidhaa badala ya kuwa huduma; ikiwemo huduma kama elimu, afya, maji nk. Ni wakati wetu; tusidanganyike. Tuunganishe nguvu mabadiliko ya kisera na kiuongozi yatayowezesha huduma za kijamii kuwa bora na kuwafikia watanzania walio wengi. CHADEMA ni chama cha mrengo wa kati; tunaamini kwamba hata katika mfumo wa soko ni lazima kwa taifa kuwa na mifumo ya ulinzi wa kijamii (social security) inayogusa makundi mbalimbali katika maeneo mbalimbali ya huduma za kijamii.

Miaka 48 baada ya uhuru, ahadi za serikali ya CCM kwa makundi maalum mathalani wanawake, wazee, vijana na wenye ulemavu zimekuwa ni maneno matupu bila vitendo. Sera zao zinatutazama kama watu tunaohitaji kusaidiwa badala ya kuwa wadau wa msingi wa kimaendeleo. Ni wakati wetu; tusidanganyike. Chini ya uongozi mbadala, badala ya wazee wetu kuonekana kuwa kundi linalopaswa tu kubebwa na kuhudumiwa, sera mbadala zitaboresha kiwango na mifumo ya malipo ya wastaafu na kupanua wigo wa mifuko ya kijamii kujumuisha ajira ambazo haziko kwenye mkondo uliozoeleka.

Uboreshaji wa mifumo ya wastaafu itawezesha wazee wetu kuwa na fursa ya kupata huduma za msingi na kuwa na kipato stahili cha kuwakimu hata baada ya kumaliza utumishi wao kwa taifa. Laana ya wazee wastaafu wanaotangatanga na kulazimika kudai haki zao kwa nchi zenye kuwatezwa zinapaswa kuwa chachu ya kufanya mabadiliko.

Pamoja na CCM chini ya Rais Kikwete kujigamba kuweka mstari wa mbele wanawake, sifa hizo zipo kwenye vyombo vya kitaifa vya uteuzi tu. Ni wakati wetu; tusidanganyike. Tunahitaji uongozi na sera mbadala kubadili mifumo ya kisiasa na mitazamo ya kijamii kuweza kujenga taifa lenye kutoa fursa kwa makundi yote ya kijamii kuweza kushindana na kushinda.

Ni muhimu nikakumbusha kuwa athari kubwa zaidi ya kiuchumi ambayo inataathira pia kwa hali ya kijamii ni utegemezi ambao taifa letu limeingizwa kwa kutegemea misaada kutoka nje huku rasilimali za taifa zikifyozwa kibeberu. Ni ukoloni huu mpya ndio ambao unanifanya nitamke kwamba tunahitaji kudai uhuru wa Tanzania. Tunahitaji uhuru wa kweli. Wakati wetu ni huu, tusidanganyike. Mwanafalsafa Frantz Fanon, aliwahi kusema kwamba kila kizazi lazima, nje ya uvungu uvungu kiutambue utume wake; ama kiutumize au kiusaliti. Kizazi cha wakati huo, kilidai uhuru, na kujenga misingi ya taifa(national building) ingawa misingi hiyo imekuja kuvurugwa na kuturudisha kwenye ukoloni mambo leo(neo colonialism). Ni wajibu wa kizazi chetu; kudai uhuru wa kweli, uhuru dhidi ya umasikini, ujinga, maradhi; hatuwezi kudai uhuru huo bila kumpiga vita adui ufisadi. Wajibu wa kizazi chetu ni kuweza kupambana katika mazingira ya ushindani wa ndani na nje ya nchi yetu; kujenga taifa tukitazama kizazi chetu na kijacho.

Pigo kubwa kwa mwelekeo wa taifa letu, na utumwa wa kiutamaduni unaoendelea kumea. Vijana wanaweza kubebeshwa mzigo wa lawama wa kuiga tamaduni za kigeni kwa kiwango chenye kupoteza utaifa wetu; ukweli ni kuwa chanzo cha yote haya ni uongozi usio na maono. Unapokuwa na uongozi wenye sera ambazo hata vyombo vya habari vya umma vinakuwa ni vioo vya tamaduni za nchi zingine; usitegemee vijana kubeba urithi wa nchi yao. Viongozi wetu wanapaswa kujifunza, nchi zilizofanya mapinduzi ya kiuchumi; muhimili thabiti wa mwelekeo wao ni tamaduni zao. Kinyume chake, nchi zenye viongozi wabinafsi; viongozi wasiojiamini, viongozi wasiowajibika, ni matokeo ya utamaduni wa ufisadi. Ni wakati wetu, tusidanganyike. Tunapoazimisha miaka 48 ya uhuru, tuhamasishe mabadiliko ya kweli; kwa kuweka mkazo katika kujikwamua kifikra; kuanzia katika desturi zetu; fasihi zetu; muziki wetu; michezo yetu; familia zetu: vyote vituelekeze katika kujenga taifa lenye kukumbuka tulipotoka na kutengeneza mweleko mwafaka wa vizazi vijavyo. Maneno ya Wimbo wa Bob Marley (Redemption Song) ya mwito wa kujikwamua kutoka utumwa wa kiakili yanafumbo linaloposwa kufumbuliwa katika kutafuta mabadiliko kupata uhuru wa kweli.

Mwandishi wa makala hii ni Mkurugenzi wa Mambo ya Nje(CHADEMA) anayepatikana kupitia 0754694553, mnyika@chadema.or.tz na http://mnyika.blogspot.com/

Miaka 48 ya Uhuru: Huu ni wakati wetu; tusidanganyike!

Wakati wetu ni huu, tunapoadhimisha miaka 48 ya uhuru. Ni wakati wa kutafakari taifa letu lilipotoka, lilipo na tunapotaka liende. Makala hii inakulenga zaidi wewe uliyezaliwa baada ya uhuru; tunaounda sehemu kubwa ya taifa hili. Ni kwa ajili pia ya watanzania wote wenye kuamini kwamba uhuru wa kweli, si uhuru wa bendera bali ni uhuru dhidi ya umasikini, ujinga, maradhi na ufisadi. Uhuru wa kweli, ni uhuru wenye kuleta maendeleo kisiasa, kijamii na kiuchumi. Uhuru huu utapatikana kupitia mabadiliko ya kweli, yenye kuhimili misukosuko ya ukoloni mamboleo; na kujenga taifa lenye kutumia vizuri rasilimali katika kutoa fursa kwa raia wake.

Wakati wa uhuru taifa hili lilikuwa na watu chini ya milioni 10; sasa Dar es salaam pekee ina wananchi takribani milioni nne, karibu nusu ya Tanzania ya wakati huo ikiwa Tanganyika. Sasa taifa lina watu takribani milioni 40; hivyo taifa letu watu wake takribani robo tatu ni kizazi cha baada ya uhuru. Maanake katika kila watu kumi tunaopishana nao barabarani, saba ni kizazi cha baada ya uhuru. Hiki ni kizazi chetu, hili ni taifa letu. Huu ni wakati wetu, tusidanganyike kwamba wakati wetu bado.

Si nia yangu kuanzisha mgogoro kati ya kizazi kipya na kizazi cha zamani cha taifa hili; na wala si kusudio langu kusema kwamba hatuwahitaji wazee katika harakati za demokrasia na maendeleo. Kwani ni afadhali kuwa na kiongozi mzee mwenye maono na maadili kuliko kuwa na kiongozi kijana fisadi asiyekuwa na dira wala mwelekeo. Taifa hili ni la watanzania wote, wa rika zote, wa hali zote, kila mmoja ana umuhimu na nafasi yake kama kilivyo kila kiungo katika mwili wa binadamu. Dhamira yangu, ni kusema kwamba wakati huu ni wetu; tusidanganyike. Yoyote yule, ambaye anaukubali ukweli huu, awe ni kijana wa sasa ama kijana wa zamani, huyo tukubaliane nae.

CHADEMA inaukubali ukweli huo; tangu wakati wa kuanzishwa kwake. Vijana wa zamani katika CCM, walipoudumaza uzao wao kwa kuwaita vijana kuwa ni taifa la kesho, na Umoja wa Vijana wa chama hicho chini ya nidhamu ya uoga kukubaliana ukandamizaji huo. Utawala huo uliposhindwa kuhimili kuingia kwa mfumo wa vyama vingi kutokana na shinikizo la ndani na nje, vijana wa zamani wenye fikra mbadala na moyo wa ujana walioanzisha CHADEMA kama Wazee Edwin Mtei na Bob Makani wakaja na kauli mbiu mbadala kuwa: Vijana; Taifa la leo mnamo mwaka 1992. Baadaye kauli mbiu hii ilibadilika kuwa: Vijana; Nguvu ya Mabadiliko.

Kwa sasa serikali ya CCM na hata Baraza la Vijana wa CHADEMA (BAVICHA) wote wanamtafiri kijana kuwa ni binadamu mwenye umri usiozidi miaka 35(wakianzia miaka 12, 15, 16 au 18 kutegemea muktadha); ni takribani asilimia 40 ya watanzania. Watoto na vijana kwa ujumla wetu tunakaribia asilimia 70 kwa watu wote nchini. Sisi vijana peke yetu ni zaidi ya asilimia 60 ya nguvu kazi ya Tanzania. Ndio roho na injini za taifa letu. Huu ni wakati wetu, tusidanganyike.


Pamoja na kuwa harakakati za uhuru zilifanyika kona zote za nchi wakazi wa Dar es salaam, wanabeba historia ya harakati za uhuru wa taifa letu; ni wakati muafaka kutafakari masuala haya, mwaka huu ambapo kumbukumbu ya uhuru inafanyikia kitaifa katika mkoa huu. Harakakati za uhuru wakati huo ziliratibiwa kwa busara za wazee wenye imani kwa vijana kuwa vijana ni nguvu ya mabadiliko.

Ni wazee wa Dar es salaam ndio waliomuita Mwalimu Nyerere toka Pugu, kwa mchango wao wa hali na mali, kijana wao, akawa mwenyekiti wa taifa wa chama cha wakati huo cha TANU akiwa na miaka 32, akaongoza harakati za uhuru, mpaka nchi ikapata uhuru. Akiongoza nchi hii vizuri katika miaka ya kwanza ya uhuru, akiweka misingi ya muda mrefu ya taifa yenye kutazama mbele kwa miaka mingi kiuchumi, kisiasa na kijamii; misingi ambayo wazee wa leo wa CCM na vijana wao wameitupilia mbali baada ya kufa kwake.

Kosa moja la Nyerere lilikuwa ni kuweka mkazo sana kwa dola kwa maana ya serikali kumiliki njia za uzalishaji; badala ya uchumi kimilikiwa na umma. Kosa hili lilifanya serikali ishindwe kubeba mzigo mkubwa wa kusimamia sera kisiasa wakati huo huo kufanya utekelezaji kwa kuendesha njia za uzalishaji mali za kiuchumi wakati huo huo ikiwa inatoa huduma za kijamii. Kwa ujumla pamoja na kuimba haja ya kujitegemea, dola ikazalisha raia wategemezi kifikra, ambao chini ya mfumo wa chama kimoja na mwelekeo finyu wa kiuchumi; walipoteza ujasiri wote wa ushindani. Ni kosa hili, ndio lilifanya wakina Mtei kuanzisha CHADEMA yenye inayoamini katika mfumo wa soko la kijamii; lenye kuhakikisha kwamba uchumi unamilikiwa na wananchi. Huu ni mfumo wa kiuongozi wa kisera na kirasilimali ambao unahakikisha kuwa rasilimali za nchi zinatumika kwa manufaa ya maisha ya wananchi wake; kwa kujenga taifa lenye kutoa fursa. Mjadala huu wa dhima ya itikadi katika nadharia ya maendeleo nimewahi kuuandikia makala za kadhaa cha kiuchambuzi zinazopatikana kwenye tovuti: www.chadema.or.tz.

Lakini afadhali kosa la Nyerere linaweza kusameheka, lakini makosa ya warithi wake, baada ya kung’atuka kwake na baadaye kufa kwake yameacha majeraha makubwa yanayohitaji taifa hili likombolewe upya. Wakati wetu ndio huu; tusidanganyike.

CCM hiyo yenye kuongozwa kwa fikra za kifisadi na utupu wa kiitikadi, ikaondoa nchi katika ujamaa, ikaipeleka katika soko holela; sio soko huria. Chini ya sera zake na uongozi wake, njia za uzalishaji mali zikauzwa kwa bei chee; toka kwa dola kwenda kwa wageni, na kwa tabaka la wachache linalojifunika kwa kivuli cha mabepari uchwara wa ndani; wengi wao wakiwa kwenye korido za utawala wa CCM na serikali yake. Marehemu Profesa Chachage, aliwaita watu hawa, makuwadi wa soko huria- hawa kwa kweli, ni makuwadi wa kiuchumi (Economic Hitmens).

