Kauli kuhusu mauaji na kukamatwa na wabunge Tarime

KAULI YA KATIBU WA KAMBI RASMI YA UPINZANI BUNGENI KUHUSU VITENDO VYA JESHI LA POLISI KWA RAIA NA KUKAMATWA KWA WABUNGE WA CHADEMA

Katibu wa Wabunge wa Kambi Rasmi ya Upinzani inayoongozwa na CHADEMA nalaani vitendo vinavyofanywa na Jeshi la Polisi kwa kusababisha mauji ya raia na kukwepa kufanya uchunguzi kamili na huru kuhusu wahusika wa vifo hivyo na kuingilia haki za msingi za jamaa za marehemu na wananchi wa eneo husika kushiriki katika maziko ya wakazi wenzao na hatimaye kupatiwa haki nyingine zinazostahili kutokana na madhila yaliyotokea.

Aidha nakemea hatua ya jeshi la polisi ya kuwakamata wabunge wa CHADEMA, Tundu Lissu na Esther Matiko wakiwa katika kazi ya kuwatumikia wananchi na natoa mwito waachiwe mara moja; wao pamoja na wote waliokamatwa nao.

Tundu Lissu (Mb) ambaye pia ni Waziri Kivuli wa Sheria na Katiba aliitwa na wahanga wa tukio husika pamoja na chama kwenda kusimamia haki za msingi za familia za marehemu baada ya polisi kukataa kufanya uchunguzi na pia kuminya mazingira ya haki kupatikana.

Akiwa katika kutekeleza wajibu huo, jana (23 Mei 2011) alitaarifiwa na familia za marehemu na wananchi wengine kwamba polisi ina mpango wa kuchukua miili ya marehemu usiku na kuipeleka kusikojulikana na kuombwa kuungana nao katika kuwapa huduma za kisheria katika hatua zote. Aliambatana na familia za marehemu, wananchi na viongozi wa chama kufuatilia suala hilo ndipo alipokamatwa yeye na wengine na kuwekwa rumande kuanzia jana mpaka hivi sasa.

Esther Matiku ambaye ni mbunge wa viti maalum kupitia mkoa wa Mara anayetokea Tarime akiwa katika eneo lake la kazi leo (24/05/2011) alijulishwa na wananchi wa Nyamongo kwamba maiti ambazo walizichukua polisi kwa nguvu zingine wamezitelekeza njiani na kuitwa kwa ajili ya kushuhudia na kuchukua hatua zinazostahili kwa niaba ya wananchi. Akiwa katika kushughulikia suala hilo naye alikamatwa na jeshi la polisi na kuwekwa rumande mpaka hivi sasa.

Ifahamike kwamba matukio ya Nyamongo na Tarime kwa ujumla ni matokeo ya uongozi wa serikali kushindwa kusimamia vizuri sekta ya madini ikiwemo kuacha kuchukua hatua zinazostahili kwa wakati wa miaka kadhaa sasa kutokana na vitendo vya ukiukwaji wa sheria na mikataba vinavyofanywa na kampuni Barick Africa Gold na vile vinavyofanywa na polisi na vya kifisadi vinavyofanywa na viongozi wengine wa kiserikali wanaonufaika na hali hiyo yenye athari kwa wananchi katika maisha yao kutokana na mauji, uchafuzi wa mazingira, upotevu wa mapato ya umma na watanzania wa eneo husika kutokunufaika kwa rasilimali.

Naungana mkono na wananchi na wadau wote waliotoa mwito kufanyika kwa uchunguzi huru wa vifo (inquest) ili hatua stahili ziweze kuchukuliwa na kwa nafasi yangu nyingine kama Waziri Kivuli wa Nishati na Madini nitatoa tamko karibuni lenye kueleza kwa kina udhaifu wa serikali ulivyosababisha mauji hayo na kutaka wahusika akiwemo waziri kuwajibika.

Aidha, kwa mara nyingine narudia tena kutoa pole kwa familia za marehemu ambao wanapitia kipindi kigumu wakati huu kutokana na matukio yanayoendelea; Mwenyezi Mungu awape uvumilivu wa kusimamia haki na ukweli kwa mustakabali wa taifa.

Imetolewa tarehe 24 Mei 2011 na:

John Mnyika (Mb)
Katibu wa Kambi Rasmi ya Upinzani
Na Wabunge wa CHADEMA

Mbunge afanya ziara ya Mtaa kwa Mtaa

Mbunge wa Ubungo, John Mnyika ambaye pia ni Mwenyekiti wa CHADEMA katika Mkoa wa kichama wa Kinondoni amefanya ziara ya kichama katika kata za Mabibo na Manzese jana (22/05/2011) kwa lengo kujenga oganizesheni ya chama ngazi ya chini.

Katika ziara hiyo Mnyika ameingiza wanachama wapya na kufungua misingi/matawi ya chama katika mitaa mbalimbali ya kata hizo sambamba na kuzindua ofisi za chama katika maeneo hayo.

Katika ziara hiyo Mnyika akiambatana na viongozi wa chama na wanachama wa chama hicho walitembea kwa miguu katika nyumba mbalimbali kuwashukuru wananchi kwa kumchagua na kufuatilia masuala ya kimaendeleo.

“ Pamoja na kuwa baada ya uchaguzi nilifanya mikutano ya hadhara ya kiserikali kwa ajili ya kuwashukuru; nimekuja kwenu leo kwa kuwa niliahidi kwamba mkinichagua nitarudi kwa njia ile ile niliyopitia kuomba kura ili kuwashukuru na kushirikiana nanyi kutimiza wajibu”, alisema Mnyika.

Akihutubia wananchi wakati wa uzinduzi wa ofisi ya CHADEMA katika kata ya Mabibo Mtaa wa Jitegemee, Mnyika alieleza manufaa ya kuchagua vyama mbalimbali katika kuleta uwajibikaji kwa kuwa kwa mara ya kwanza halmashauri ya Kinondoni imeweza kutenga bilioni tano katika bajeti ya mwaka wa fedha 2011/2012 kwa ajili ya matengenezo ya barabara.

Mnyika alisema kwamba jumla ya shilingi milioni 595 zimetengwa kwa ajili ya matengenezo maalum ya Barabara ya kutoka Mburahati mpaka Mabibo eneo la Chuo Cha Usafirishaji (NIT) na kuahidi kuendelea kushirikiana na madiwani kuondoa kasoro nyingine zilizobainika katika bajeti iliyopitishwa.

Akizindua ofisi ya chama kata ya Manzese Mnyika alieleza umuhimu wa kuwa chama thabiti kwa ajili ya kusimamia vizuri utendaji wa serikali na viongozi wa kuchaguliwa na wananchi.

“ Hayati Mwalimu Nyerere aliwahi kusema kwamba chama legelege, huzaa serikali legelege. Ombwe la kiungozi lililopo kwenye serikali hivi sasa katika ngazi mbalimbali ni ishara ya udhaifu wa chama kinachotawala; CHADEMA lazima ionyeshe tofauti katika kuwawajibisha viongozi wake waweze kuutumikia umma ipasavyo”, alisema Mnyika.

Mnyika alisema CCM inazungumza kujivua gamba lakini bado mafisadi wanakumbatiwa ndani ya serikali na pia serikali inashindwa kushughulikia kikamilifu kero za wananchi kama maji na kupanda kwa gharama za maisha wakati kodi za wananchi hazitumiwi vizuri.

Mnyika alisema kwamba ofisi hiyo ya chama isifanye tu kazi za kuhudumia wanachama bali izibe pengo pale wananchi wanapokwenda kuwasilisha malalamiko yao kwa ofisi za kiserikali lakini hatua stahili hazichukuliwi kwa wakati.

“ Wajibu wenu uwe ni kuunganisha nguvu ya umma, nimetembelea mitaa mbalimbali ya Manzese na kukutana vioski vingi vya Kampuni ya Maji Dar es Salaam (DAWASCO) havitoi maji na sehemu kubwa ya miundombinu ya maji iliharibiwa wakati wa utekelezaji wa mradi wa ujenzi wa barabara na haikurejeshwa. Viongozi wa ngazi ya chini wa kiserikali hawajafuatilia kero hii kwa muda mrefu; hivyo ni wajibu wenu kuwasukuma na mkikwama mtaarifu ngazi za juu kwa hatua zaidi”, alieleza Mnyika.

Akihutubia Mkutano wa hadhara katika Mtaa wa Chakula Bora kata ya Manzese ikiwa ni sehemu ya kuhitimisha ziara hiyo Mnyika aliwaeleza wananchi hatua ambayo amefikia katika kutekeleza ahadi ya kuwawakilisha wananchi kwa kuweka kipaumbele katika masuala ya elimu, ajira, maji, maji, miundombinu, uwajibikaji, usalama, ardhi na afya katika kipindi cha miezi mitano toka achaguliwe na kuahidi kuendelea kuwashikirisha wananchi katika kila hatua atakayofikia.