Wakahitimisha kwa maamuzi ya Zanzibar, ya kufuta misingi muhimu ya maadili ya uongozi mnamo mwaka 1991; kwa hiyo wakati CHADEMA inaanzishwa, waasisi wake walizitafakari hali hizi.

Halafu bado miaka 48 baada ya Uhuru; CCM wanaendelea kuwadanganya watanzania, na hata kushinikiza katiba ya nchi hii kuwa nchi hii inafuata siasa ya ujamaa na kujitegemea. Chama kinachotawala kinapoongoza huku kina ombwe na kiitikadi, kimefilisika kimaadili; lazima taifa litakuwa na uongozi dhaifu.

Na kwa kweli si maneno yangu kwamba CCM inawadanganya watanzania, ni maneno ya Mwasisi wa chama hicho, na mwandishi wa Azimio la Arusha ambaye kabla ya kufa kwake aliandika moja ya kitabu chenye sehemu ya wosia wake wa mwisho kwa taifa; Kitabu cha uongozi wetu na hatma ya Tanzania; Nyerere ameandika wazi, CCM inawadanganya wa Tanzania, namnukuu: “Halmashauri Kuu ya Taifa iliketi Unguja ikabadili Azimio la Arusha bila kwanza kutafuta maoni ya wananchi. Na walikuwa na haki ya kufanya hivyo, maana sera ni yao, ubaya wao ni kwamba jambo lenyewe walilifanya kwa hila na janja janja, na hadi sasa wanaendelea kuwadanganya wananchi kwamba sera ya CCM bado ni Ujamaa na Kujitegemea”

Kwa hiyo nchi hii iko rehani; kiuchumi, kijamii na hata kisiasa kama ambavyo nitaelezea katika mfululizo wa makala hizi za kumbukumbu ya miaka 48 ya Uhuru wa nchi yetu. Kiuchumi, tukashuhudia viwanda vikiuzwa kwa bei ya kutupa na vingine kugeuzwa magofu baada ya kuuzwa kwake. Hapa Dar es salaam, ambapo maadhimisho yanafanyika mwaka huu, ukienda Jimbo la Kawe, utaona yale mahame ya Tanganyika Packers, kile kilikuwa ni kiwanda cha kusindika nyama, kilichokuwa kikitoa ajira kwa vijana kwa watanzania. Kile kilikuwa kinawezesha bidhaa za wafugaji kusindikwa. Sasa, mpaka vijana wa kimasai nao wanakimbilia kwa wingi Dar es salaam kuwa wasusi na walinzi. Kiwanda hiki ni mfano wa viwanda vingi vilivyoingia hali hii inayochangia katika ukoloni wa kiuchumi; wa kutegemea kuwa bidhaa za nje na kutegemea kusafirisha bidhaa ghafi kwenda nje ya nchi. Pale Jimbo la Ubungo, Kiwanda cha Nguo cha Urafiki kinazidi kudidimia; nyumba za wafanyakazi ziliuzwa kinyemela kwa kivuli cha ubinafsishaji, mpaka mitambo mingine imeuzwa kama chuma chakavu; pamoja na wafanyakazi kulipwa mishahara duni hata maghorofa ya wafanyakazi yanaendeshwa kibiashara badala ya kuwa huduma ya msingi kwa wafanyakazi. Hii ni mifano tu, hali hii ni maeneo mengi ya taifa letu.

Miundombinu nayo imeachwa hohehahe, hali ya usafiri wa reli inazidi kuwa mbaya usafirishaji wa abiria na mizigo kwa njia hii unazidi kupungua mwaka hadi mwaka; mathalani kutoka tani 1,169,000 mwaka 2005 mpaka tani 429,000 mwaka 2008. Serikali inazidi kuingiza fedha za walipa kodi katika uwekezaji wa kibadhirifu na kudhoofisha miundombinu iliyojengwa kwa jasho la umma. Hali ya viwanja vyetu vya ndege na shirika la umma la ndege (ATCL) ni ya kuliaibisha. Utawala wa CCM unaolinda, kila wakati unatuingiza katika kugharamia shirika hili kwa maamuzi mabovu katika vipindi tofauti tofauti. Serikali inayoongozwa na CCM imeshindwa kufanya upanuzi wa Bandari kubwa; badala yake wameingia mikataba mibovu ya upakuzi wa mizigo inayopelekea kupunguza hata kiasi cha shehena kinachohudumiwa katika bandari zetu. Wakati washindani wetu nchi za jirani, ambao wametoa fursa kwa vijana wenye kufiria na kuona mbali na kuunga mkono vyama vyenye sera mbadala; wanapanua bandari zao na kuwekeza katika miundombinu, sisi ambao tuko katika nafasi bora zaidi ya bandari zetu kupata soko kubwa la nchi za maziwa makuu tunabaki tumetahayari kutokana na sera legelege na uongozi mbovu chini ya CCM. Wakati wetu ni huu, tusidanganyike. Wakati wa kudai uhuru, ni vijana makuli wa pale bandarini ndio waliokuwa mstari wa mbele kwenye kudai uhuru; hawakuigopa serikali dhalimu ya kikoloni kwa kuwa hawakuwa na cha kupoteza kama wenye kazi za kola nyeupe(white collar) waliokuwa kwenye serikali ya mkoloni. Ndio maana huwa nafarijika kila ninapoona vijana wasio na ajira na watanzania wa kawaida kwa ujumla wakitaka mabadiliko ya kweli ili kupata uhuru wa kweli. Tabaka hili, halina cha kupoteza isipokuwa umasikini wao na malipo watakayopata ni kuishi kwenye taifa lenye kutoa fursa.

Serikali ya CCM inapita ikijivuna kuboresha miundombinu kwa kutumia takwimu za kuongezeka kwa idadi ya wanaotumia simu za mkononi; lakini hebu tuiangalie kwa undani hii sekta. Ukuaji wake umekuwa kwa nguvu ya sekta yenyewe kwa sababu za nje ya sera za serikali, hii imefanya mchango wake katika ukuaji wa uchumi wa taifa na hata kubadili kipato cha watanzania mmoja mmoja mwenye simu kuwa ni finyu. Tathmini ya serikali ya CCM yenyewe ya hivi karibuni katika maeneo mbalimbali ya nchi inaonyesha kwamba katika kila watanzania kumi (10) wenye simu, ni watanzania wawili(2) ndio wanatumia simu zao kwa matumizi binafsi na biashara; hivyo asilimia kubwa ya watanzania watumia simu kwa matumizi binafsi pekee na si biashara ama shughuli za uzalishaji. Kwa hiyo, tuitumie teknolojia hii hii kuleta ukombozi, ndio maana namuomba kila mwenye simu hapa ya mtandao wa Zain au Vodacom atume neno CHADEMA kwenda namba 15710 kama mchango wake katika kupambana na ufisadi na kutetea rasilimali za taifa. Kwa wenye mitandao mingine huduma hii itafuata katika siku za usoni; huu ndio ubunifu wa kisiasa ndani ya chama kinachoongozwa na kizazi kipya.

Tumehadithiwa na wazee wetu, kwamba wakoloni walitutawala ili kupata nguvu kazi ya bei chee; kupata malighafi kwa ajili ya viwanda vyao na kupata masoko kwa ajili ya bidhaa zao. Tulipotafuta uhuru, ilikuwa ni dhamira yetu kuondoa udhalili huu. Miaka 48 baada ya uhuru, tujiulize; je hali hii imebadilika? Ukweli uko tofauti na kuondoa tabasamu lote la kusherehekea uhuru wetu. Mfumo mpya wa kikoloni ndani ya taifa lenye uhuru wa bendera; ndio unaofanya wafanyakazi kutoa nguvu kazi yao kwa bei chee kwa kulipwa mishahara midogo na kupata maslahi duni. Sasa utumwa huo unabisha hodi kwa wakulima, kupitia mikakati ya kilimo mipya inayoendelezwa hivi sasa yenye kupokonya ardhi kwa watanzania wa kawaida kwa kisingizio cha kupanua mashamba kumbe mwishowe watanzania watakuja kuwa manamba. Mgogoro wa ardhi huko Zimbabwe unapaswa kutufundisha somu kuwa kumiliki ardhi ndio ishara kuu zaidi ya uhuru wa mwananchi. Miaka 48 baada ya uhuru viwanda vyetu vinaendelea kufa huku tukilazimishwa kisera kujibidiisha kuwa watafutaji wa malighafi na kuzisafirisha kwenda viwanda vya nje zikiwa ghafi na hivyo kushindwa kuwa na uwiano wa kimalipo(Balance of Payment). Wakati tukiua viwanda vya ndani na kupunguza uzalishaji; tunafungua mipaka yetu kwa kiwango cha ajabu na kuingiza bidhaa za nje zikiwemo zisizokuwa na kiwango. Taratibu tunajenga uchumi wa kuwa wachuuzi wa bidhaa kutoka nje. Uhuru wetu uko wapi?

Lakini athari kubwa zaidi ya kiuchumi ni utegemezi ambao taifa letu limeingizwa kwa kutegemea misaada kutoka nje huku rasilimali za taifa zikifyozwa kibeberu. Ni ukoloni huu mpya ndio ambao unanifanya nitamke kwamba tunahitaji kudai uhuru wa Tanzania. Tunahitaji uhuru wa kweli. Wakati wetu ni huu, tusidanganyike. Mwanafalsafa Frantz Fanon, aliwahi kusema kwamba kila kizazi lazima, nje ya uvungu uvungu kiutambue utume wake; ama kiutumize au kiusaliti. Kizazi cha wakati huo, kilidai uhuru, na kujenga misingi ya taifa(national building) ingawa misingi hiyo imekuja kuvurugwa na kuturudisha kwenye ukoloni mambo leo(neo colonialism). Ni wajibu wa kizazi chetu; kudai uhuru wa kweli, uhuru dhidi ya umasikini, ujinga, maradhi; hatuwezi kudai uhuru huo bila kumpiga vita adui ufisadi. Wajibu wa kizazi chetu ni kuweza kupambana katika mazingira ya ushindani wa ndani na nje ya nchi yetu; kujenga taifa tukitazama kizazi chetu na kijacho.

Kwa hiyo, mkazi wa kule Loliondo na majirani zake wanaoswagwa wao na mifugo yao, huku Waziri wa Serikali yake ya CCM akiwalinda raia wa nje, na hata kutochukua hatua pale ambapo hata mawasiliano ya simu katika eneo hilo yanasomeka kama vile eneo hilo na ni miliki ya nchi nyingine; anahitaji uhuru wa kweli. Huyo ni mfano tu, watanzania waliowengi; wanatoka maeneo mbalimbali ya nchi yenye rasilimali ambayo yameporwa; iwe ni maeneo ya migodi, maeneo ya uwindaji, maeneo ya uwekezaji katika kilimo cha mashamba makubwa. Sasa hii laana ya rasilimali (resource curse) kwangu mimi ni moja ya visababishi vya kuvunjika kwa amani nchini. Tunaelekea kwenda kuchimba mafuta na uranium; nchi hii iko mashakani kama hatutabidili sera. Wakati huu ni wetu, tusidanganyike. Mwenyezi Mungu ametujalia rasilimali, lakini tukiendelea kuacha uongozi mbovu madarakani; rasilimali hizi ni tishio kwa usalama wetu wenyewe. Hivyo, tusake mabadiliko ya kweli; tupate uhuru wa kweli.

Mwandishi wa makala hii ni Mkurugenzi wa Mambo ya Nje(CHADEMA) anayepatikana kupitia 0754694553, mnyika@chadema.or.tz na http://mnyika.blogspot.com

Ripoti ya Kundi la UN: Tuchafuke tusafishe tujisafishe-kujadili ni uzalendo wa kutetea maslahi ya taifa

TAMKO KWA VYOMBO VYA HABARI

TAARIFA AWALI YA KURUGENZI YA MAMBO YA NJE YA CHADEMA KWA SERIKALI NA WATANZANIA KUHUSU RIPOTI YA KUNDI LA WATAALAMU WA UMOJA WA MATAIFA YATOLEWA

CHADEMA yatimiza ahadi ya kuitafsiri ripoti na kuichambua katika lugha ya Kiswahili.

“Tuchafuke tusafishe tujisafishe: kujadili ni uzalendo wa kutetea maslahi ya taifa”-Mkurugenzi wa Mambo ya Nje (CHADEMA), John Mnyika

Tunamtaka Waziri Masha ajibu tuhuma toka ripoti ya Kundi la Wataalamu wa UN zizazohusu Usalama wa Raia kama sehemu ya utetezi ambao Tanzania itawasilisha UN kuanzia leo

Leo tarehe 7 Disemba 2009 tunatoa rasmi kwa umma kupitia mtandao wa www.chadema.or.tz taarifa ya awali ya kurugenzi ya Mambo ya Nje na Mahusiano ya Kimataifa ya CHADEMA kwa serikali na watanzania kuhusu ripoti ya kundi la wataalamu wa Umoja wa Mataifa (UN). Tunatoa taarifa hii ikiwa ni sehemu ya kutekeleza ahadi yetu tuliyoitoa Disemba Mosi, 2009 wakati wa Mkutano na Waandishi wa Habari ya kuitafsiri taarifa ya UN kwa lugha ya Kiswahili na kuitoa hatua kwa hatua sambamba na maoni yetu ili watanzania waweze kuijadili kikamilifu na hatimaye tuweze kutoka na msimamo mmoja kama taifa kuhusu ripiti hiyo.

Napenda kuwasilisha kwa umma tafsiri ya kwanza na uchambuzi wa awali wa maudhui ya ripoti hiyo ya Kundi la Wataalamu wa UN kwa ajili ya kusambazwa, kusomwa na kutafakariwa na serikali na watanzania kwa ujumla. Aidha ni muhimu Umoja wa Mataifa (UN) nao ukayatafakari masuala haya wakati inayapitia Moani ya Serikali ya Tanzania kuhusu Ripoti husika ambayo serikali kupitia kwa Balozi wake wa Kudumu kwenye Umoja wa Mataifa (Dr Mahiga) imetangaza kuwa itayawasilisha leo tarehe 7 Disemba 2009. Watanzania na Umoja wa Mataifa(UN) wazingatie kuwa maoni hayo ya Serikali inayoongozwa na CCM si msimamo wa Watanzania wote kwa kuwa si wananchi, wala vyama vyao, wala wawakilishi wao(kwa maana ya wabunge wa kambi zote) wamehusishwa katika kuandaa ripoti husika. Hivyo, Watanzania na hata Umoja wa Mataifa, unapaswa kuzingatia kuwa mjadala kuhusu ripoti hii unapaswa kuendelea ili Taifa la Tanzania lipate msimamo wa pamoja kuhusiana na ripoti husika; ili wawakilishi wetu kwenye UN wakazungumze matakwa ya watanzania badala la maoni yao binafsi ama ya serikali inayoongozwa na chama kimoja ndani ya mfumo wa vyama vingi. Ni muhimu nikarudia pia kutoa rai niliyoitoa awali kwamba ripoti ya Kikundi cha wataalamu kilichoundwa na UN ipaswa pia kujadiliwa muktadha wa Orodha ya Mafisadi (list of shame) iliyotolewa na CHADEMA.

Nakubaliana na hoja kwamba Serikali ya Tanzania imechafuliwa katika Ripoti hiyo ya UN kwa baadhi ya viongozi wake, ama raia wake kutajwa kwa namna moja au nyingine katika ripoti hiyo; aidha serikali yenyewe kama taasisi imechafuliwa kwa kuonyeshwa kwamba haitekelezi kikamilifu maazimio ya Umoja wa Mataifa (UN) ambayo serikali yetu ni mwanachama. Lakini nchi ya Tanzania kama taifa, na watu wake wote kwa ujumla wake; hawajachafuliwa. Kama Nchi ya Tanzania, na wananchi wake wote wakatoa kauli ya pamoja ya kuwatetea watu wachache ndani na nje ya serikali waliotajwa katika kashfa hii; hapo ndipo tutakapochafuka wote kwa ujumla wake. Lakini kama Nchi yetu, na watu wake; tukakubaliana kuchukua hatua ya kusafisha uchafu unaoichafua sisi na taifa letu; ni wazi tutasafishika na heshima ya taifa letu itaendelea kulindwa na kujilinda kote duniani.

Kwa kutumia lugha ya picha; ni kama vile nchi yetu ni mtaro; sasa mtaro unaweza kuwa na uchafu, ukipiga kelele kwamba hakuna uchafu wakati uchafu unaonekana basi utaonekana una utamaduni wa uchafu ndio maana unaona ni jambo la kawaida kuwa kwenye mazingira ya uchafu; wewe ni mchafu. Lakini ukichukua hatua ya kuingia ndani ya mtaro, na zana zako za kusafishia; utachafuka kidogo, utaweza kusafisha mtaro, utatoka na utajisafisha. Mtaro utabaki safi, na wewe utabaki safi; na wewe na mtaro wako wote mtakuwa safi na kuitwa wasafi.

Kadhilika kwa Tanzania, mjadala huu kuhusu uchafu iliotolewa na ripoti ya UN unapaswa kuendelea ili tuujue vizuri uchafu wenyewe wakati wa mjadala huu tutaonekana kuwa tuna uchafu lakini tutaweza kuingia tukachafuka kidogo tukausafisha na nchi yetu itabaki ikiwa safi na sisi wenyewe tutathibitika mbele ya jamii ya kimataifa kuwa ni wasafi na hatupendi uchafu na unapojitokeza tunachukua hatua za kuuondoa.
Hivyo, naandika waraka huu kwa tahadhari kubwa ya kizalendo kwa kuwa najua suala hili linagusa kwa namna au nyingine vyombo vyeti na masuala tete yanayoelekezwa kwa nchi yetu yanayogusa jeshi, polisi, usalama wa taifa, chama tawala, serikali yake, na viongozi wake. Mambo ninayoandika pia yanagusa genge la mafisadi na watumiaji vibaya wa madaraka; wengine wakiwa ni wafanyabiashara, wengine wakiwa ni viongozi, wengine wakiwa ni wahalifu waliokubuhu na waasi wenye kufanya mauaji.

Katika mukatadha huo, ni muhimu kwa wananchi kupuuza kauli za wenye kueneza uchochezi kwamba CHADEMA iache siasa zenye kuichafua Tanzania; eti itangulize ‘uzalendo’. Wananchi wajiulize ni nani anaichafua Tanzania; kati ya waliofanya ufisadi na/ama kutumia madaraka vibaya na kuitumbukiza Tanzania katika kashfa kama hizi za usafirishaji wa silaha na utoroshaji wa madini kutoka maeneo yenye vita vya wenyewe kwa wenyewe au mtu anayetaka mjadala kuhusu suala hili ili utoke msimamo wa pamoja wa wazalendo wote wenye kukerwa na mambo hayo ili kulirudisha taifa kwenye mkondo unaostahili wenye kulinda heshima ya Tanzania kitaifa na kimataifa?

Hawa wangetaka kutanguliza maslahi ya pamoja ya Tanzania wasingekurupuka kutoa kauli ya serikali ya CCM bila kushirikisha umma wa watanzania ama wawakilishi wa wananchi. Viongozi wa serikali hawana haki ya kusema kwa niaba ya watanzania katika masuala tata bila kupata maoni yetu au ya kambi yetu bungeni. Wananchi tuwaambie wazi watu kama hao kwamba; kila wanachokisema ni msimamo wao na serikali ya chama chao au taasisi zao; hakiwakilishi msimamo wa watanzania wote.

Waambie wazi kuwa kama wanataka watanzania tusivuane nguo hadharani; walio kwenye mamlaka ; kabla ya kutoa kauli, walau waombe maoni ya wawakilishi wa wananchi au taasisi zinazowakilisha wananchi; diplomasia iliyokomaa inatambua umuhimu wa maridhiano baina ya viongozi kabla ya kutoka hadharani katika masuala tete ya kitaifa. Tuko tayari kwa majadiliano kama watanzania kuhusu suala hili ili tutoke na msimamo wa pamoja kama taifa. Kuhoji uzalendo wa wanaotaka watanzania waliotajwa kwenye ripoti ya Kikundi cha Wataalamu kilichoundwa na UN ni sawa na kuwatetea mafisadi ama waliotumia vibaya madaraka yao waliotuhumiwa kwenye ripoti husika.

Ikumbukwe kuwa tuhuma za Tanzania kujihusisha na vita vya DRC zilianza toka wakati taifa hili linaasisiwa. Tofauti ya watawala wa sasa ni kwamba uongozi wa Nyerere ulikuwa unasema wazi kuwa unasaidia waasi, na UN inajua. Lakini wakati ule walioitwa waasi ni wazalendo waliokuwa wakipambana dhidi ya watawala wa kidikteta ambao walikuwa ni makuwadi wa ubeberu na ukoloni mamboeleo katika Afrika. Sera ya wakati huo ya mambo ya nje ya Tanzania ilikuwa ni kuleta ukombozi Afrika nzima (hata ikiwa ni kwa kuunga mkono vita vya msituni) na kueneza umajumuhi wa kiafrika (Pan Africanism).

Serikali ya sasa ipo tofauti; kwanza haina msimamo endelevu; pili, sera yake ya mambo ya nje haieleweki; tatu, masuala ya sasa ya usafirishaji wa silaha ama utoroshaji wa madini toka maeneo yenye vita ambao yanasemwa kuwa yanafanywa na serikali ama watanzania yanahusu zaidi miradi binafsi ya watu ambayo wanaindesha kwa ama kuzitumia taasisi za kiserikali au kuruhusu mianya kwa kutowajibika kusimamia utawala wa sheria ikiwemo kuheshimu maazimio ya Umoja wa Mataifa (UN) ambayo nchi yetu imetia saini.

Hivyo wapenda demokrasia na maendeleo ndani na nje ya Tanzania wanapaswa kuunga mkono rai tuliyoitoa Disemba Mosi, 2009: Kwamba wazalendo wote, waliokerwa na Tanzania ‘kuchafuliwa’ na ripoti hiyo ya Kikundi cha Wataalamu wa UN, wanapaswa kuwashinikiza watanzania wote wanaoishi Dar es salaam, Kigoma na kote duniani ambao wametajwa kwenye taarifa hiyo kwa majina yao; wajitokeze kutoa kauli za kusafisha majina yao, tukiridhika na hoja zao, katika utetezi wao; basi na sisi tutajiunga katika kundi la kuwatetea na kuwasafisha. Viongozi na taasisi za serikali zilizotajwa kwa namna moja au nyingine katika taarifa hiyo iwe kwa majina au kwa matukio zijitokeze kuelezea kutajwa kwao; tukiridhika na maelezo yao na vielezo vyao, tutajiunga katika kazi ya kizalendo ya kuwatetea na kuwasafisha. Na hii isiwe kwa taarifa ya UN pekee; iwe pia Orodha ya Mafisadi, katika vipengele vinavyohusiana na Kampuni za Meremeta, Tangold, Deep Green nk.

Kosa kubwa la Wizara ya Mambo ya Nje na Mahusiano ya Kimataifa katika sakata hili ni kufikiri kwamba yenyewe tu ndiyo inayowajibika kulitolea ufafanuzi na taarifa kuhusu tuhuma zilizoibuliwa na Kundi la wataalamu lililoundwa na UN. Wakati umefika sasa wa Waziri Mkuu Mizengo Pinda kuwashinikiza Mawaziri wengine ambao sekta zao zimeguswa kutoa kauli za kujibu ama kufafanua hoja zilizoibuliwa ndani ya ripoti hiyo, ambayo tayari Wizara ya Mambo ya Nje ameshafanya kosa la kisiasa la kuitumbukiza serikali kwenye malumbano mapema kwa kuliibua suala hili na kuituhumu UN kabla hata Tanzania kufafanua ama kujieleza kwenye Kamati ya Vikwazo. Kwa kuanzia ni muhimu kwa Wizara ya Mambo ya Usalama wa Raia na ile ya Ulinzi na Jeshi la Kujenga taifa zikatoa maelezo na vielelezo kuhusu suala hili. Hivyo, mawaziri wanaopaswa kufutia kutoa kauli ni: Waziri wa Ulinzi na Jeshi la Kujenga Taifa; Hussein Mwinyi na Waziri wa Usalama wa Raia; Lawrence Masha.
Ikumbukwe kuwa Tarehe 2 Disemba 2009 Jeshi la Polisi nchini limesema kuwa Tanzania haihusiki kwa namna yoyote ile katika kashfa ya kuwapatia silaha waasi wa serikali za mataifa mengine kama ilivyotangazwa na baadhi ya vyombo vya habari. Mratibu wa Udhibiti wa Silaha hapa nchini Kamishna Msaidizi Mwandamizi (SACP) Dominick Hayuma, amesema kuwa taarifa za Kundi la Wataalamu lililoteuliwa na UN hazina ukweli wowote. Amesema kuwa Tanzania ina uhusiano mkubwa na serikali za nchi jirani na ndiyo maana majeshi ya polisi katika ukanda wa nchi za Maziwa Makuu na Pembe ya Afrika na zile za kusini mwa Afrika (SADC) zinashirikiana katika masuala ya operesheni kwa lengo la kudhibiti kwa pamoja vitendo vya kihalifu. Amesema kuwa kuna baadhi ya mashirika ya ndani na nje ya nchi wanakusanya taarifa za uongo kwa lengo la kujipatia fedha ama kuleta uchochezi baina ya nchi moja na nyingine.
Nichukue fursa hii kuwatahadharisha wataalamu wetu wa polisi kutokuingizwa kutoa kauli za kisiasa katika mambo yanayostahili maelezo na vielelezo. Ni vizuri zikatolewa kauli za kisera kuhusu masuala hayo; ushahidi wa kuingia ama kutoka kwa silaha za kijeshi katika nchi yetu uko wazi hata kwa wananchi waoishi katika mikoa ya mpakani na nchi za eneo la maziwa makuu. Wananchi ni muhimu wawatake polisi ambao tunawalipa kwa kodi zetu, wakae mbali na mijadala ya kisera na ya kisiasa ili kutenganisha kati ya jeshi na propaganda za wanasiasa. Tabia hii ya kutumwa na viongozi wa CCM ndio ambayo inafanya Polisi wetu kushiriki katika kuiba kura na kuhujumu wapinzani wakati wa uchaguzi. Polisi wetu wajue kwamba mishahara midogo wanayolipwa na maslahi duni wanayoyapata ni matokeo ya uongozi mbovu wa serikali hiyo hiyo ya CCM inayofanya waweke pembeni maadili ya taaluma zao; na kuitetea na hata kuipigania nyakati za uchaguzi. Hivyo, polisi ikae mbali na mapambano ya kisiasa baina ya vyama, ikiwemo mapambano ya hoja kwa ajili ya kupata msimamo wa pamoja wa watanzania. Polisi ibaki na jukumu la kusimamia sheria na kuhakikisha kwamba utawala wa sheria unazingatiwa badala ya kukanusha tu bila maelezo na vielelezo ripoti ya Kundi la wataalamu wa UN ambayo imewataja kwa majina watanzania wanatuhumiwa kuvunja sheria lakini polisi haijawakamata mpaka sasa.