“ Kuanzia wiki hii tunaanza vikao vya kamati za bunge mpaka mwezi Juni mwanzoni ambapo mkutano wa bunge utaanza rasmi, na hili ni bunge muhimu la bajeti hivyo kuna mambo mengi zaidi itakwenda kuwawakilisha katika mkutano huo na nawashukuru kwa hoja mbalimbali ambazo mmenitaka niziwekee mkazo”, alisema Mnyika.

Imetolewa tarehe 23 Mei 2011 na:

Aziz Himbuka
Katibu Msaidizi
Ofisi ya Mbunge Ubungo

Tamko kuhusu Umeme

TAMKO LA WAZIRI KIVULI (MSEMAJI WA KAMBI RASMI YA UPINZANI) WIZARA YA NISHATI NA MADINI JUU YA MASUALA, MATUKIO NA MWELEKEO WA SERIKALI KUHUSU UMEME KATIKA KIPINDI CHA MWEZI MEI

Utangulizi

Katika kipindi cha Mwezi Mei yameibuliwa masuala na wadau mbalimbali na zimetolewa kauli kadhaa na serikali kuhusu umeme.

Baadhi ya masuala na matukio hayo ni pamoja na kuanza kwa mgawo mkubwa wa umeme, kutokutekelezwa ipasavyo kwa hatua za dharura za kuongeza uzalishaji wa umeme, tuhuma za ufisadi katika sekta husika na masuala mengine kuhusu umeme yenye kuathiri uchumi wa taifa na maisha ya wananchi hususani wa kipato cha chini.

Kambi ya Upinzani inayoongozwa na Chama Cha Demokrasia na Maendeleo (CHADEMA) kupitia kwa Waziri Kivuli wa Nishati na Madini imekuwa ikifuatilia kwa karibu matukio na kauli hizo na kubaini kwamba serikali kupitia Wizara husika ya Nishati na Madini haijawajibika ipasavyo kuchukua hatua stahili au kutoa mwelekeo wenye matumaini kwa watanzania hususani katika masuala yafuatayo:

Kuhusu mgawo wa umeme unaotokana na upungufu wa gesi:

Nchi iko katika mgawo mkubwa hivi mpaka tarehe 26 Mei 2011 kwa kile kilichoelezwa ni kutokana na kampuni ya uzalishaji wa gesi asilia ya Songo Songo ya Pan African Energy Tanzania Limited ambayo imetangaza kutosambaza gesi katika kipindi hiki kwa ajili ya ukaguzi na ukarabati mkubwa wa mitambo ya gesi. Hali hii imetokana na mamlaka husika kutokuwajibika ipasavyo kwa kuwa matengenezo haya yalifahamika kwa serikali kuanzia mwishoni mwa mwaka 2010 na mwezi Februari 2011 suala hili lilijadiliwa ndani ya serikali lakini hatua stahili hazikuchukuliwa kwa wakati kufanya ufuatiliaji na udhibiti uliohitajika.

Kumekuwepo tuhuma za muda mrefu kwamba kampuni ya Pan African imekuwa haifanyi matengenezo ya ukamilifu na kwa wakati hata hivyo Wizara inayohusika haikueleza hatua ambazo zimechukuliwa hali ambayo imeongeza hitaji la matengenezo makubwa kwa wakati mmoja yaliyosababisha gesi kutokusambazwa na kuleta upungufu wa umeme wa kati ya MW 200 mpaka 359 katika kipindi husika. Kwa kuwa serikali ilifahamu mahitaji ya matengenezo hayo miezi mingi kabla ingeweza kuweka mfumo wa uhifadhi wa gesi kwa ajili ya kuepusha hasara ambayo inalikumba taifa hivi sasa. Aidha serikali imekuwa pia ikifahamu kuhusu tatizo lingine la kutopanuliwa ipasavyo kwa miundombinu ya kusafirisha gesi (re rating) kunakopaswa kufanywa na kampuni ya Pan African.

Hali hii ya utegemezi wa serikali kwenye sekta ya gesi kwa makampuni yenye mwelekeo wa udalali imesababisha hasara kwa serikali lakini ina mwelekeo pia wa kuhatarisha usalama wa nchi katika siku za usoni kama hatua stahili hazitachukuliwa; hivyo Mamlaka ya Udhibiti wa Nishati na Maji (EWURA) inapaswa kuchunguza hali hiyo na kuchukua hatua stahili. Aidha Serikali inapaswa kupitia upya mikataba na makampuni ya Songas, Pan African na Shirika la Maendeleo ya Petroli (TPDC) ili kuondoa migongano na kupunguza mzigo kwa taifa wakati gesi asilia ni mali asili ya watanzania sanjari na kupanua wigo wa usafirishaji wa gesi katika mwaka wa fedha 2011/2012.

Kuhusu kusuasua kwa hatua za dharura za kupunguza upungufu wa umeme:

Kwa upande mwingine, natahadharisha kwamba mgawo mkubwa na wa muda mrefu utalikumba taifa kuanzia mwezi Julai 2011 kutokana na hatua za dharura kutochukuliwa kwa wakati. Pamoja na Serikali kushikilia msimamo wa kukodi mitambo ya umeme wa MW 260 ambayo itatumika kwa kipindi cha miezi sita pekee kwa gharama za zaidi ya bilioni 400 badala ya kuweka mkazo katika kununua mitambo kama ambavyo imeshauriwa na wadau mbalimbali; Wizara ya Nishati na Madini haijawajibika kwa kiasi cha kutosha kuhakikisha nchi haikumbwi na mgawo katika kipindi husika.

Mchakato wa kutekeleza mpango wa dharura umecheleweshwa na hivyo kuna hatari ya mitambo hiyo kuwa tayari kutoa huduma mwezi Januari katika kipindi ambacho haihitajiki na kusababisha hasara kwa taifa kama ilivyokuwa kwa mitambo ya Richmond/Dowans.

Hivyo, serikali inapaswa kutangaza kusitisha mara moja mpango huo na kuelekeza fedha hizo za umma katika hatua za dharura za kununua mitambo ya kudumu; kinyume na hapo itathibitika kwamba kuna mazingira ya ufisadi katika mpango huo wenye kutaka kuongeza mzigo wa madeni kwa TANESCO na gharama za umeme kwa wananchi wa kawaida.
Izingatiwe kwamba madhara na hasara yote ambayo wananchi, sekta binafsi na serikali imekuwa ikipata kuanzia mwezi Februari mwaka 2011 mpaka Disemba 2012 kwa kipindi cha takribani mwaka mzima inatokana na kutokuwajibika kikamilifu kwa mamlaka husika kwa kuwa dharura ilifahamika toka mwaka 2008 na serikali ikapanga kwamba utekelezaji wa miradi ya MW 60 wa kutumia mafuta mazito Mwanza na Mradi wa MW 100 wa kutumia gesi asilia Ubungo, na wa MW 200 Kiwira ilipaswa kukamilika Februari 2011; hata hivyo kutokana na uzembe na ufisadi sasa miradi hiyo itakamilika 2012/2013.

Hivyo, serikali kupitia TANESCO na kwa kushirikiana na sekta binafsi iweke mazingira wezeshi ya kisheria, kikanuni na kibajeti msingi wa utekelezaji wa miradi ya Kiwira (MW 200), Somangafungu (MW 230), Mnazi Bay (MW 300), Kinyerezi (MW 240), maporomoko ya Ruhudji (MW 358) ili ianze kwa haraka zaidi kwa mwaka wa fedha 2011/2012 tofauti na kusubiria mpaka mwaka 2013/2014 kama serikali inavyopanga hivi sasa.

Kuhusu tuhuma za ufisadi katika manunuzi kwa ajili ya miradi ya umeme:

Mpaka sasa serikali haijawajibika ipasavyo kushughulikia tuhuma za ufisadi katika ununuzi wa mafuta mazito ambayo Waziri wa Nishati na Madini alieleza bungeni tarehe 6 Aprili 2011 kwamba zimetumika bilioni 46 kwa ajili ya kuendesha mitambo ya kufua umeme ya IPTL. Hata hivyo, mwezi Mei Wizara ya Nishati na Madini kupitia taarifa nyingine imesema kwamba fedha zilizotumika kwenye ununuzi wa mafuta katika kipindi husika ni bilioni 28; bila kueleza sababu za kutofautiana kwa maelezo ya waziri bungeni na haya yaliyotolewa sasa na Waziri. Wakala wa Usajili Ufilisi na Udhamini (RITA) ulishatoa tamko kwamba pamoja na RITA kusimamia IPTL hawana mamlaka, fedha hazipitii kwao na kwamba hata taratibu zote za manunuzi na maamuzi mazito hufanywa na serikali kuu. Wizara ya Nishati na Madini ilipaswa kutoa maelezo kuhusu tuhuma hizo na iwapo Taasisi ya Kuzuia na Kupambana na Rushwa (TAKUKURU) imeanza kuzichunguza. Kutokana na hali hiyo, Kamati ya Nishati na Madini inapaswa ifanye uchunguzi maalum kama ilivyoombwa na Zitto Kabwe (Mb) ambaye pia ni Mwenyekiti wa Kamati za Hesabu za Mashirika ya Umma.