Ni muhimu kwa Wizara ya Usalama wa Raia hususani kupitia kwa Waziri Lawrence Masha ikitoa tamko ikiwemo kutoa maelekezo kwa Mkuu wa Upelelezi wa Makosa ya Jinai (DCI) kuwachunguza watu wote na taasisi zote za Tanzania zilizotuhumiwa kwenye ripoti hiyo likiwemo jeshi la polisi lenyewe. Wizara ya Usalama wa Raia ijibu maswali na kufafanunua masuala yafuatayo, ikiwemo kwa kutoa maelezo na vielelezo kwa Umoja wa Mataifa kwamba: Je, taarifa ya kwamba polisi waliizunguka meli inayotuhumiwa katika ripoti hiyo ya Kundi la Wataalamu wa UN anaizungumziaje? Je, polisi hao walikuwa wa nchi gani? Kama ni watanzania walikwenda kufanya nini kwa maelekezo ya nani? Aidha ripoti ya Kundi la Wataalamu, inataja kwamba yapo maduka ya masonara yaliyokuwa yananunua madini yaliyotoroshwa kutoka DRC? Na kwamba kwa maelezo ya mmojawapo wa wamiliki wa maduka yaliyotajwa kwenye taarifa hiyo alidai kwamba kuna wakati ambapo idara ya uhamiaji iliwahi kuendesha msako dhidi ya wafanyabiashara hao? Je, serikali inayazungumziaje madai hayo? Je, serikali yake iko tayari kuwachunguza raia wote wa kigeni wanaotajwa kwenye ripoti hiyo wanaoishi mpaka sasa Dar es salam, Kigoma na kwingineko katika nchi yetu? Je, Wizara yake inamzungumziaje raia wa DRC aliyetajwa katika ripoti ya Kundi la Wataalamu wa UN kwa jina la Bande Ndagundi, ambaye anatuhumiwa kuishi nchini kwa zaidi ya miaka 27 anayejishughulisha na biashara zinazohusiana na masuala ya kijeshi? Je, Waziri Masha au wawakilishi toka Wizara yake wamewahi kuwasiliana na mtu huyo anayedaiwa kuendelea kuishi Dar es salaam? Ni muhimu kwa Wizara hususani Waziri husika kutoa kauli kuhusu mtu huyu kwa kuwa imeelezwa kwa uwazi ikiwemo kwa yeye mwenyewe kusema kwenye barua zake ikiwemo ile ya tarehe 17 July 2009 kuwa ana mawasiliano ya karibu na viongozi wa juu wa serikali, polisi, jeshi na chama tawala.

Masuala haya na mengine mengi zaidi nikayoyachambua kadiri siku zinavyokwenda yanapaswa kujadiliwa na wananchi ama wawakilishi wao; ili tuweze kutoka na msimamo wa pamoja. Pia UN na Kundi la Wataalamu wake kuiuliza serikali itoe maelezo ya kina wakati wa mapitio ya taarifa husika. Ni utaratibu wa kawaida kwamba ufuatiliaji kama huu uliofanywa kwa kuwa ulihusu Tanzania; serikali itapewa fursa kuandika ripoti ya nchi (country report) kufafanua mambo ambayo yametajwa kabla ya kamati ya vikwazo kufanya maamuzi yake ama kuikubali ripoti husika na mapendekezo yake ama kutoa maelekezo mbadala ya kutaka uchunguzi zaidi katika maeneo ambayo Kundi la Wataalamu limeeleza katika ripoti yake kuwa uchunguzi wake bado haujamilika. Inashangaza kwamba serikali inatumia nguvu kubwa, kubeza ripoti hii na kutishia wanahabari wasiendelee kuandika wakati ripoti imeweka bayana kwamba uchunguzi bado haujakamilika; serikali itaweka wapi uso wake kama uchunguzi zaidi ukaibua uchafu zaidi? “Tuchafuke tusafishe tujisafishe: kujadili ni uzalendo wa kutetea maslahi ya taifa”


Imetolewa na:


John Mnyika
Mkurugenzi wa Mambo ya Nje na Mahusiano ya Kimataifa
0754694553

Kauli zangu ziarani Ubungo

Jana Jumamosi tarehe 5 Disemba nimeanza ziara ya siku mbili katika Jimbo la Ubungo; kwa nafasi yangu kama Mwenyekiti wa Mkoa wa Kinondoni Kanda ya Dar es salaam. Nimefanya mikutano miwili ya hadhara. Mkutano wa kwanza nimeufanya katika Kata ya Ubungo kuanzia saa 10:30; jirani kabisa na kituo cha mabasi ya mikoani(Ubungo Bus Terminal).

Nikihutubia mkutano huu, niliwashukuru wananchi wa Dar es salaam waliotuunga mkono kwenye uchaguzi wa serikali za mitaa na kuwapongeza kwa ushindi uliopatikana. Niliwaeleza kuwa mwaka 2004, CHADEMA ilishinda viti 2 tu katika uchaguzi wa serikali za mitaa. Lakini mwaka huu wa 2009, pamoja na hujuma zote na uchaguzi kuwa ovyo ovyo; tumeweza kushinda viti 11 ambalo ni ongezeko la asilimia nyingi wakati vyama vingine idadi yao ya viti imeshuka.

Nikawaeleza hali hii inatia matumaini tunapoelekea uchaguzi wa mwaka 2010; na nikawaambia kwamba lazima Dar es salaam iwe kitovu cha mabadiliko nchini. Nikitumia nafasi yangu nyingine ya Mkurugenzi wa Mambo ya Nje na Mahusiano ya Kimataifa nikawaeleza kwamba katika nchi nyingi za Afrika zilizofanya mageuzi chachu ya mabadiliko hayo huwa ni miji mikubwa kama Dar es salaam lakini inashangaza kwamba kwa upande nchi yetu hali ni tofauti.

Wakazi wa Dar es salaam wanafurahia hoja za wabunge wa upinzani kama wakina Dr Slaa ambao wamepatikana kwa kuchaguliwa majimbo ya vijijini, wakati ambapo majimbo yote saba ya Dar es salaam ni CCM. Hata kwenye udiwani; hakuna diwani hata mmoja mkoa mzima wa Dar es salaam kutoka upinzani. Hii ni aibu kwa taifa na ni matusi kwa wananchi ambao wanapata fursa ya kuwa karibu na vyombo vya habari na kwa sehemu kubwa ni watu waliopata fursa ya kwenda shule.

Hivyo ni muhimu wawezeshe harakati hizi za mabadiliko, na nikawatangazia kwamba siku hiyo tuanaanza kusambaza rasmi vipeperushi vya kuunga mkono CHADEMA kwa njia mbadala katika jimbo la Ubungo.

Nitawatangazia rasmi kwamba sasa wanaweza kujiunga ama kuchangia CHADEMA kwa kutuma neno CHADEMA kwenda namba 15710 kwa wateja wa Zain na Vodacom. Hii inafanya kwamba hata kama wametingwa na majukumu mengine bado wanaweza kabisa kufanya harakati za kisiasa kwa kutumia simu zao. Nikawatangazia pia kuwa kama wanataka kuwasiliana na CHADEMA jimbo la Ubungo watume ujumbe au wapige simu kwenda namba 0784222222.

Nikawaambia kwamba wakumbuke maneno tuliyowaambia mwaka 2005 kwamba mabadiliko ya kweli katika taifa letu; hayawezi kuletwa na mafisadi wale wale, wa chama kile kile; chenye uoza ule ule, wakiendeleza yale yale kwa ari, nguvu na kasi mpya; na kwamba kwa falsafa ya chukua chako mapema(ccm) ya chama cha mafisadi(ccm) Tanzania yenye neema haiwezekani.

Nikawakumbusha kwamba mwaka 2005, wakati nagombea ubunge katika jimbo hilo, nilisimama katika eneo hilo hilo na kutangaza kwamba kuna ufisadi na upotevu wa mapato Mradi wa Kituo cha Mabasi Ubungo(UBT) ambao unafanywa na kampuni ya familia ya Kingunge na vigogo katika Halmashauri ya Kinondoni. Wakati huo, CCM wakiwemo baadhi ya vigogo hao walikanusha. Lakini sasa miaka michache baadaye Waziri Mkuu, Mizengo Pinda amekwenda na kutaka ukaguzi maalum(Special Audit) ambayo imebaini mambo ambayo niliyashayasema mwaka 2005. Hata hivyo, kama kawaida ya CCM ya kulindana; Pinda mpaka sasa amekalia ripoti hiyo ya CAG. Amesubiri mkataba wa Kampuni ya familia ya Kingunge (Smart Holdings) umalizike badala ya kuvunja mkataba na kuwachukulia hatua za kisheria. Na kutokana na hayo, kampuni hiyo imehamishwa katika ulaji mwingine kwa kupewa katika mazingira tata tenda ya kukusanya mapato katika jesho la wamachinga(Machinga Complex). Hivyo, nikatoa mwito kwa Waziri Mkuu Pinda kuiweka hadharani mapema iwezekanavyo ripoti ya CAG kuhusu mradi wa UBT ili iweze kujadiliwa na umma tukiwemo wananchi wa ubungo ili hatua ziweze kuchukuliwa kwa kampuni hiyo na wanafamilia hao ambao walikuwa wakidanganya kwamba mapato kwa siku ni milioni moja na ushee; wakati serikali imeanza tu kukusanya mapato imeweza kupata takribani milioni nne kwa siku. Pia, nikatoa mwito kwa wamachinga kupaza sauti kudai jingo lao kwani hata wao wanavikundi na vyama vyao ambavyo vinapaswa kuhusishwa kwenye ukasanyaji wa mapato.

Mkutano wa pili nimeufanya kata ya Kimara eneo la Kimara matangini ambapo pia nilianza kwa kuwashukuru wananchi wa kutuunga mkono katika uchaguzi wa mitaa ya kata hiyo. Niliwaeleza kwamba pamoja na hujuma walizofanyiwa ikiwemo makaratasi ya kupigia kura katika kata hiyo kuisha asubuhi, na mengine kuletwa jioni tena yakiwa yametolewa nakala(photocopy) kwenye maduka ya jirani hapo hapo Kimara kwa idadi isiyojulikana; bado upinzani uliokuwepo umeipa somo CCM na wenyeviti wake waliotangazwa kuwa wameshinda.

Niliwaleza kwamba mwaka 2004; wenyeviti hao walipita bila kupingwa lakini sasa wameshinda kwa ushindani mkali uliohusisha CCM kutoa wapiga kura maeneo mengine na kuwahamishia kupiga kura hapo Kimara kwa kutumia karatasi hizo zilizoongezwa. Nikawaeleza kwamba kutokana na hali hiyo, yapo maeneo ambayo tumefungua kesi kama Msewe, Baruti nk.

Nikawatangazia rasmi wenyeviti wa serikali za mitaa kwa tiketi ya CCM na viongozi wa chama chao kwamba wanapaswa kutekeleza wajibu wao ipasavyo wa kuwatumikia wananchi kwa kuwa tofauti na udiwani na ubunge ambapo kiongozi akichaguliwa amechaguliwa hakuna namna ya kumuondoa mpaka uchaguzi mwingine kwenye serikali za mitaa hali ni tofauti. Nikaweleza wananchi kwamba sheria inawaruhusu kupiga kura ya kutokuwa na imani na kuwaondoa kama watashinda kutekeleza wajibu ipasavyo ikiwemo kuitisha mikutano ya wananchi na kuwasomea taarifa za mapato na matumizi. Pia kama watashindwa kufuatilia kero za msingi za wananchi, mathalani katika Mtaa wa Golani kuna tatizo na daraja na kero kubwa ya maji. Kama viongozi hao watashindwa kushirikiana na wananchi kuondokana na kero hizo; CHADEMA tutashirikiana na wananchi kuchukua hatua zinazostahili kabla hata ya uchaguzi ujao wa serikali za mitaa.

Nikawaeleza kwamba taifa letu kwa sasa linapita katika wakati mgumu kutokana na kukua kwa matabaka katika jamii. Nikawaeleza kwamba pamoja na kukua kwa tabaka kati ya masikini na matajiri tabaka baya zaidi ni lile la kukosekana kwa usawa katika utawala wa sheria na mifumo ya utolewaji wa haki. Mathalani watuhumiwa wa ufisadi tuliowataja kwenye orodha ya mafisadi, bado wengi wao wanatamba barabarani mpaka hivi sasa na kwa sehemu kubwa wakilindwa na vyombo vya usalama vinavyoendeshwa na kodi za watanzania; lakini kwa mwananchi mlipa kodi anayeishi Kimara hali yake ya usalama ni tete kutokana na majambazi kuruhusiwa kutamba mara kwa mara. Hivyo suluhisho ni kufanya mabadiliko ya kiuongozi na kisera ili kuunganisha nguvu ya umma kushughulikia masuala hayo. Nikawaeleza kwamba sera kuu ya CHADEMA ambayo tunaiita falsafa yetu ni Nguvu ya Umma ama people’s power. Chini ya Sera hii tunaamini kwamba rasilimali za watanzania iwe ni maliasili; kodi zetu ama vipaji vyetu vinapaswa kutumika kwa manufaa ya wananchi hivyo tunataka kujenga taifa lenye kutoa fursa.

Nikawaeleza changamoto iliyopo ni upotoshaji unaondelea wa kila kitu; hata ufisadi na matumizi mabaya ya madaraka kuitwa kuwa unafanyika kwa maslahi ya Taifa. Nikatolea mfano kuwa baada ya ripoti ya UN kutolewa Waziri wa Mambo ya Nje, Benard Membe alijitokeza na kuikana yote kwa ujumla wake kwa maelezo kwamba analinda maslahi ya Taifa. Waziri Membe katika hali hiyo, kama kweli angetaka kulinda kikamilifu maslahi ya taifa angetangaza kufanya uchunguzi juu ya watu waliotajwa ili kutetea taswira ya Tanzania kama nchi. Badala yake, kuikana ripoti nzima ni kufisha watu waliofanya vitendo haramu kwa kutumia kivuli cha maslahi ya taifa. Badala yake ni muhimu kwa serikali kuchukua hatua ikiwemo kuchunguza na kuchukua hatua; badala ya kubeza na kufunika hali ambayo inaweza kuiathiri zaidi nchi katika medani ya kimataifa. Ni kama ukiwa na mtaro wa uchafu, wakati mwingine unawajibika kuingia ukachafuka, ukausafisha na baadaye ukajisafisha. Tanzania itasafishwa kwa serikali kuingia katika mtaro kusafisha uchafu iliofanywa na watanzania wachache kwa maslahi yao binafsi; sio ya taifa ili nchi na watanzania wote kwa ujumla tuweze kusafishwa mbele ya jamii ya kiamataifa.

Leo nitakuwa na mikutano mingine Goba, Mbezi na Sinza ikiwa ni mwisho wa ziara ya awamu ya sasa.

Kashfa Kampuni ya Reli: Serikali ya Tanzania, India ziwaombe radhi watanzania

TAARIFA KWA UMMA

KASHFA KAMPUNI YA RELI: WATANZANIA NDIO WAKUOMBWA RADHI

Taarifa inatolewa kwa umma kupitia kwa vyombo vya habari na Kurugenzi ya Mambo ya Nje na Mahusiano ya Kimataifa ya CHADEMA kufuatia kauli kwamba Ubalozi wa India nchini umeitaka Serikali ya Tanzania kuomba radhi kutokana na kitendo cha wafanyakazi wa Kampuni ya Reli (TRL) kubeba msalaba na kuimba nyimbo za msiba wakati wakiwa kwenye mgomo uliolenga kushinikiza menejimenti ya kampuni hiyo inayoongozwa kwa kiasi kikubwa na raia wa India kutimiza madai yao.

Kurugenzi ya Mambo ya Nje na Mahusiano ya Kimataifa ya CHADEMA haipendi kuamini kwamba kauli hiyo imetolewa na ubalozi husika kwani ina dalili za kuzusha malumbano ya kidiplomasia baina ya serikali ya Tanzania na India.

Aidha ikiwa kauli hiyo iliyonukuliwa na vyombo mbalimbali vya Habari hususani gazeti la Majira Na. 5813 la tarehe 5 Disemba 2009 ni msimamo rasmi wa nchi ya India, tunaupongeza ubalozi huo kwa kuweka hisia zao hadharani juu ya yaliyojiri katika mgomo wa wafanyakazi wa TRL na hivyo kuibua mjadala wa umma kuhusu masuala muhimu yahusuyo mustakabali wa Kampuni hiyo inayohudumia watanzania na raia wa nchi mbalimbali.

Ubalozi wa nchi hiyo kwa kutoa kauli kama hiyo utakuwa umezingatia misingi ya diplomasia inayosimamia ukweli bila kuendekeza unafiki wa kimataifa. Hata hivyo ubalozi wa nchi hiyo ulipaswa kuzingatia pia kanuni nyingine ya msingi(golden rule) kwenye utamaduni wa kidiplomasia ya nchi kuepuka kutenda ama kusema yale ambayo isingependa kutendewa au kusemwa.

Katika muktadha huo; kurugenzi ya Mambo ya Nje na Mahusiano ya Kimataifa ya CHADEMA inatoa tamko la kutaka Serikali ya India na hata ya Tanzania kuwaomba radhi wafanyakazi na watanzania kwa ujumla kutokana na yaliyotokea na yanayoendelea kutokea katika kampuni ya TRL.

Serikali zote mbili zinawajibika kubeba mzigo wa lawama, ndio maana kurugenzi ya mambo ya Nje na Mahusiano ya Kimataifa ya CHADEMA haikushangazwa sana kuona wafanyakazi wakiwa wamebeba msalaba ambao pengine ni ishara ya mzigo huo kwa menejimenti ya TRL inayotoka India na kwa serikali ya Tanzania inatawaliwa na CCM.

Aidha hatukushangwa na wafanyakazi kuimba nyimbo za msiba wakati wa mgomo wao kwani Kampuni hiyo kwa aina ya mabehema/vichwa vyenye ubovu, kwa huduma mbovu na kwa menejimenti bomu ni wazi kwamba hali ya mambo ni kama katika mazingira ya kifo na kwamba kashfa ya TRL ni msiba wa watanzania. Hata mkataba wenyewe wa ubia kati ya Serikali na Kampuni ya RITES ya India; ni mkataba marehemu kutokana na maudhui yake.

Hivyo kurugenzi ya Mambo ya Nje na Mahusiano ya Kimataifa ya CHADEMA inazitaka serikali zote mbili; Tanzania na India, kuwaomba radhi wafanyakazi na watanzania kwa kuwaingiza katika kadhia hii yenye kuleta vilio vya aina mbalimbali kila kukicha.

Ubalozi wa India ndio unaopaswa kuwaomba radhi wafanyakazi kwa kuwa menejimenti mbovu ya TRL yenye raia toka nchini India ndiyo inayochangia katika kuwaingiza wafanyakazi kwenye migomo ya mara kwa mara kutokana na uhai kuwa mashakani kutokana na maslahi na mishahara duni. Aidha ubalozi wa India unapaswa pia kuomba radhi kwa watanzania kutokana na Kampuni yake ya RITES kuingia katika ubia wenye kuua taratibu mfumo mzima wa reli Tanzania kuanzia kampuni yenyewe, huduma zake za usafiri na hata miundo mbinu yake na kufanya hali ya mazingira ya usafiri huo hapa nchini kuwa hatari kwa usalama wa raia.

Katika medani ya diplomasia inafahamika kwamba kazi za Balozi mbalimbali ni pamoja na kuwa mawakala wa masuala ya mahusiano ya kiuchumi na kibiashara; hivyo Ubalozi wa India nchini hauwezi kukwepa lawama kutokana na Kampuni ya RITES toka nchi hiyo kushindwa kuendana na mahitaji ya watanzania na viwango vya kimataifa vya usafirishaji wa reli.

Izingatiwe kuwa nchini India kampuni ya RITES si moja ya kampuni zinazoheshimika katika masuala ya usafiri wa reli; inashangaza kwa ubalozi wa nchi hiyo kuitetea kampuni ambayo ndani ya nchi yao wenyewe haiwezi kupata mikataba ya miradi ya umma nyeti kama walivyoipata hapa Tanzania.

Kurugenzi ya Mambo ya Nje na Mahusiano ya Kimataifa ya CHADEMA inaamini kwamba Ubalozi wa India nchini ulifahamu kabla udhaifu wa Kampuni ya TRL na menejimenti toka nchi yao; lakini haukuishauri wala kuitahadharisha Serikali ya Tanzania kama ambavyo taratibu za diplomasia nyenye dhamira njema; ikiwemo ya kiuchumi inavyohitaji.

Uamuzi wa kunyamaza kimya na hata wa kutoa kauli kama hii yenye kulinda maslahi ya raia wa India pekee bila kuzingatia hali ya wafanyakazi wa Tanzania ni dalili za kwamba Ubalozi wa India ulinyamaza kwa makusudi kuiacha serikali ya Tanzania iingie katika mkataba mbovu na kuletewa huduma/miundo mbinu kanyaboya kwa maslahi yao ya kiuchumi suala ambalo linafanya ubalozi huo uwajibike kuomba radhi kwa watanzania.

Aidha Serikali ya Tanzania inayoongozwa na CCM ndio inayowajibika zaidi kuomba radhi si kwa raia wa India bali kwa wafanyakazi na wananchi wa Tanzania kwa ujumla kutokana na kusababisha matatizo makubwa yanayotokea katika Kampuni hiyo.

Serikali inayoongozwa na CCM ndiyo iliyopeleka bungeni muswada wa kurekebisha sheria iliyoua TRC, na kuweka vipengele vilivyoruhusu mianya ya kuingia mikataba mibovu ambayo imesababisha msiba kwa sekta ya reli nchini. Matokeo yake ni kwaba hali ya usafiri wa reli inazidi kuwa mbaya usafirishaji wa abiria na mizigo kwa njia hii unazidi kupungua mwaka hadi mwaka; mathalani kutoka tani 1,169,000 mwaka 2005 mpaka tani 429,000 mwaka 2008. Serikali imeingiza fedha za walipa kodi katika uwekezaji wa kibadhirifu na kudhoofisha miundombinu iliyojengwa kwa jasho la umma.

Hivi karibuni Waziri Mkuu, Mizengo Pinda alitoa fedha za umma bila kufuata taratibu(misappropriation) kwa ajili ya kulipa wafanyakazi wa Kampuni hiyo; na ikaendelea kuwalipa kwa maelezo kwamba kampuni husika haina fedha. Lakini Serikali hiyo hiyo ikaeleza kauli tofauti inayoonyesha kwamba kampuni ya TRL ilishapatiwa mkopo.

Kurugenzi ya Mambo ya Nje na Mahusiano ya Kimataifa ya CHADEMA inawataka Waziri Mkuu ama Waziri wa Miundo Mbinu kuwaeleza ukweli wote wa Tanzania wa kinachoendelea kutokana na fedha za umma zilizotolewa kwenda kampuni hiyo na mikopo ama fedha zingine ambazo kampuni hiyo ilipokea.

Mbunge wa Mpanda Kati, Said Arfi (CHADEMA) ambaye pia ni Makamu Mwenyekiti wa chama aliwasilisha maelezo binafsi kuhusu matatizo ya reli nchini chini ya TRL lakini serikali haikutoa majibu kamili na amekuwa akizungushwazungushwa kuhusu kusudio lake la kuwasilisha hoja binafsi juu ya kashfa ya TRL.

Katika mazingira haya ya utata na hali tete katika kampuni wakati umefika sasa wa Rais Jakaya Kikwete kuelekeza watendaji wake kuweka wazi kwa umma ama kupitia wawakilishi wao Mkataba wa TRL na taarifa yenye kuchambua hali ya mambo katika kampuni hiyo na mazingira ya kuingiwa kwa mkataba ikiwemo kuwataja hadharani wamiliki halisi wa kampuni ya RITES na washirika waliohusika katika kushinikiza Tanzania kuingia katika mazingira haya yanayotishia uhai wa sekta ya reli, wafanyakazi wake, watanzania wanaotumia usafiri huo, uchumi wa nchi na na hali ya maisha ya wadau wote waotegemea njia hiyo kiuchumi ndani ya Tanzania na nje ya mipaka yetu hususani katika eneo la maziwa makuu.