Pia pamekuwepo malalamiko mbalimbali kuhusu mazingira ya kupitishwa kwa zabuni za ununuzi wa nguzo, transforma na nyaya za umeme kwa kiwango kikubwa toka nje ya nchi huku viwanda vya ndani mathalani TANALEC ABB, East African Cables (hususani kampuni tanzu ya Tanzania Cables) na vingine vikididimia. Hali hii imesababisha pia kukwama kwa utekelezwaji wa miradi mbalimbali ya kusambaza umeme kutokana kwa kile kinachoelezwa kuwa ni vifaa kutokupatikana kwa wakati toka nje ya nchi.

Hitimisho:

Hivyo kutokana na hali hiyo; kama sehemu ya kutekeleza wajibu wa kibunge wa kuisimamia serikali tamko hili linatolewa kutaka Wizara ya Nishati na Madini hususani Waziri wake William Ngeleja (Mb) kuwajibika kutokana na athari za kutochukua hatua kwa wakati na Rais Jakaya Kikwete akiwa ndiye Mwenyekiti wa Baraza la Mawaziri kueleza kwa umma hatua ambazo serikali yake inakusudia kuchukua kurekebisha hali hiyo ikiwemo kuwachukulia hatua kwa wanaohusika. Rais Kikwete alishatembelea Wizara na kutoa maagizo na akarudia tena maagizo yale yale kwa kutumia mamilioni ya walipa kodi kupitia semina elekezi; kinachotakiwa hivi sasa sio maagizo tena bali ni mkuu wa nchi kuchukua hatua. Aidha iwapo tamko hili halitazingatiwa maelezo na vielelezo zaidi vitawasilishwa kwenye vikao vya kambi rasmi ya upinzani na hatimaye masuala husika na mengine zaidi yataibuliwa bungeni kwa ajili ya wahusika kuwajibishwa na pia vipaumbele kuzingatiwa kwenye bajeti ya mwaka wa fedha 2011/2012.

Imetolewa tarehe 22 Mei 2011 na:

John Mnyika (Mb)
Waziri Kivuli (Msemaji wa Kambi Rasmi ya Upinzani)
Wizara ya Nishati na Madini

Mbunge atoa rambirambi msiba wa msanii

Mbunge wa Ubungo, John Mnyika amesema kuwa amepokea kwa masikitiko makubwa taarifa ya kifo cha Mkurugenzi wa kikundi cha maigizo na filamu cha Jakaya Theatre Arts.

Mnyika aliyasema hayo jana (15/05) alipotembelea nyumbani kwa familia ya marehemu katika kata ya Ubungo Jijini Dar es salaam kwa ajili ya kuwasilisha rambirambi.

Akizungumza na mbunge, Chediel Senzighe ambaye ni kaka wa marehemu na mmoja wa wasanii wa kundi hilo anayefamika kwa jina la kisanii kama “Kakoba Chapombe” alisema kwamba marehemu alifikwa na mauti katika ajali iliyotokea juzi eneo la Kimara Resort baada ya kontena la lori la mizigo kuanguka kwenye kituo cha basi.
Chediel ameeleza kuwa maziko ya Thomas Senzighe yanatarajiwa kufanyika kesho na kwamba mwili wa marehemu utaagwa Ubungo eneo la Gide.

Kwa upande mwingine Mnyika amesema kwamba marehemu Thomas Senzighe ameacha pengo katika medani ya sanaa kwa kuwa alikuwa mhimili nyuma ya mafanikio ya kikundi hicho ambacho kimeonyesha maigizo mbalimbali kupitia kituo cha luninga cha ITV mathalani ‘Taharuki’, ‘Kivuli’, ‘Mwiba’ na ‘Kovu la Siri’

Mnyika alisema kwamba mara ya mwisho kuwasiliana na marehemu alimjulisha kwamba wanaandaa filamu na kwamba pamoja na filamu marehemu amekuwa akijishughulisha na kazi za lugha ya Kiswahili kupitia tovuti www.swahilicenter.com.

Imetolewa tarehe 16 Mei 2011

Mbunge ahimiza Wananchi Kwembe kushiriki Mkutano wa Maji

Mbunge wa Ubungo, John Mnyika anahimiza wakazi wa Mtaa wa Kwembe kuitikia mwito wa Kamati ya Maji ya Mtaa huo kujitokeza kwa wingi katika mkutano wa watumiaji wa maji wenye kulenga kuunganisha nguvu katika kukamilisha utekelezaji wa miradi ya kuwezesha maji kupatikana katika maeneo yao.

“Nimepokea taarifa ya katibu wa Kamati Joyce Manyerere kuwa Mkutano utafanyika siku ya Jumamosi tarehe 21 Mei 2011 saa nane mchana katika ofisi ya Mtaa wa Kwembe; nahimiza wananchi husika kuitikia mwito huo”.

Manyerere ameeleza kwamba ufungwaji wa mashine mpya ya kusukuma maji yenye uwezo wa kusukuma Lita 90,000 za maji kwa saa moja katika mradi wa maji safi ya bomba katika Mtaa wa Kwembe, Kata ya Kwembe Manispaa ya Kinondoni umekamilika na majaribio ya kusukuma maji kutoka bomba kuu la Ruvu kuanza rasmi.

Kukamilika kwa kazi hiyo kumefanya Mtaa huo kupata ufadhili mwingine wa kujengewa tanki la kuhifadhi na kusambaza maji kupitia vituo vitano chini ya ufadhili wa mradi wa “Maji Yetu” unaofadhiliwa na Jumuia ya Ulaya (EU) na Belgian Technical Cooperation (BTC). Ujenzi wake unatarajiwa kuanza hivi karibuni.

Aidha Shule 3 ikiwemo moja ya Msingi, mbili za Sekondari pamoja na zahanati ya Mtaa wa Kwembe vinatarajiwa kupata ufadhili wa kujengewa miundombinu ya kuhifadhi maji kutoka Shirika la SAWA mara tu baada ya maji safi ya bomba kuanza kutiririka Mtaa wa Kwembe.

Ili kukamilisha miradi yote hii watumiaji wote wa maji safi ya bomba ambao ni pamoja na wakazi wote wa Mtaa huo, wenye viwanja na mashamba katika Mtaa wa Kwembe watakuwa mkutano wa watumiaji maji utakaofanyika Jumamosi Tar 21 Mei 2011, saa nane mchana katika Ofisi ya Serikali ya Mtaa Kwembe.

Ajenda za mkutano huo ni pamoja na:- Kutambua na kuwaorodhesha wahitaji wa huduma ya maji safi ya bomba katika Mtaa wa Kwembe; Kupanga utaratibu wa usambazaji wa vituo vya maji na mabomba binafsi; Kujadili na kupitisha mchakato wa kuanzisha Umoja/Kampuni ya Watumiaji Maji Mtaa wa Kwembe.

Mkutano huu unafuatia wa awali ambao ulifanyika tarehe 30 Januari 2011 ambapo Mbunge Mnyika alihudhuria na kushirikiana kwa hali na mali katika jitihada za kutatua kero ya maji.

Katika mkutano huo wa kwanza ilibainika kwamba mradi wa maji Kwembe ulichangiwa na washirika wa kimaendeleo mwaka 2000 lakini maji hayatoki kutokana na kutokamilika kwa mradi katika kipindi cha takribani miaka kumi toka fedha za mradi huo zitolewe kwa pamoja na mambo mengine kukosekana nguvu ya wananchi.

Baadhi ya sababu nyingine ni pamoja na kampuni iliyotekeleza mradi huo kutaka marekebisho kadhaa yafanyike katika mfumo wa mabomba yanayounganisha tanki na kupokea na kupokea maji kutoka bomba kuu na pampu kabla ya kuwashwa.

Kamati ya maji ilianisha vifaa vinavyohitajika kuwa ni kuondoa kona kali la kupokea maji toka bomba kuu, kufunga vifaa vya kulinda mashine isiharibike pamoja na vifaa vingine na hatimaye mbunge na wananchi wengine walichangia sehemu ya gharama za vifaa hivyo.

Chanzo: Aziz Himbuka (20/05/2011)

Matengenezo barabara ya Mbezi Makabe kuanza

Mbunge wa Ubungo, John Mnyika amesema kwamba matengenezo maalum ya barabara ya Mbezi mpaka Makabe kupitia Lubokwe na mji mpya yataanza mwezi huu mara baada ya kupungua kwa mvua zinazoendelea hivi sasa.

Mnyika aliyasema hayo juzi (8/5/2011) akizungumza katika mkutano wa wananchi wa Mtaa wa Mbezi Luis uliofanyika katika eneo la Kona ya Miembesaba.

Mnyika amesema matengenezo hayo ambayo yanatarajia kugharimu takribani milioni 170 yametokana na malalamiko ya muda mrefu ya wananchi wa Mbezi Makabe kuhusu ubovu wa barabara hiyo.