Imetolewa tarehe 5 Disemba mwaka 2009 na:



John Mnyika
Mkurugenzi wa Mambo ya Nje
0754694553

Tuhuma kuhusu Silaha: Akheri nife nikiwa nimesimama kuliko kuishi nikiwa nimepiga magoti

Leo Tarehe 3 Disemba 2009 nasema: Akheri kufa nikiwa nimesimama kuliko kuishi nikiwa nimepiga magoti. Hii ni kauli ya mwanafalsafa na mwanamapinduzi, maarufu kama Che Guevara. Kauli hii ni muhimu kutakariwa na watanzania leo, tunapoendelea kujadili ripoti ya Kikundi cha wataalamu kilichoundwa na UN katika muktadha wa Orodha ya Mafisadi (list of shame) iliyotolewa na CHADEMA. Ripoti ya muda kikundi cha wataalamu wa UN inaitaja Tanzania ama baadhi ya watanzania kuhusika kwa namna moja au nyingine kuwezesha biashara haramu ya silaha kwenda maeneo ya vita DRC na ujangili wa madini toka maeneo hayo; madini ambayo yametapakaa damu ya mauji wa raia wasio na hatia katika maeneo yenye vita vya wenyewe kwa wenyewe (Blood Minerals). Matukio ndani ya ripoti hii yametokea hivi karibuni, katika kipindi cha utawala wa Rais wa awamu ya nne, kupitia serikali ya chama cha Mapinduzi; Jakaya Mrisho Kikwete.

Wakati wa upande mwingine, Orodha ya Mafisadi inataja ushiriki wa serikali na viongozi wake katika makampuni tata kama Meremeta, Tangold, Deep Green Finnance na mengineyo ambayo yamekuwa yakihusishwa na biashara ya utoroshaji wa dhahabu toka maeneo yenye vita. Ukitazama filamu ya Darwins Nighmare, unaweza kupata picha ya uhusiano baina ya biashara hii na nyinginezo na biashara haramu ya silaha. Taarifa zote mbili: ya Kundi ya Wataalamu wa UN na Orodha ya Mafisadi, tumeziweka kwenye mtandao wa www.chadema.or.tz ili watanzania bila kujali itikadi wazijadili taarifa hizi kwa mustabali mwema wa Taifa letu.


Mkutano wangu na wanahabari, nikiwa ni Mkurugenzi wa Mambo ya Nje na Mahusiano ya Kimataifa wa CHADEMA kumjibu Waziri wa Serikali ya CCM anayeongoza wizara ya sekta yangu, na uamuzi wa kutangaza kwamba suala hili lijadiliwe na umma wa watanzania na wawililishi wa wananchi; hakika kwa pamoja vimeanza kutimiza lengo. Wapo waliopinga, wapo waliounga. Wapo waliotukana, wapo waliosifu. Wapo waliotangaza kuniunga mkono; wapo walionitishia kwamba jambo hili ni hatari. Tuendelee na mjadala; ili tutoke na msimamo wa pamoja kama watanzania badala ya msimamo wa serikali ya CCM ambao unajaribu kufunika kombe mwanaharamu apite bila kujali kwamba mficha maradhi kifo kitamuumbua.

Hivyo, naandika kauli hii kwa tahadhari kubwa ya kizalendo kwa kuwa najua suala hili linagusa kwa namna au nyingine vyombo vyeti na masuala tete yanayoelekezwa kwa nchi yetu yanayogusa jeshi, polisi, usalama wa taifa, chama tawala, serikali yake, na viongozi wake. Mambo ninayoandika pia yanagusa genge la mafisadi na watumiaji vibaya wa madaraka; wengine wakiwa ni wafanyabiashara, wengine wakiwa ni viongozi, wengine wakiwa ni wahalifu waliokubuhu na waasi wenye kufanya mauaji. Haya ni mambo hatari yanayotishia maisha si tu ya mtu mmoja mmoja bali hata amani katika nchi yetu kwa ujumla. Ndio maana nimeikumbuka kauli hii ya Che Guevara; Akheri Nife nikiwa nimesimama kuliko kuishi nimepiga magoti.


Sasa nijibu hoja za waliotaharuki ama kukurupuka tena na kujibu tamko langu nililolitoa kwa niaba ya CHADEMA ili mjadala uendelee kwa manufaa ya taifa letu na dunia kwa ujumla. Pia, nitazigusia hoja za walioniunga mkono mpaka kieleweke.

Waziri Membe amerudia tena tabia yake ile ile ya kutoa kauli bila kufikiria; bila kujadiliana. Yeye ameamua kusema kwamba CHADEMA iache siasa zenye kuichafua Tanzania; itangulize uzalendo. Sasa nani anaichafua Tanzania; kati ya waliofanya ufisadi na/ama kutumia madaraka vibaya na kuitumbukiza Tanzania katika kashfa kama hizi za usafirishaji wa silaha na utoroshaji wa madini kutoka maeneo yenye vita vya wenyewe kwa wenyewe au mtu anayetaka mjadala kuhusu suala hili ili utoke msimamo wa pamoja wa wazalendo wote wenye kukerwa na mambo hayo ili kulirudisha taifa kwenye mkondo unaostahili wenye kulinda heshima ya Tanzania kitaifa na kimataifa? Membe angetaka kutanguliza maslahi ya pamoja ya Tanzania asingekurupuka kutoa kauli ya serikali ya CCM bila kushirikisha umma wa watanzania ama wawakilishi wa wananchi. Membe hana haki ya kusema kwa niaba ya watanzania katika masuala tata bila kupata maoni yetu au ya kambi yetu bungeni. Ndio maana narudia kusema; kila anachokisema ni msimamo wake na serikali ya chama chake; hakiwakilishi msimamo wa watanzania wote, mimi nikiwa mmoja wao. Kama alitaka watanzania tusivuane nguo hadharani; yeye kwa kuwa ndiye yuko kwenye serikali; kabla ya kutoa kauli, walau angeomba ushauri toka kwa wenzake tulio katika upinzani tuliopo kwenye sekta yake, mwanadiplomasia kama yeye anapaswa kujua umuhimu wa maridhiano baina ya viongozi kabla ya kutoka hadharani katika masuala tete ya kitaifa. Ujumbe wangu kwa Membe, mtu mzima akivuliwa nguo; huchutama, watanzania tumevuliwa nguo, tuchutame; yeye amejivua nguo kwa kauli yake, achutame. Narudia tena kutoa msimamo wangu binafsi kuwa niko tayari kwa majadiliano kama watanzania kuhusu suala hili ili tutoke na msimamo wa pamoja kama taifa. Lakini majadiliano yatakuwa na maana kama tu Membe akiacha propaganda nyeusi dhidi ya CHADEMA, ama sivyo nitashindwa kutofautisha kati yake na Waziri wa nchi moja ya Mashariki ya Kati; ambapo majeshi yalikuwa yakikaribia kuingia mji mkuu na ikulu; yeye alikuwa busy kueneza propaganda kuwa ‘sasa adui ndio anakaribia mstari wa kifo’. Matokeo yake yeye na Rais wake waliishia kukamatwa na kufa vifo vya aibu.

Membe ametaka tupeleke ushahidi kwake au tunyamaze; staili ile ile iliyotumiwa na Wazee kama wakina Kingunge mara baada ya Mzee mwenzake Dr Wilbroad Slaa kuanika hadharani Orodha ya Mafisadi(List of Shame). Mzee huyu wa CCM, wakati huo akiwa Waziri wa Nchi Ofisi ya Rais kwenye wizara iliyodumu kwa muda mchache iliyojishughulisha na mahusiano ya kisiasa na kijamii; huku ikiweka kipaumbele katika kazi ya kuwasafisha mafisadi. Kuhoji uzalendo wa wanaotaka watanzania waliotajwa kwenye ripoti ya Kikundi cha Wataalamu kilichoundwa na UN ni sawa na kuwatetea mafisadi ama waliotumia vibaya madaraka yao waliotuhumiwa kwenye ripoti husika. Waziri Membe kwa uzoefu wake wa ukachero naamini anafahamu kabisa kwamba tuhuma za Tanzania kujihusisha na vita vya DRC zilianza toka wakati taifa hili linaasisiwa. Tofauti ya watawala wa sasa ni kwamba uongozi wa Nyerere ulikuwa unasema wazi kuwa unasaidia waasi, na UN inajua. Lakini wakati ule walioitwa waasi ni wazalendo waliokuwa wakipambana dhidi ya watawala wa kidikteta ambao walikuwa ni makuwadi wa ubeberu na ukoloni mamboeleo katika Afrika. Sera ya wakati huo ya mambo ya nje ya Afrika ilikuwa ni kuleta ukombozi Afrika nzima (hata ikiwa ni kwa kuunga mkono vita vya msituni) na kueneza umajumuhi wa kiafrika (Pan Africanism). Ndio maana wanamapinduzi kama wakina Che, na wengine walikwenda DRC kupambana, na serikali ya Tanzania ya wakati huo ilikuwa mstari wa mbele kwenye ukombozi kusini mwa Afrika.

Serikali ya sasa ipo tofauti; kwanza haina msimamo; pili, sera yake ya mambo ya nje haieleweki; tatu, masuala ya sasa ya usafirishaji wa silaha ama utoroshaji wa madini toka maeneo yenye vita ambao yanasemwa kuwa yanafanywa na serikali ama watanzania yanahusu zaidi miradi binafsi ya watu ambayo wanaindesha kwa ama kuzitumia taasisi za kiserikali au kuruhusu mianya kwa kutowajibika kusimamia utawala wa sheria ikiwemo kuheshimu maazimio ya Umoja wa Mataifa (UN) ambayo nchi yetu imetia saini.

Waziri Membe anapaswa kutoa kauli ya kuunga mkono rai yangu niliyoitoa kwenye mkutano wangu na waandishi wa habari Disemba Mosi, 2009: Kwamba wazalendo wote, waliokerwa na Tanzania ‘kuchafuliwa’ na ripoti hiyo ya Kikundi cha Wataalamu wa UN, wanapaswa kuwashinikiza watanzania wote wanaoishi Dar es salaam, Kigoma na kote duniani ambao wametajwa kwenye taarifa hiyo kwa majina yao; wajitokeze kutoa kauli za kusafisha majina yao, tukiridhika na hoja zao, katika utetezi wao; basi na sisi tutajiunga katika kundi la kuwatetea na kuwasafisha. Viongozi na taasisi za serikali zilizotajwa kwa namna moja au nyingine katika taarifa hiyo iwe kwa majina au kwa matukio zijitokeze kuelezea kutajwa kwao; tukiridhika na maelezo yao na vielezo vyao, tutajiunga katika kazi ya kizalendo ya kuwatetea na kuwasafisha. Na hii isiwe kwa taarifa ya UN pekee; iwe pia Orodha ya Mafisadi, katika vipengele vinavyohusiana na Kampuni za Meremeta, Tangold, Deep Green nk. Membe kama mseminari anajua kuwa vitabu vyote vitakatifu na vitukufu vinatamka kwamba haki huponya taifa; kwa hiyo ni ukweli pekee ndio utakaotufanya watanzania kuwa huru dhidi ya kadhia hii.

Nimesoma kauli ya Umoja wa Mataifa (UN) iliyonukuliwa katika vyombo vya habari vya habari; kwamba ripoti ile ‘sio rasmi’ na kwamba ‘wako tayari kuishirikisha Tanzania katika kuifanyia mapitio ripoti husika’. Na kwamba ripoti hiyo isihusishwe moja kwa moja na Sekretariati ya Umoja wa Mataifa, na Mashirika yake; sina tatizo na kauli hizi. Hivyo, watanzania, wanahabari na wachambuzi; wanapaswa kuendelea kuinukuu na kuirejee ripoti hiyo kuwa ni ripoti rasmi kabisa na ya mwisho ya Kundi la Wataalamu iliyoundwa na UN; ripoti hii inaweza kubadilika tu, ikiwa aliyepewa ambaye ni Mwenyekiti wa Kamati ya Vikwazo (Sanctions Committee) atajadiliana na wajumbe wake na kutoa ripoti mbadala. Ama ataipandisha juu zaidi Baraza la Usalama la Umoja wa Mataifa(UN Security Council) ambalo ndio chombo chenye mamlaka ya kutoa maazimio kuhusu masuala hayo. Nilitarajia ripoti kama hii ya ukomavu wa kidiplomasia toka kwa umoja wa mataifa. Kauli hii ya kisiasa yenye kuendana na nadharia ya ‘ukila na kipofu usimshike mkono’ inasadifu maudhui ya Mkataba wa Kuundwa kwa umoja wa Mataifa(UN Charter), Tamko kuhusu Haki za Binadamu(UDHR)- kama vile UN imeamua kumpa mtuhumiwa Benard Membe na serikali yake haki ya kusikilizwa. Kauli hii inaendana pia na Mkataba wa Vienna; ambao Benard Membe aliutumia kulipotosha Bunge kwa kutoa karipio kali kwa mabalozi wa nchi mbalimbali na taasisi za kimataifa kutokuingilia ‘mambo ya ndani’ ya Tanzania kuelekea uchaguzi mkuu wa mwaka 2010. Kauli ambayo iliicha uchi serikali ya Tanzania kuhusu dhamira yake ya kutaka wabaki wenyewe; sijui wanataka kuiba tena kura uchaguzi ujao!.