Kwa upande mwingine, Mwenyekiti wa Kamati ya Ujenzi wa Barabara Mtaa wa Mbezi Luis, Samwel Kirama alimshukuru mbunge kwa kushiriki katika mkutano huo na kumweleza kwamba fedha kutoka mradi wa TASAF awamu ya pili cha shilingi milioni 28 zimeingizwa katika akaunti ya mradi kwa ajili ya ujenzi wa barabara nyingine katika eneo hilo.
Kirama alisema kwamba fedha hizo zitatumika kufanya ukarabati wa barabara ya Mazulu mpaka Kwa Kidevu kupitia Miembesaba kwa kiwango cha changarawe pamoja na kuweka mifereji ili barabara iweze kupitika katika vipindi vyote.

Mkutano huo uliazimia kwamba ramani ya ujenzi wa barabara hiyo ijulikane kwa wakazi wote ili kutoa ushirikiano katika maeneo ambayo yanagusa miti na kuta kutokana na ujenzi holela.

Aidha mkutano huo wa wananchi ulikubaliana kwamba tathmini ya maeneo ya barabara ya mbele ya mradi huo iendelee ili kuweza kujua mahitaji kwa ajili ya kutafuta vyanzo mbadala kwa kadiri iwezekanavyo.

Diwani wa Kata hiyo, James Kajale aliahidi kufuatilia Manispaa ya Kinondoni kuhusu uwiano kati ya matumizi nguvu kazi na suala la ufanisi wa utekelezaji wa mradi ili hatua za ujenzi zianze mapema.

Chanzo: Aziz Himbuka

Hoja Binafsi kuhusu Kituo Ubungo (UBT)

Utangulizi
Kituo Kikuu cha Mabasi Ubungo (UBT) kilifunguliwa rasmi tarehe 6 Desemba 1999 pamoja na mambo mengine uanzishwaji wa kituo hiki ulikuwa na dhumuni la kutoa huduma kwa wasafiri pamoja na watumiaji wengine na pia kuongeza mapato ya Halmashauri ya Jiji la Dar es Salaam.

Katika kipindi cha kati ya mwaka 2004 mpaka 2008 tumeibua tuhuma mbalimbali za ufisadi na upotevu wa mapato katika Kituo hicho zikiwemo zinazohusu Kampuni ya Smart Holdings ya Familia ya Kingunge Ngombare Mwiru; hata hivyo katika kipindi chote zimekuwa zikikanushwa na serikali na chama kinachotawala.

Hatimaye Tarehe 15 Machi 2009 Waziri Mkuu Mizengo Pinda aliagiza ufanywe uchunguzi maalum (Special Audit) na Mdhibiti na Mkaguzi Mkuu wa Hesabu za Serikali (CAG) kuhusu makusanyo ya Kituo Kikuu cha Mabasi cha Ubungo (UBT) ili kuboresha mapato ya Halmashauri ya Jiji la Dar es Salaam.

Tarehe 28 Julai 2009 Mdhibiti na Mkaguzi Mkuu wa Hesabu za Serikali, Bw. Ludovick Utoh, alikabidhi ripoti hiyo kwa Waziri Mkuu ambayo pamoja na mambo mengine ilieleza kasoro za ukusanyaji wa ovyo na tuhuma za ubadhirifu wa mapato ya Kituo Kikuu cha Mabasi cha Ubungo.

Kutokana na matatizo ya kiuendeshaji na kiutawala yaliyoripotiwa katika tarifa za Mkaguzi na mdhibiti wa fedha za serikali pamoja na taarifa zingine kuhusu kituo kutofanyiwa kazi kwa ukamilifu Nawasilisha hoja binafsi kwa mujibu wa Kanuni ya 19 (1) na (5) ya Kanuni za kudumu za Halmashauri ya Jiji la Dar es Salaam ( ambayo katika hoja hii itajulikana kwa upande mwingine kama Halmashauri) ambayo mimi ni mjumbe ili hatua stahili ziweze kuchukuliwa.

Maelezo ya Hoja
Kutokana na ukaguzi maalumu uliofanywa na Mkaguzi na Mdhibiti Mkuu wa hesabu za serikali mambo yafuatayo yalibainika;

• Kuwa Halmashauri iliingia mkataba na kampuni ya M/s Smart Holding kama wakala wa kukusanya mapato katika kituo cha mabasi Ubungo. Kutokana na mkataba huo kampuni tajwa ilitakiwa kuilipa Halmashauri kiasi cha shilingi 1,500,000 kwa siku kwa mapato ya magari yanayoingia kwenye kituo pamoja na tozo ya ulinzi wa magari yaliyokuwa yakiegeshwa na ada ya kuingia. Hata hivyo baada ya ukaguzi uliofanywa uligundua kuwa kiasi cha shilingi 4,618,629 ilikuwa ni mapato ya kila siku ukilinganisha na kiasi kilichopo kwenye mkataba huo ambacho Halmashauri ilikuwa ikipokea.

• Kuwa ilibainika kuna upangishaji holela wa majengo ya biashara bila idhini ya mmiliki. Kwa mfano mpangaji alilipa kiasi cha shilingi 130,000 kwa mwezi kama kodi kwa mmiliki wakati mpangaji alikuwa anapata mapato ya kiasi cha shilingi 600,000 kwa kupangisha watu wengine (subletting).

• Kuwa kiasi cha shilingi 146,692,226 zilikusanywa na wakusanyaji wa mapato lakini mapato hayo hayakupelekwa benki.

• Kuwa Halmashauri iliingia mkataba na wafanyabiashara ndogondogo 100 kuendesha shughuli za biashara ndani ya kituo bila kuainisha maeneo au majengo ambayo watayatumia kwa shughuli zao.

• Kuwa Halmashauri iliingia mkataba wa miaka 14 na M/s Riki Hill Hotel na mkataba utaisha Julai 20 mwaka 2023; hata hivyo mapitio ya makubaliano hayo yanaonyesha mapungufu yafuatayo;

i. Mkataba ulisainiwa miaka miwili baada ya shughuli kuanza.

ii. Mkataba ulisainiwa na Mkurugenzi wa Halmashauri na sio Mstahiki Meya kama ambavyo taratibu zinataka.

iii. Uongozi wa Halmashauri ulishindwa kutoa nyaraka za kwa namna gani mkodishwaji huyo alivyopatikana na pia mkodishwaji alikuwa anatumia eneo kubwa kuliko ilivyokuwa ikionekana katika mkataba.

• Kuwa Halmashauri iliingia mkataba na kampuni ya M/s Abood Bus Service kupanga katika eneo la 2070 sqm kujenga na kutumia na badae kulitoa jengo kwa mmiliki na kutakiwa kulipa 500,000 kwa mwezi; hata hivyo mapungufu yafuatayo yalionekana:

i. Hakuna ushahidi wa kimaandishi uliotolewa kwa wakaguzi kuthibitisha kiasi cha shilingi 44,220,660 kama gharama za ujenzi.

ii. Hakuna nyaraka iliyoonyesha jinsi mkataba wa ukodishwaji ulivyopatikana.

iii. Mkataba haukuonesha eneo ambalo lilipaswa kuendelezwa.

iv. Hakuna vigezo vilivyotolewa kuhalalisha malipo ya shilingi 500,000 kwa mwezi kwa eneo hilo.

• Kuwa uongozi wa kituo cha Ubungo kwa makusudi kabisa ulibadilisha kiwango cha upangaji cha shilingi 6,000 kwa futi za mraba 784.08 hadi shilingi 5,000 ambazo zilitakiwa kulipwa na kampuni ya M/s Clear Channel, kiwango ambacho kilitakiwa kutozwa kwa kampuni ya Bill Board advertisement kinyume na kiwango kilichowekwa na Kanuni za Halmashauri ya Jiji ya 1997 na hivyo kusababisha hasara ya kiasi cha shilingi 3,920,420 kwa Halmashauri kwa miaka mingi mfululizo.

• Uongozi wa Halmashauri kwa makosa yao wenyewe ya kivipimo ulisababisha kushuka kwa kiwango cha mapato kiasi cha shilingi 74,529,840 kwa miaka miwili kuanzia Julai 2007 hadi Juni 2009.

• Kuwa katika mkataba kati ya Halmashauri na kampuni ya M/s Globe Accountancy Services (wakala) ili kukusanya mapato kwa niaba ya Halmashauri kwa miaka mitatu kutoka tarehe 5/10/2001 hadi 4/10/2004 bila ushahidi wowote wa kimaandishi kuonyesha kuwa taratibu zote za kitenda zilifuatwa na pia taratibu za manunuzi hazikufuatwa.

• Kuwa hakuna utaratibu uliozingatiwa katika kuwapa mikataba M/s Scandnavia Express Service ltd, Riki Hill Hotel, Kiwembo Motors na Smart Holding kama wakala wa kukusanya mapato, na pia nyaraka kwa ajili ya ukaguzi hazikuweza kutolewa.

• Pamoja na mambo mengine kampuni ya Smart Holding kama wakala wa kukusanya mapato ilitumia vitabu vya risiti ambavyo ni vigumu kwa Halmashauri kudhibiti na hivyo kuwa vigumu kugundua kiasi cha mapato walichokuwa wanakusanya.

• Kuwa kampuni ya Scandnavia ilikuwa haina mkataba rasmi na Halmashauri katika eneo walilokuwa wanalitumia na pia kampuni haikulipa kiasi cha shilingi 236,486,400 kuanzia Septemba 2005 hadi Mei 2009 kama ilivyotakiwa.
Pamoja na mapungufu hayo yaliyoelezwa na taarifa ya Mkaguzi Mkuu wa Hesabu za serikali; yamejitokeza pia masuala mengine katika kipindi cha kati ya mwaka 2009 mpaka 2011 yanayohitaji kushughulikiwa:

• Hata hivyo mnamo tarehe 30 Oktoba 2010 Halmashauri ilisaini mkataba na kampuni ya Konsad Investments Limited kwa ajili ya kukusanya mapato kwa niaba ya Halmshauri. Hata hivyo, kampuni hiyo imekuwa wakati mwingine haiwasilishi makusanyo ya 5,650,000 kwa siku kwa Halmashauri kama ilivyokubaliwa.

• Kampuni ya Konsad imeanza kutekeleza Sheria Ndogo mpya (By Law) ya kupandisha viingilio vya kituoni bila ridhaa ya Jiji. Pamoja na Uongozi wa Kituo kukanusha wakati wa ziara ya Mstahiki Meya ya tarehe 4 Februari 2011 ushahidi wa risiti unaonyesha kwamba tayari walishaanza kutoza hususani wananchi wanaoingia kwenye kituo. Suala la kupandisha viwango vya viingilio vinavyowagusa wananchi wengi wakati vyanzo vingine vyenye kuleta fedha nyingi zaidi vinaachwa huku huduma zikiwa hazijaboreshwa linahitaji kufanyiwa maamuzi mbadala na kutolewa tamko kwa umma.

• Katika ziara yangu ya Kituoni ya tarehe 28 Januari 2011 ya kusikiliza malalamiko ya mawakala nilibaini kuwepo kwa haki zao ambazo zinaminywa na mazingira magumu ya kufanyia kazi ikiwemo uchache wa ofisi za kukatia tiketi. Pia, kuna matitizo ya ulinzi kituoni hususani nyakati za usiku kwa ajili ya abiria wanaoshuka usiku. Kadhalika, kumekuwa na matatizo ya umeme yanayohusisha ubovu wa baadhi ya taa, umeme kuwa mdogo ukilinganisha na mahitaji na pia jenereta la Kituoni haliwashwi kwa wakati umeme unapokatika.

• Mpango wa Biashara (Business Plan) wa kuwezesha Jiji kukiendeleza kituo husika kuwa cha kisasa kwa lengo la kukuza biashara na kupanua huduma utakaohusisha ujenzi wa majengo ya kisasa yanayoendana na mahitaji ya kitaifa na kimataifa haujaanza kutekelezwa. Pamoja na changamoto za kiutendaji, sababu mojawapo inayoelezwa ni kusudio la ujenzi wa miundombinu (Depot and Transfer Station) unatarajiwa kufanywa na Wakala wa Mabasi yaendayo haraka (DART).

HOJA:Kutokana na maelezo hayo naomba kutoa hoja kwamba Baraza la Madiwani wa Halmashauri ya Jiji la Dar es salaam lipitishe maazimio yafuatayo:

(1) Taarifa Kamili ya Ukaguzi Maalum (Special Audit) uliofanywa na Mkaguzi Mkuu wa Hesabu za Serikali (CAG) kuhusu Kituo Kikuu cha Mabasi cha Ubungo (UBT) itolewe hadharani na ijadiliwe katika Baraza la Madiwani wa Jiji.

(2) Mikataba yote iliyoingiwa kinyume na taratibu ivujwe au ipitiwe upya ili kuwa na mfumo ambao utawezesha Halmashauri kuweza kupata mapato ya kutosha kwa mujibu wa thamani ya mali na kanuni zinazohusika.

(3) Uchunguzi ufanyike wa tuhuma za mazingira ya ufisadi na ukiukwaji wa kanuni katika kuingiwa kwa mikataba tajwa ili hatua stahiki ziweze kuchukuliwa kwa wahusika.

(4) Malimbikizo yote ya madeni yafuatiliwe na kulipwa ili Halmashauri iweze kupata mapato kwa ajili ya kutoa huduma za msingi za wananchi.

(5) Kwa kuwa Kituo cha Mabasi Ubungo kinachangia takribani nusu (50%) ya mapato ya jiji basi mkazo uwekwe katika kuboresha mazingira ya kituo kwa kufanya ukarabati na uendelezaji. Aidha mapungufu ya dharura ambayo yanaathiri zaidi watumiaji wa kituo yafanyiwe kazi katika mwaka wa fedha 2011/12.

(6) Kwa kuwa hakuna mgawo wowote ambao ngazi za Manispaa, kata na mtaa zinapata kutokana na mapato yanayotokana na Kituo cha Mabasi Ubungo; wakati majadiliano yakiendelea kuhusu suala hili, Jiji litenge bajeti ya Kituo Cha Mabasi Ubungo (UBT) kuchangia shughuli za kijamii (Corporate Social Responsibility) katika maeneo ya Jimbo la Ubungo.

(7) Taarifa ya Kina kuhusu Mradi wa Mabasi yaendayo kwa Haraka (DART) iweze kuwasilishwa eneo linalohusika na mradi huo liweze kufahamika ili Jiji lianze kutekeleza Mpango wa Biashara wa kuendeleza Kituo husika katika maeneo ambayo yataendelea kuwa kwenye usimamizi wa Jiji.

(8) Pendekezo lililotolewa katika kikao cha Kamati ya Fedha na Uongozi cha tarehe 11 Mei 2011 liidhinishwe na kutekelezwa ili kusitisha kutekeleza Sheria ndogo ya kuongeza kiwango cha kiingilio kwa wananchi toka sh 200 mpaka 300 na kufanya mapitio ya sheria ndogo husika ili nguvu za ukusanyaji mapato zielekezwe katika vyanzo visivyoongeza mzigo kwa wananchi wa kawaida wanaotumia Kituo Kikuu Cha Mabasi cha Ubungo.

Naomba kuwasilisha,

John Mnyika(Mb)-Jimbo la Ubungo
Mjumbe wa Baraza la Madiwani Halmashauri ya Jiji la Dar es salaam
13/05/2011

Matengenezo ya Barabara Golani-Saranga yaanza; daraja Burura latengewa fedha

Taarifa inatolewa kwa umma kwamba jana tarehe 6 Mei 2011 Mbunge wa Ubungo, John Mnyika ametembelea kata za Saranga na Kimara kufuatilia utekelezaji wa mipango ya maendeleo.
Akizungumza na wananchi waliomzunguka katika eneo la Golani ambapo matengenezo ya barabara yameanza, Mnyika aliwaeleza wananchi hao kwamba matengenezo hayo yatahusisha ukarabati wa barabara kuanzia Kimara Suca, Golani, Saranga mpaka Temboni.

Aidha Mnyika aliwatangazia wananchi hao kwamba jumla ya shilingi milioni zaidi ya mia tano (501,973,470) zimetengwa kwenye bajeti ya Halmashauri ya Kinondoni kwa mwaka wa Fedha 2011/2012 kwa ajili ya kujenga Daraja Kubwa la Burura/Golani katika Mto Ubungo.
Kwa upande wake, Diwani wa Kata ya Saranga Ephraim Kinyafu alimshukuru mbunge kwa jitihada za kufuatilia kero za wananchi.

“Kwa zaidi ya miaka kumi wananchi wa eneo hili wamekuwa na kero ambapo nyakati za mvua mawasiliano hukatika lakini katika kipindi kisichofikia hata mwaka mmoja umefanikiwa kushawishi fedha kutengwa kwa ajili ya mradi huu muhimu”, alisema Kinyafu.

Kwa upande mwingine, akizungumza na wakazi wa Mavurunza katika mkutano uliofanyikia katika ukumbi wa G5 Mnyika aliwataarifu wananchi kwamba matengenezo ya Barabara ya Kimara, Mavurunza mpaka Bonyokwa nayo yanatarajiwa kuanza mwezi huu baada ya kupungua kwa mvua.

Akijibu swali la Mwenyekiti wa umoja wa wakazi hao ujulikanao kama Wanaume Upendo, Cleophas Malima kuhusu hatua mahususi ambazo zimechukuliwa na mbunge kuhusu barabara husika ambayo imekuwa kero kwa wananchi; Mnyika alisema kwamba hatua hizo zinahusisha ngazi mbili.

“ Mtakumbuka kwamba ujenzi wa barabara ya Kimara Bonyokwa ni kati ya ahadi ambazo alizitoa Rais Jakaya Kikwete mwezi Mei mwaka 2010. Mara baada ya uchaguzi katika vipindi mbalimbali nimefuatilia kwa karibu utekelezaji wa ahadi hii.