UN ikiwemo ofisi ya Umoja wa Mataifa hapa Tanzania chini ya mpango wao wa kufanya kazi kwa pamoja kama familia(One UN Programme) inapaswa kuzitafsiri kwa pamoja kauli hizi za serikali ya CCM. UN inabidi itambue kwamba serikali ya CCM ya leo sio ile ya Mwalimu Nyerere ya ukweli na uadilifu. Hivyo UN, inapotafakari matukio ya sasa irejee na matukio ya nyuma, kwani ni UN hii hii imekuwa ikiisifia kupindukia serikali ya CCM kwa demokrasia; imekuwa ikutuma waangalizi wa uchaguzi(Elections Observers) wake na kutangaza chaguzi kuwa huru na haki. Matokeo yake CCM ya kina Membe, imekuwa ikibaki yenyewe; waangalizi wa UN huja mwishoni, na huja maeneo machache; sehemu kubwa ya nchi CCM inabaki yenyewe ikisimamia uchaguzi wenyewe kupitia Tume isiyo huru ya uchaguzi ambayo Makamishna wake wanateuliwa na serikali hiyo hiyo inayoshiriki uchaguzi. Lakini mbaya zaidi; tume hiyo haina watendaji wake huru katika ngazi za kata na majimbo, inatumia watendaji wa serikali walioteuliwa moja kwa moja na serikali yenyewe kama watendaji wa kata na wakurugenzi wa halmashauri. Tume haizingatii kuwa watendaji hawa wamekuwa wakipewa maelekezo na Mawaziri hao hao wa serikali kabla ya uchaguzi kwamba atayeachia eneo lake liende upinzani atakuwa amepoteza ajira yake aliyoteuliwa. Matokeo yake ni CCM kushinda kwa kishindo na hivyo kuwa na hodhi (monopoly) ya chama kimoja bungeni; na hivyo kupunguza uwezo wa kambi ya upinzani kuiwajibisha serikali kikamilifu. Hivyo, wakati tunatafakari ripoti ya Kikundi cha Wataalamu kilichoundwa UN; ni wasaa pia wa UN Tanzania kupitia UNDP kuongeza kasi ya kuisimamia serikali kutekeleza marekebisho ya kisheria na kitaasisi ya kuwezesha uchaguzi wa 2010 kuwa huru na haki. Hii ni kupitia programu yake ya kusimika demokrasia(deepening democracy program) na kusimamia vizuri mfuko wa uchaguzi wa mwaka 2010(UN Basket Fund for Elections).

Kwa upande mwingine, naiomba Ofisi ya Umoja wa Mataifa hapa nchini (UN Tanzania) itoe tamko tena kufafanua yafuatayo kwa kuwa kauli ya UN inaweza kutafsiriwa vibaya na Serikali ama wasioitakia mema Tanzania kufunika mjadala kuhusu ripoti ya Kundi la Wataalamu lililoundwa na UN yenyewe kwa lengo la kusimamia utekelezaji wa maazimio rasmi kabisa ya UN hio hio ambayo Tanzania ni moja ya nchi wanachama.

UN ijibu maswali na kufafanua masuala yafuatayo: Mosi; Je, Kikundi cha Wataalamu kilichoundwa na UN haikuwasilisha ripoti ya mwisho kwa Mwenyekiti wa Kamati ya Vikwazo iliyoundwa kwa azimio la Baraza la Usalama la Umoja wa Mataifa kwa azimio namba 1533 la mwaka 2004 ambalo serikali ya Tanzania inalitambua? Pili; kundi kazi hilo halikupewa jukumu na Umoja wa Mataifa kufuatilia kama nchi wanachama zimetimiza aya ya 5 ya azimio namba 1807 la mwaka 2008 la Baraza la Usalama ambalo limezitaka nchi wanachama za UN ikiwemo Tanzania kuitaarifu kabla(inadvance) kuhusu kusafirishwa kwa silaha na mambo yanayohusiana nayo kwa ajili DRC au msaada wa, ushauri au mafunzo yanayohusiana na operesheni za kijeshi? Je, ni kwa kiasi gani Tanzania imetekeleza azimio hilo kwa kulingisha kati ya taarifa za serikali na tafiti huru zinazofanyika ikiwemo hii ya Kundi la Wataalamu lililoundwa na Umoja wa Mataifa wenyewe.

Je, Umoja wa Mataifa haukulipa Kundi hilo la Wataalamu jukumu la kutoa taarifa kuhusu ukiukwaji wa haki za binadamu uliofanyika ambao ni kinyume na aya ndogo 4(d)(e) na (f) ya Azimio namba 1857 la mwaka 2008 la Baraza la Usalama? Je, ni kwa kiasi gani Tanzania au watanzania wametajwa kushiriki katika vitendo hivyo kwa kurejea taarifa ambazo Tanzania imekuwa ikizitoa ukilinganisha na ripoti ya Kundi la Wataalamu lililoundwa na UN ambalo limeeleza kwamba kuna vitendo vya uvunjaji wa haki za binadamu vimefanyika ambavyo ni kinyume na sheria ya kimataifa ya ubinadamu(International Humanitarian Law).

UN imesema kwamba iko tayari kuishirisha serikali ili kuisuka upya ripoti husika. Sina tatizo na kauli hii ya UN pia. Imetolewa kidiplomasia. Kauli hii haifuti ukweli kuwa ripoti ya mwisho ya Kundi la Wataalamu wa UN imeshatolewa na imeshasambaa; namna ya kuepuka tuhuma zilizotolewa na ripoti ya awali ambayo serikali imeamua kuziita za kizushi zenye nia mbaya ya kuichafua Tanzania. Tafsiri ya kauli hii ya serikali ya Tanzania ni kuwa UN iliunda timu ya wataalamu wa uzushi, wenye nia mbaya ya kuichafua Tanzania: haya ni matusi kwa UN na tuhuma nzito kwa wataalamu hao kwa ubinafsi wao na taasisi wanazoziwakilisha katika kazi hiyo. Haitarajiwi kwamba Kundi la Wataalamu na hata UN yenyewe kwamba wataicha kauli hiyo kupita bila kutolewa kauli. Lazima wote waungane kuweka wazi; tatizo linaweza lisiwe kufilisika kitaalamu kwa UN; kundi lake la wataalamu na taasisi zao; tatizo ni kufilisika kimaadili kwa Membe na serikali yao ya CCM ambao wako tayari kuweka pembeni taaluma zao na wataalamu wao. Na kutoa kauli za kihuni ambazo hazistahili kutolewa katika medani ya diplomasia; tena kuhusu UN, chombo kinachounganisha mataifa yoye duniani ambacho kila kinapotoa taarifa za kuisifia serikali hiyo hiyo ya CCM Membe na wenzake wamekuwa wakiisifu kwa utalaamu wake na wataalamu wake wanaofanya tafiti hizo. Kama Waziri Membe anaamini kwamba UN na timu inazounda zinaweza kuwa ‘unproffessional’ kama alivyoeleza; basi atamke kutilia mashaka ripoti zote ambazo wamekuwa wakizitumia kujisifia, na kutubeza wakosoaji wa taarifa hizo. Halafu anatulazimisha tutangaze kwamba kauli yake hiyo ni ya kulinda ‘maslahi ya taifa’; Membe afafanue ni maslahi gani hayo ya taifa anayoyalinda kwa kauli hiyo ya kihuni? Membe anatakiwa kutuomba radhi watanzania, na kuiomba radhi UN kwa kusema maneno ya kihuni kwa kutumia cheo cha serikali cha uwaziri wake wa mambo ya nje na mahusiano ya kimataifa kwa kuwa mishahara na masurufu anayopata kumwezesha kutoa kauli hizo vyote vinavyotokana na kodi za watanzania wote iwe wanaCHADEMA au hata wasiokuwa na vyama.

Waziri Membe na serikali yao chini ya CCM, wana dalili zote za kulewa madaraka; madaraka hulevya, madaraka zaidi hulevya zaidi. Ndio maana viongozi wa serikali ikiwemo mawaziri wa wizara nyeti kama utawala bora inayosimamia idara ya usalama wa taifa na hata mawaziri wa wizara nyingine muhimu katika nchi yetu, wanamazoea ya kuropoka na kutoa kauli za kebehi na kupuuza hata mambo tete na tata ya kitaifa. Lakini katika hili, nawaomba sana watoe kauli za kujibu hoja kwa hoja kuhusiana na mambo yaliyoibuliwa katika ripoti ya Kundi la Wataalamu wa UN ambayo imetaja masuala yanayogusa wizara zao ama sekta zao; na wajibu tuhuma zenye maelezo na vielelezo kwa kutoa maelezo na vielelezo.

Ndio maana nawakumbusha tena kauli tuliyowaeleza watanzania mwaka 2010; kwamba mabadiliko ya kweli katika taifa letu; hawezi kuletwa na mafisadi wale wale, wa chama kile kile; chenye uoza ule ule wakiendeleza yale yale; kwa ari, nguvu na kasi mpya(Anguka); kwa falsafa ya chukua chako mapema, ya chama cha mafisadi(ccm); Tanzania yenye neema, haiwezekani.

Kosa kubwa la Waziri Membe katika sakata hili ni kulibeba zigo hili kashfa ya Taifa mwenyewe; tuhuma za ripoti hii ya Kundi la wataalamu lililoundwa na UN zitamuelemea. Wakati umefika sasa wa Waziri Mkuu Mizengo Pinda kuwashinikiza Mawaziri wengine ambao sekta zao zimeguswa kutoa kauli za kujibu ama kufafanua hoja zilizoibuliwa ndani ya taarifa hiyo, ambayo Membe alishafanya kosa la kuitumbukiza serikali kwenye malumbano mapema kwa kuliibua suala hili na kuituhumu UN kabla hata Tanzania kufafanua ama kujieleza kwenye Kamati ya Vikwazo.

Mawaziri wote hawa watatu, wameshavuka umri wa ujana kwa mujibu wa sera ya Tanzania ambao umekomea miaka 35; lakini kwa kuwa chama cha zamani CCM na serikali yake inaendelea kuwatambulisha kuwa ni mawaziri vijana, niseme kwamba nawaomba mawaziri hawa watoe matamko ya kina kumjibu kijana ‘mwenzao’ toka chama cha kizazi kipya, CHADEMA. Nawaomba wasinitazame kwa umri wangu, bali wazitafakari hoja zangu ambazo nazitoa kwa nafasi yangu ya kichama; Mkurugenzi wa Mambo ya Nje na Mahusiano ya kimataifa, lakini pia kama raia wa Tanzania ambaye Membe ambaye serikali imetoa kauli kwa niaba yake isiyokubalika.

Mawaziri wawili wanaopaswa kutoa kauli zao za kina kuhusu Ripoti hii ni Waziri wa Ulinzi na Jeshi la Kujenga Taifa; Hussein Mwinyi na Waziri wa Usalama wa Raia; Lawrence Masha.

Hawa wasipojibu hoja; itathibisha kauli yangu niliyoitoa wakati nikifungua Mkutano wa Baraza la Vijana wa CHADEMA Kanda Maalum ya Dar es salaam tarehe 29 Novemba 2009 kwamba kauli ya Rais Kikwete ya kusema kwamba akichaguliwa tena atateua mawaziri wengi zaidi vijana ni kauli inayostahili kutozingatiwa na vijana makini. Nilieleza wazi msimamo wangu kwamba mwaka 2005; Kikwete aliwatapeli vijana kwa kutoa ahadi za ajira kwa vijana na kuwapa fursa vijana kwa kiwango ambacho hajakitimiza mpaka sasa hivyo hakuna sababu ya kumpa nafasi ya pili. Kadhalika niileza kwamba hata vijana wachache aliowateua wengi wao wakiwa ni vijana wa vigogo ndani ya chama hicho hicho kama Tanzania ni nchi ya kifalme ambayo uongozi ni wa kurithi hawana mchango wowote wa maana kwa vijana wenzao na hata kwa taifa. Nikahitimisha kwa kusema wazi, kwa aina hii ya vijana wa CCM; ni afadhali kuwa na Wazee kama Dr Slaa wenye kutoa uongozi bora na kutetea maslahi ya Taifa kuliko vijana hao. Hivyo, nikawataka watanzania kufanya mabadiliko kamili ya utawala ili kuweka madarakani chama cha kizazi kipya, chenye sera mbadala na uongozi bora wa vijana makini wa sasa na vijana mahiri wa zamani(wazee) wenye kukubali mabadiliko.

Pamoja na kuwa Waziri Mwinyi yeye alishatoa kauli fupi ya kukanusha tu kwa ujumla bila kujibu hoja kwa hoja. Pamoja na kuwa natambua kwamba ni muhimu kwa Jeshi letu, kutunza siri za mikakati yetu ya kijeshi. Bado Waziri Mwinyi anawajibu kutoa kauli za ufafanuzi. Waziri Mwinyi ajibu: Je, kwa kuwa Balozi wa Tanzania Burundi ambaye alikuwa ni mmoja wa majenerali wa jeshi, namba yake ya simu imetajwa kutumika kuwasiliana na waasi; JWTZ haina sera ya kuendelea kuwatumia maafisa wake waandamizi wa jeshi wanaoitwa wastaafu, wanaotumwa kwenye nchi zenye vita kama ilivyo DRC kuweza kufanya kwa barokoa ya ubalozi majukumu yanayoyofanana na uambata wa kijeshi? (Millitary attacheship). Kama hivyo ndivyo, anaweza kutuambia ni mawasiliano gani ya kijeshi yalikuwa yakifanyika baina ya namba ya simu ya balozi wetu na makamanda wa vikundi vya waasi DRC hususani FDLR na maswahiba wao ndani FARDC? Kwa kuwa mabalozi wetu kuwasiliana na vikundi vya waasi katika nchi ambazo serikali yetu inatambua serikali zake za kiraia ni jambo lisilokubalika na halina uhusiano wowote na ‘siri kuu za jeshi’ wala ‘maslahi ya taifa’; kwanini nini serikali isituleze mawasiliano yaliyokuwa yakiendelea kama inavyotuhimiwa kwenye ripoti ya kundi la Wataalamu lililoundwa na UN? Kwa kuwa silaha za kivita ni kubwa, sio ndogo kama sindano kiasi kwamba zinaweza kupita bila kuonekana; Waziri waulinzi anazielezeaje tuhuma ya silaha kupitishwa Tanzania ambazo zimeelezwa na Kundi la Wataalamu wa UN kwa maelezo na vielelezo? Anaweza kulieleza taifa silaha hizo zimekwenda nchi gani na kwa makubaliano gani ya kijeshi? Mwisho, kwa kuwa Kamati ya Vikwazo ya UN kuhusu DRC iliundwa toka mwaka 2004; pamoja na kuwa ripoti ya Kundi la Wataalamu wa UN imegusia zaidi miaka ya 2007 mpaka 2009; Waziri anazizungumziaje taarifa zilizozagaa katika mitandao mbalimbali zinazohusisha Meremeta, Tangold; Deep Green na makampuni mengine yaliyosajiliwa kwa majina ya vigogo wa serikali ya awamu ya tatu ambayo yanatajwa kuhusika na biashara haramu za silaha na utoroshaji wa madini toka maeneo yenye vita; kampuni ambazo mojawapo serikali imesema kwamba inahusika na JWTZ? Izingatiwe kuwa CHADEMA ilishaweka msingi wa taarifa hizo kwenye orodha ya mafisadi iliyotolewa 15 Septemba 2009.

Waziri Masha naye avunje ukimya kwa kuwa mjadala huu unaonyesha kwamba usalama wa raia Tanzania upo mashakani?
Jana tarehe 2 Disemba 2009 Jeshi la Polisi nchini limesema kuwa Tanzania haihusiki kwa namna yoyote ile katika kashfa ya kuwapatia silaha waasi wa serikali za mataifa mengine kama ilivyotangazwa na baadhi ya vyombo vya habari.
Mratibu wa Udhibiti wa Silaha hapa nchini Kamishna Msaidizi Mwandamizi (SACP) Dominick Hayuma, amesema kuwa taarifa za Kundi la Wataalamu lililoteuliwa na UN hazina ukweli wowote.
Amesema kuwa Tanzania ina uhusiano mkubwa na serikali za nchi jirani na ndiyo maana majeshi ya polisi katika ukanda wa nchi za Maziwa Makuu na Pembe ya Afrika na zile za kusini mwa Afrika (SADC) zinashirikiana katika masuala ya operesheni kwa lengo la kudhibiti kwa pamoja vitendo vya kihalifu.
Amesema kuwa kuna baadhi ya mashirika ya ndani na nje ya nchi wanakusanya taarifa za uongo kwa lengo la kujipatia fedha ama kuleta uchochezi baina ya nchi moja na nyingine.




Nichukue fursa hii kuwatahadharisha wataalamu wetu wa polisi kutokuingizwa kutoa kauli za kisiasa katika mambo yanayostahili maelezo na vielelezo. Ni vizuri zikatolewa kauli za kisera kuhusu masuala hayo; ushahidi wa kuingia ama kutoka kwa silaha za kijeshi katika nchi yetu niliushuhidia mwenyewe Biharamulo wakati wa uchaguzi wa marudio; katika tukio ambalo nitalizungumzia siku za usoni. Niwaombe polisi ambao tunawalipa kwa kodi zetu, wakae mbali na mijadala ya kisera na ya kisiasa ili kutenganisha kati ya jeshi na propaganda za wanasiasa. Tabia hii ya kutumwa na viongozi wa CCM ndio ambayo inafanya Polisi wetu kushiriki katika kuiba kura na kuhujumu wapinzani wakati wa uchaguzi. Polisi wetu wajue kwamba mishahara midogo wanayolipwa na maslahi duni wanayoyapata ni matokeo ya uongozi mbovu wa serikali hiyo hiyo ya CCM inayofanya waweke pembeni maadili ya taaluma zao; na kuitetea na hata kuipigania nyakati za uchaguzi. Hivyo, polisi ikae mbali na mapambano ya kisiasa baina ya vyama, ikiwemo mapambano ya hoja kwa ajili ya kupata msimamo wa pamoja wa watanzania. Polisi ibaki na jukumu la kusimamia sheria na kuhakikisha kwamba utawala wa sheria unazingatiwa badala ya kukanusha tu bila maelezo na vielelezo ripoti ya Kundi la wataalamu wa UN ambayo imewataja kwa majina watanzania wanatuhumiwa kuvunja sheria lakini polisi haijawakamata mpaka sasa.

Waziri Masha akitoa tamko natarajia atatangaza kutoa maelekezo kwa Mkuu wa Upelelezi wa Makosa ya Jinai (DCI) kuwachunguza watu wote na taasisi zote za Tanzania zilizotuhumiwa kwenye ripoti hiyo likiwemo jeshi la polisi lenyewe. Waziri Masha ajibu maswali na kufafanunua masuala yafuatayo: Je, taarifa ya kwamba polisi waliizunguka meli inayotuhumiwa katika ripoti hiyo ya Kundi la Wataalamu wa UN anaizungumziaje? Je, polisi hao walikuwa wa nchi gani? Kama ni watanzania walikwenda kufanya nini kwa maelekezo ya nani? Aidha ripoti ya Kundi la Wataalamu, inataja kwamba yapo maduka ya masonara yaliyokuwa yananunua madini yaliyotoshwa kutoka DRC? Na kwamba kwa maelezo ya mmojawapo wa wamiliki wa maduka yaliyotajwa kwenye taarifa hiyo alidai kwamba kuna wakati ambapo idara ya uhamiaji iliwahi kuendesha msako dhidi ya wafanyabiashara hao? Je, serikali inayazungumziaje madai hayo? Je, serikali yake iko tayari kuwachunguza raia wote wa kigeni wanaotajwa kwenye ripoti hiyo wanaoishi mpaka sasa Dar es salam, Kigoma na kwingineko katika nchi yetu? Je, Wizara yake inamzungumziaje raia wa DRC aliyetajwa katika ripoti ya Kundi la Wataalamu wa UN kwa jina la Bande Ndagundi, ambaye anatuhumiwa kuishi nchini kwa zaidi ya miaka 27 anayejishughulisha na biashara zinazohusiana na masuala ya kijeshi? Je, Waziri Masha au wawakilishi wake wamewahi kuwasiliana na mtu huyo anayedaiwa kuendelea kuishi Dar es salaam? Ni muhimu kwa Waziri kutoa kauli kuhusu mtu huyu kwa kuwa imeelezwa kwa uwazi ikiwemo kwa yeye mwenyewe kusema kwenye barua zake ikiwemo ile ya tarehe 17 July 2009 kuwa ana mawasiliano ya karibu na viongozi wa juu wa serikali, police, jeshi na chama tawala.

Masuala haya na mengine mengi zaidi nikayoyachambua kadiri siku zinavyokwenda yanapaswa pia UN na Kundi la Wataalamu wake kuiuliza serikali itoe maelezo ya kina wakati wa mapitio ya taarifa husika. Ni utaratibu wa kawaida kwamba ufuatiliaji kama huu uliofanywa kwa kuwa ulihusu Tanzania; serikali itapewa fursa kuandika ripoti ya nchi (country report) kufafanua mambo ambayo yametajwa kabla ya kamati ya vikwazo kufanya maamuzi yake ama kuikubali ripoti husika na mapendekezo yake ama kutoa maelekezo mbadala ya kutaka uchunguzi zaidi katika maeneo ambayo Kundi la Wataalamu limeeleza katika ripoti yake kuwa uchunguzi wake bado haujamilika. Inashangaza kwamba serikali inatumia nguvu kubwa, kubeza ripoti hii na kutishia wanahabari wasiendelee kuandika wakati ripoti imeweka bayana kwamba uchunguzi bado haujakamilika; serikali itaweka wapi uso wake kama uchunguzi zaidi ukaibua uchafu zaidi?

Kwa hiyo nautoa ujumbe huu leo, Tanzania ikiungana na Nchi zingine duniani kuadhimisha siku ya kimataifa ya walemavu, ambao wengine wametoka na vita hususani mabomu ya ardhini(land mines) yaliyotapakaa kila kona ya Afrika; kuomba ujumbe huu usambazwe wote au kwa kunukuliwa sehemu na njia zote za mawasiliano ya umma; iwe ni magazeti, radio, televisheni na TEKNOMA(ICT). Ukiwa hapa nyumbani na umeguswa na ujumbe huu, tuma neno CHADEMA kwenda namba 15710 kwa wateja wa Zain na Vodacom pekee kwa sasa; aidha kwa maoni au ushauri niandikie kupitia mnyika@chadema.or.tz; ruksa kwa waandishi kunukuu sehemu za taarifa hii kwenye habari zao za kesho na ruksa wa wahariri kuchukua taarifa hii na kuitoa yote au maudhui yake kwenye makala siku yoyote ili ujumbe ufike kwa watanzania wengi zaidi mjadala uendelee mpaka tupate msimamo wa pamoja.

Kwa wanahabari, nawaombeni muendelee kuzingatia maadili ya taaluma yenu kufikisha ujumbe huu kwa umma bila ya hofu wala upendeleo (Without favour or fear) kwa maslahi ya Taifa letu. Kwa magazeti nawapongeza Dar Leo, Majira, Tanzania Daima, The Citizen Nk kuandika habari hii baaada ya mkutano wangu na waandishi wa habari pamoja na mbinu nyingi za serikali na maswahiba wake kujaribu kuzuia habari husika. Kwa redio nawapongeza Clouds FM, VOA kupitia Radio Free Africa na East African Radio kwa kuendeleza majadiliano kuhusu taarifa hii. Kwa Kibonde, bado kipindi cha Jahazi mnastahili kutoa ufanuzi mzuri zaidi kwa watanzania, mfano wasikilizaji wenu wamenieleza kuwa mmebeza kuwa Membe hawezi kumjibu Mnyika kwa kuwa ni sawa na Lipuli na Manchester United, lakini kumbukeni kwamba mpira unadunda dakika tisini; hivyo matokeo yatabikiriki. Nirudi kwenye hoja yenu niliyoambiwa mmepotosha kwamba ufisadi wa watu binafsi isihusishwe serikali; tafadhali wapeni ufafanuzi sahihi wasilikilizaji wenu ambao wengi wao ni vijana wenzangu; kwamba huwezi kutenganisha tuhuma zinazohusu viongozi wa serikali na taasisi zake na serikali yenyewe. Jadilini masuala husika kama nilivyoyachambua kwa kirefu katika taarifa hii. Kwa TV, sina ya kupongeza mpaka sasa; kuwa pamoja na baadhi yao kuwepo kwenye mkutano na waandishi wa habari hakuna aliyediriki kutoa hoja mbadala; wakati wote taarifa ambazo zimeendelea kutolewa ni za kipropaganda za serikali na taasisi zake. Nisamehewe kama kuna makosa ya uchapati, nimeitoa taarifa hii tukiwa katikati ya kikao cha Kamati kuu ya CHADEMA ambacho kimekaa hivi sasa kujadili pamoja na mambo mengine Hali ya Kisiasa ikiwemo kashfa hii kwa Taifa.