Zoezi la kuipandisha hadhi barabara hii kuwa ya mkoa limeshafanywa na wakala wa barabara (TANROADS) na upembuzi yakinifu umefanyika hivyo kupitia kikao cha Bodi ya Barabara Mkoa wa Dar es salaam ambacho mimi ni mjumbe cha tarehe 02 Februari 2011 nilitoa mwito kwamba tathmini ya fidia iweze kufanyika mapema zaidi ya ilivyopangwa awali ili hatua za ujenzi zichukuliwe kwa wakati.

Tarehe 21 Aprili 2011 nimewaandikia barua TANROADS yenye kumbukumbu na OMU/MB/006/2011 kuwakumbusha kuzingatia suala hili katika vipaumbele vya bajeti ya mwaka wa fedha 2011/2012 kama sehemu ya mkakati wa kupunguza foleni katika jiji la Dar es salaam kwa kuwa barabara hiyo inaungana na Tabata Segerea”, Alisema Mnyika.

Mnyika aliendelea kufafanua kuwa wakati hatua hiyo ikisubiriwa kunahitajika hatua ya dharura katika kipindi hiki cha mpito kutokana na ubovu mkubwa wa barabara hivyo tarehe 19 Aprili 2011 kupitia kikao cha Kamati ya Fedha na Uongozi cha Halmashauri ya Manispaa ya Kinondoni alitoa mwito kwa mkurugenzi kuhakikisha mhandisi anatembelea eneo hilo na hatua za haraka kuchukuliwa.

Mnyika aliwaeleza wakazi hao kuwa ameshafuatilia katika manispaa na kwamba matengenezo ya barabara hiyo yataanza mwezi huu ili kupunguza adha kwa wananchi na kwamba ukarabati huo usipoanza kwa wakati atawaeleza hatua zitazochukuliwa.

Kwa upande wake, Diwani wa Kata ya Kimara Pascal Manota alimueleza mbunge maeneo korofi katika barabara hiyo hususani maeneo ya vyumba vinane, kwa kyauke mpaka darajani na kusisitiza kuwa iwapo hatua za haraka hazitachukuliwa daraja mojawapo litasombwa na maji kutokana na barabara kubomoka na hivyo kusababisha hasara zaidi kwa umma.

Imetolewa tarehe 07/05/2011 na:

Aziz Himbuka
Katibu Msaidizi
Ofisi ya Mbunge

Barabara Bonyokwa na Daraja Ubungo Msewe

Mbunge wa Ubungo, John Mnyika ametaka hatua za haraka kuchukuliwa kufanya matengenezo ya Barabara ya Kimara Bonyokwa na daraja la Ubungo Msewe kutokana na uharibifu uliochangiwa na mvua zinazoendelea.

Mnyika aliyasema hayo katika kikao cha Kamati ya Fedha na Uongozi cha Halmashauri ya Manispaa ya Kinondoni kilichofanyika mapema wiki hii (19/04/2011) katika ukumbi wa Manispaa hiyo.

“ Nimetembelea barabara ya Bonyokwa ambayo ukarabati wake ulipaswa kufanyika mwaka huu wa fedha; hali ni mbaya, magari yanashindwa kupishana na mawasiliano yanaelekea kukatika. Daraja la Msewe linalounganisha kata ya Ubungo na Chuo Kikuu cha Dar es salaam nalo limezolewa kutokana na mvua zinazoendelea. Hivyo, hatua za dharura zinahitajika kuchukuliwa na Halmashauri. Na kutoa mwito kwa mkurugenzi hususani kupitia idara ya ujenzi kwenda katika maeneo husika na kuchukua hatua za haraka”, Alisema Mnyika.

Kutokana na mwito huo, Mkuu wa Idara ya Ujenzi ya Manispaa ya Kinondoni, Mhandisi Uriyo Athanas aliahidi kufuatilia kwa ajili ya hatua stahiki kuchukuliwa.

Mnyika alisema kwamba ujenzi wa Barabara ya Bonyokwa ni kati ya ahadi za Rais Jakaya Kikwete alizozitoa mwezi Mei mwaka 2010 wakati alipotembelea kata ya Kimara na kuitaka Manispaa kufuatilia kwa wakala wa Barabara (TANROADS) ili barabara hiyo iweze kujengwa kwa wakati.

“Katika kipindi hiki ambacho tunasubiria ujenzi wa barabara hiyo kwa kiwango cha lami, matengenezo ya dharura kwa kuweka kifusi yanapaswa kufanywa na Halmashauri ya Manispaa ya Kinondoni kwa kuwa ndiyo yenye wajibu huo”, Alisisitiza Mnyika.

Kwa upande mwingine, Mnyika alisema kwamba ukarabati wa daraja la Msewe ambalo limezolewa na maji ni suala la dharura katika kupunguza foleni katika barabara ya Morogoro kwa kuwa njia hiyo imekuwa ikiwezesha sehemu ya magari kupitia njia ya Chuo Kikuu cha Dar es salaam.
Hatahivyo, Mhandisi Uriyo alieleza kuwa hatua hizo za haraka zinapaswa pia kusubiri kupungua kwa mvua ili kuepusha matengenezo yatayofanyika kuathiriwa na mvua za masika zinazoendelea.

Chanzo: Ofisi ya Mbunge Ubungo

Ps: TANROADS wamekubali kufanya matengenezo kwenye daraja husika kwa haraka

Mbunge atoa rambirambi vifo vya watoto

Mbunge wa Ubungo, John Mnyika amepokea kwa masikitiko makubwa taarifa ya vifo vya watoto watano vilivyotokea jana tarehe 19 Aprili na leo tarehe 20 Aprili 2011 kutokana na ajali ya kuangukiwa na ukuta katika eneo la Matosa Kimara B, Dar es salaam.

Marehemu hao walikuwa ni wanafunzi wa Shule ya Chekechea ya Nia na walifikwa na mauti hayo kwa kuangukiwa na ukuta wa nyumba jirani na shule yao; watoto wanne walifariki papo hapo jana wakati mmoja amefia hospitali leo.

Mbunge Mnyika ametoa salamu za rambirambi kwa familia za marehemu wote na kuwatakia moyo wa uvumilivu katika kipindi hiki kigumu.

Aidha kufuatia msiba huo, Mnyika ameahirisha kushiriki katika vikao vya Kamati za Halmashauri ya Manispaa ya Kinondoni vinavyoendelea leo kwa ajili ya kushiriki maziko ya watoto hao.

Mnyika ameomba taasisi za masuala ya haki za watoto na wadau wengine kujumuika na familia za marehemu kuwafariji katika majonzi.

Kwa upande mwingine, ametoa mwito kwa serikali kufanya uchunguzi wa mazingira ya ajali na kuchukua hatua zinazostahili.

Chanzo: Ofisi ya Mbunge Ubungo

Serikali itoe kauli ya kina kuhusu ufisadi wa Kagoda

Katika mkutano wa tatu wa Bunge kikao cha kwanza leo tarehe 5 Aprili 2011 niliuliza swali la nyongeza kutokana na swali la msingi namba 4 kwa ofisi ya Rais Wizara ya utawala bora.

Katika swali hilo niliiuliza serikali itoe kauli kuhusu hatua zilizochukuliwa kuhusiana na Kampuni ya Kagoda Agricultural Limited na kukumbusha kwamba serikali imekuwa ikitoa kauli za mara kwa mara bungeni kuwa uchunguzi unaendelea kwa kushirikiana na vyombo vya kimataifa; niliuliza ni lini uchunguzi huo utakamilika.

Katika majibu yake serikali ilitoa kauli kwamba uchunguzi bado unaendelea. Pamoja na kuwa sikuridhishwa na jibu hilo la serikali, hakukuwa na fursa kwa mujibu wa kanuni kuuliza swali lingine.

Hivyo natoa kauli ya kuitaka serikali itoe tamko la kina kuhusu uchunguzi huo kwa kuwa miaka takribani mitatu imepita toka uchunguzi huo uanze.

Itakumbukwa kwamba Kagoda inatuhumiwa kuchota jumla ya dola za Kimarekani 30,732,658.82 (Sh. 40 bilioni) katika Akanuti ya Madeni ya Nje (EPA) katika Benki Kuu (BoT) mwaka 2005.
Serikali imekuwa ikijichanganya kuhusu ufisadi wa Kagoda mathalani tarehe 15 Septemba 2006 Waziri wa Fedha wa wakati huo Zakhia Meghji aliandika barua kwa wakaguzi wa mahesabu wa kampuni ya Deloitte& Touche ya Afrika Kusini kuwa fedha za Kagoda zilitumika kwa kazi ya usalama wa taifa na kutaka usiri na busara katika ukaguzi wa mahesabu ya kampuni hiyo. Baadaye Waziri Meghji alifuta barua hiyo.

Nyaraka mbalimbali zinaonyesha kwamba cheti cha usajili wa Kagoda kilichotolewa na ofisi ya Wakala wa Usajili wa Leseni za Biashara na Makampuni (BRELA) kinaonyesha Kagoda ilisajiliwa 29 Septemba 2005.

Mpaka sasa siri za ufisadi wa Kampuni hiyo na wa kampuni zingine zilizohusika kwa wizi wa Kagoda zimebaki kwa Rais Jakaya Kikwete na wajumbe watatu wa timu uliyoiunda wakati huo ikiwemo idadi na majina ya watuhumiwa wanaodaiwa kurejesha sehemu ya fedha.
Wakati serikali imekuwa ikieleza kwamba haiwajui wamiliki wa Kagoda; taarifa mbalimbali zimekuwa zikimtaja Rostam Aziz (Mb) na wengine.

Baadhi ya vyombo vya habari vimewahi kuandika kwamba Wakili Bhyidinka Sanze wa kampuni ya mawakili ya Malegesi (Malegesi Law Chambers) ya Dar es Salaam katika maelezo yake kwa Kamati ya Rais ya kushughulikia wizi kwenye akaunti ya Madeni ya Nje (EPA) alikiri kwamba alishuhudia mkataba wa Kagoda na mikataba mingine iliyohusu ufisadi huo.

Wakili huyo alieleza kwamba mkataba huo ulishuhudiwa na Caspian Construction Limited (inayomilikiwa na Rostam Aziz) iliyopo Dar es salaam na kwamba alielezwa kuwa fedha hizo ni kwa ajili ya kuiwezesha CCM kugharamia uchaguzi na kwamba maelekezo hayo yalitolewa kwa aliyekuwa gavana wakati huo (marehemu Daudi Balali) na Rais wakati huo Benjamin Mkapa.
Hata hivyo, pamoja na serikali kwa wakati wote kuendelea kusisitiza kutowajua wamiliki wa Kagoda; Taarifa za hivi karibuni zimemtaja mfanyabiashara Yusuph Manji kupitia kampuni ya familia yake ya Quality Finance Corporation Limited (QFCL) anadaiwa na serikali kurejesha fedha za Kagoda.

Katika mazingira haya ya utata ndio maana natoa kauli ya kuitaka serikali kutoa tamko la kina kuhusu kashfa hii ya Kagoda.

John Mnyika (Mb)
Jimbo la Ubungo
05/04/2011

SALAMU ZA RAMBIRAMBI KWA MSIBA WA MWANAHABARI ADAM LUSEKELELO NA MHADHIRI DR JUSTINE KATUNZI

Nikiwa safarini kwenda Dodoma naomba kueleza masikitiko yangu kwa vifo vya wakazi wawili wa Jimbo la Ubungo ambao wamekuwa na mchango mkubwa kwa taifa letu kwa namna mbalimbali.

Mosi, ni kifo cha mwanahabari mwandamizi Adam Lusekelo ambaye amekuwa mstari wa mbele kupitia kalamu yake kuhamasisha uwajibikaji katika taifa letu. Marehemu Lusekelo amekuwa akiandika kwa kutumia mfumo wa sitiari (satire) kupitia safu maarufu za “In A Light Touch”, “Eye Spy” nk kadhaa vya habari. Natoa mwito kwa wadau wa sekta husika kumuenzi marehemu Lusekelo kwa kukusanya makala zake na kuziweka pamoja katika kitabu kwa jina lake ili maudhui yake ya ukombozi yaendelee kukumbukwa na vizazi vijavyo.

Pili, ni kifo cha mhadhiri katika Chuo Cha Biashara cha Chuo Kikuu Cha Dar es salaam (UDBS) Dr Justine Katunzi ambaye ametoa mchango katika fani ya utawala na usimamizi wa rasilimali kwa kutoa mafunzo na machapisho mbalimbali.

Natuma salamu za rambirambi kwa familia za marehemu na kuwaombea kwa Mwenyezi Mungu wawe na moyo wa uvumilivu katika kipindi hiki kigumu.
Wasalaam,

John Mnyika (Mb)
04/04/2011

Kauli juu ya Hotuba ya Rais kuhusu umeme

Aprili Mosi 2011 Rais Jakaya Kikwete alilihutubia taifa na kuzungumzia masuala matatu: shughuli ya kutembelea Wizara na Idara za serikali, taarifa ya Mdhibiti na Mkaguzi Mkuu wa Hesabu za Serikali na Katiba Mpya.

Katika hotuba hiyo Rais Kikwete alizungumzia kuhusu hali ya umeme nchini na gharama za kuunganisha umeme kama sehemu ya mambo aliyoyatolea maelekezo wakati wa ziara yake katika Wizara ya Nishati na Madini.

Katika hotuba hiyo Rais Kikwete amekiri kwamba serikali yake haina suluhisho lolote la umeme wa dharura kwa ajili ya kupunguza mgawo wa umeme katika kipindi cha sasa mpaka Julai zaidi ya kutegemea kudra ya mvua kuendelea kunyesha. Katika hali hiyo Rais alipaswa kuwawajibisha wote waliochelewesha maandalizi ya kukabiliana na dharura ambayo yalijulikana toka mwaka 2008 na Rais Kikwete amekuwa akiyatolea maelezo na maelekezo toka wakati huo bila kusimamia kikamilifu utekelezaji.

Aidha kauli ya Rais Kikwete kwamba mchakato wa kukodi mitambo ya kufua umeme wa megawati 260 uko kwenye hatua ya zabuni kutangazwa imedhihirisha uzembe kwa upande wa serikali kwa kuwa toka mwezi Februari kauli hiyo hiyo imekuwa ikijirudia hali ambayo inaashiria kwamba mpango huo hautakamilika mwezi Julai mwaka 2011 kama inavyodaiwa. Uamuzi wa kukodi mitambo hiyo ulifikiwa katika kikao cha Baraza la Mawaziri cha tarehe 15 Februari 2011 ambacho Rais Kikwete alikuwa mwenyekiti wake, Rais baada ya kikao hicho alipaswa kufuatilia kwa karibu utekelezaji wa maazimio husika badala ya kusubiri mpaka kutoa maagizo mengine kwenye ziara ya wizarani mwezi Machi mwishoni. Hali hii itapelekea taifa kulipia baadaye mitambo ambayo haitatumika kikamilifu katika kipindi chote cha dharura kama ilivyotokea katika kashfa ya Richmond/Dowans.

Kadhalika kauli ya Rais Kikwete imedhihirisha kuwa serikali yake imeshikilia msimamo wa kukodi mitambo ambayo itatumika kwa kipindi cha miezi sita pekee kwa gharama za zaidi ya bilioni 400 badala ya kuweka mkazo katika kununua mitambo kama ambavyo imeshauriwa na wadau mbalimbali. Ni muhimu kwa Wizara husika kuueleza umma kiwango cha fedha ambacho kitatumika katika mpango huu ambacho kimsingi kitazidi kuongeza mzigo wa madeni kwa TANESCO.

Pia, serikali ieleze maandalizi ambayo yamekwishafanyika mpaka hivi sasa kukabiliana na tatizo la upatikanaji, usafirishaji na uhifadhi wa mafuta mazito (HFO) ambayo yatahitajika kwa kiwango kikubwa katika kuendesha mitambo hiyo katika mikoa itakayowekwa mitambo hiyo. Jambo hili ni muhimu kwa kuwa katika mazingira ya sasa serikali inashindwa kukabiliana vya kutosha na mahitaji ya mafuta mazito kwa mitambo ya megawati 100 ya IPTL iliyopo Dar es salaam ambayo hutumia takribani bilioni 15 kwa mwezi kwa mafuta pekee.

Kwa upande mwingine, naunga mkono kauli ya Rais ya kuwataka TANESCO kuangalia kwa haraka namna ya kupunguza gharama kubwa za kuwaunganishia umeme wateja jambo ambalo nimekuwa nikitoa mwito kwa serikali kulifanya toka mwaka 2010. Natambua kwa Rais Kikwete amekubaliana na pendekezo la kuwaunganishia watu umeme na kuingiza gharama hizo katika bili ya umeme kidogo kidogo hata hivyo ni muhimu pendekezo hilo likaambatana pia na utaratibu ambapo wananchi wanapogharamia wenyewe vifaa kama nguzo za umeme basi gharama hizo warejeshewe kupitia punguzo katika malipo ya bili zao kama umeme uliolipiwa kabla kwa kuwa miundombinu hiyo hubaki kuwa mali ya TANESCO.

Hatahivyo, pamoja na kutoa kauli kwa TANESCO Rais Kikwete alipaswa kuwaeleza watanzania namna serikali yake ilivyojipanga kuipunguzia mzigo wa madeni TANESCO kutokana na madeni ambayo serikali inadaiwa na pia mzigo mkubwa ambao TANESCO inaubeba kutokana na mikataba mibovu ya kifisadi ambayo serikali iliingia. Kuwepo kwa gharama kubwa ya kuunganisha umeme na bei ya umeme wenyewe ni matokeo ya mzigo wa madeni na ufisadi katika mikataba kubebeshwa wateja waliopo. Sekta ikiwemo umeme imegubikwa na rushwa na ufisadi mkubwa ukihusisha viongozi wa juu wa Serikali tangu mwaka 1991, wakati wa IPTL ambayo inaendelea kuitafuna nchi hadi leo. Pamoja na kashfa ya Dowans/Richmond mwaka 2006 serikali iliingia mkataba na Alstom Power Rentals kuzalisha umeme wa dharura Mkoani Mwanza na kampuni hiyo kulipwa bilioni takribani 40 bili kuzalisha umeme wowote. Hivyo natoa mwito kwa Serikali kupitia upya haraka mikataba ya umeme hapa nchini ambayo imeliingiza taifa katika fedheha na hasara kubwa, ikiwemo mikataba ya IPTL na Songas,Artimas,Tanpower Resources /Kiwira, ikiwa ni pamoja na kuchukua hatua za kishera na kinidhamu patakapobainika uzembe au ufisadi wowote kwa wote wanaohusika, kwa mikataba iliyoisha lakini ambayo iliingiza nchi katika hasara kubwa kama sehemu ya mkakati wa kupunguza gharama za umeme nchini Tanzania.

Nilitarajia pia Rais Kikwete angetumia hotuba hiyo kueleza kwa umma maelekezo ambayo ameyatoa kwa Wizara ya Nishati na Madini kuhusu sekta ndogo ya mafuta hususani yanayohusiana na ubora na bei ya mafuta ikiwemo mkakati wa kupunguza tozo na kodi ili kupunguza gharama ambazo zinaongeza ugumu mkubwa wa wananchi hivi sasa. Kwa ujumla, maagizo ambayo Rais Kikwete ameyatoa mengi ni yale yale ambayo amekuwa akiyatoa kwa nyakati mbalimbali kati ya mwaka 2006 mpaka 2010, hivyo wakati umefika sasa kwa Rais kusimamia kikamilifu utekelezaji wa masuala ambayo baraza la mawaziri ambalo yeye ni mwenyekiti wake ndicho chombo cha haraka zaidi kinachopaswa kuongeza ufanisi. Mfumo wa utawala unaotumiwa na Rais Kikwete wa kuzunguka (Management By Walking Around-MBWA) hauwezi kuleta tija ya kutosha ikiwa Rais Kikwete hataweka mkazo katika mifumo ya kiutawala inayozingatia malengo na matokeo (Management by Objectives and Results).

John Mnyika (Mb)
Waziri Kivuli-Nishati na Madini
02/04/2011

TAMKO LA AWALI KUHUSU MUSWADA WA MABADILIKO YA KATIBA

Nimeshtushwa na maudhui ya muswada wa sheria ya mabadiliko ya katiba wa mwaka 2011 (The Constitutional Review Act 2011) uliochapwa katika gazeti la serikali toleo No. 1 Vol. 92 la tarehe 11 Machi 2011. (Muswada unapatikana hapa: http://www.policyforum-tz.org/node/7806)

Maudhui ya muswada huu yamedhihirisha tahadhari niliyotoa mara kadhaa kwamba serikali haina dhamira ya kweli ya kuhakikisha panakuwepo na mchakato mzuri wa kuwa na katiba mpya.

Muswada huo umelenga kuhalalisha yote ambayo yalitangazwa kufanywa na Rais kuhusu mchakato wa katiba mpya na kupingwa na wadau mbalimbali; sasa yanataka kupewa uhalali kwa sheria inayotaka kutungwa na bunge kupitia muswada huo.

Muswada huo unataka kumpa mamlaka Rais ya kuunda tume ya kuongoza mchakato mzima wa katiba bila kuhusisha bunge ama wadau wengine wa msingi. Muswada huo pia utaka kumpa Rais mamlaka ya kuteua wajumbe wa tume husika bila kushauriana na mtu yoyote isipokuwa Rais wa Zanzibar. Muswada huo unaelekeza kuwa katika kuteua wajumbe Rais atazingatia uwakilishi wa makundi ya kijamii, lakini makundi husika hayatajwi hata kwa ujumla wake na hivyo kuacha mamlaka yote ya kuamua uwakilishi kubaki kwa Rais.

Muswada huo unataka kumpa Rais mamlaka ya kutengeneza hadidu rejea za Tume jambo ambalo lilipaswa kufanywa Bunge kwa kuwa sehemu ya sheria husika ama kufanywa na mkutano mkuu wa kikatiba. Kwa kutoa mamlaka ya kuunda hadidu rejea kwa Rais mwanya umetolewa kwa mtu mmoja kuweka mipaka ya nini kinastahili kufanywa na tume wakati wa mchakato wa katiba mpya na hivyo kuminya wigo wa mabadiliko.

Muswada huo unataka Tume iwasilishe ripoti yake kwa Rais ambaye atampa nakala Rais wa Zanzibar na baadae kumwelekeza waziri mwenye dhamana kupeleka yale atayoamua Rais bungeni. Muswada huu kwa kuwa na kifungu hiki utaendeleza yaliyofanywa na marais waliopita kuhusu ripoti na mapendekezo ya tume zingine na hivyo kukwamisha mabadiliko ya kweli.

Muswada huo unataka kutoa mamlaka kwa tume itayoundwa kuitisha jukwaa (fora) ambalo litaundwa kwa ajili ya kupata maoni pekee (ad hoc) badala ya kuitishwa kwa Mkutano Mkuu wa Katiba (National Conference/congress) kama wadau walivyohitaji. Aidha uwakilishi katika jukwaa hilo umejwa tu kuwa ni wa kijografia na kimakundi bila kuweka bayana mnyumbuliko wa uwakilishi. Muswada huo unataka kutoa mamlaka finyu kwa jukwaa hilo kuwa ni kutoa ushauri kuhusiana na muswada; tofauti na mkutano mkuu wa kikatiba ambao ungekuwa na mamlaka zaidi katika mchakato husika.

Muswada huo unataka kutoa mamlaka kwa Rais kuitisha bunge la katiba (constituent assembly) ikiwemo kuteua wajumbe wa bunge husika. Muswada huo unataka kutoa mamlaka makubwa kwa Rais kuteua wawakilishi wa chombo kikuu zaidi katika mchakato wa katiba bila kushauriana na kundi lolote ama wananchi kuhusika katika uteuzi ama kuwa na wawakilishi walioteuliwa na makundi yenyewe mathalani vyama vya siasa, asasi za kiraia, taasisi za dini, vyama wa wakulima, vyama vya wanafunzi, vyama wa wafanyakazi nk. Muswada huo unataka Rais ashauriane na Rais wa Zanzibar na mwanasheria mkuu wa serikali pekee. Muswada huo unatoa mamlaka makubwa zaidi ya Rais kuamua hata kufanya bunge la kawaida kuwa ndilo bunge la katiba, jambo ambalo linaweza kurejesha udhaifu uliofanywa katika mchakato wa katiba inayotumika sasa ambapo umma uliporwa wajibu na mamlaka yake ya kushiriki moja kwa moja katika kupitisha katiba.

Muswada huo kwa ujumla haujaeleza muda wa mchakato wa katiba na vipindi vitavyotumiwa na vyombo mbalimbali katika hatua mbalimbali za mchakato wa katiba; ama kutoa mamlaka ya kuwekwa kwa muda huo kwa chombo chenye uwakilishi mpana wa umma kama mkutano wa katiba au bunge na hivyo kutoa mwanya kwa mchakato mzima kucheleweshwa.

Haya ni baadhi ya maudhui ndani ya muswada husika ambayo yamenishtusha na kunifanya nitoe tamko hili la awali wakati nikiendelea kufanya uchambuzi wa kina ambao nitautolea kauli katika hatua za baadaye.

Lengo la kutoa tamko hili la awali ni kutoa mwito kwa vyama vya siasa, asasi za kiraia, vyombo vya habari, taasisi za dini na watanzania kwa ujumla wakiwemo wananchi wenzangu wa jimbo la Ubungo kufuatilia kupata nakala ya muswada huo ama maudhui yake kwa ajili ya kuujadili kwa dharura na kutoa matamko. Aidha kwa katika kauli hii ya awali naitaka serikali itoe taarifa kwa umma namna ambavyo wananchi wanaweza kupata nakala za muswada huo nyeti na sababu za serikali kupuuza maoni mengi ya wadau yaliyotolewa kabla ya kuandaliwa kwa muswada huo kuhusu mchakato unaofaa kuongoza mabadiliko ya katiba katika taifa letu.
Ikumbukwe kuwa tarehe 9 Februari 2011 nilitoa tamko kuwa nilipokea kwa tahadhari uamuzi wa Serikali kupitia kwa Rais Jakaya Kikwete na Waziri Mkuu Mizengo Pinda kubadili misimamo ya awali kuhusu mchakato wa katiba mpya na kuamua kukubaliana na mwito wa kutaka mchakato husika uanzie bungeni kupitia kutungwa kwa sheria ya bunge ya kuratibu na kusimamia mchakato husika kama nilivyokuwa nikitoa mwito kwa nyakati mbalimbali.

Nilieleza kwamba nilipokea kwa tahadhari kwa kuwa bado kauli za serikali kuhusu mchakato husika zina utata kwa kuwa hotuba ya Rais Kikwete ya tarehe 5 Februari 2011 pamoja na kutaja kuwa katiba mpya itapitishwa kwa kura za maoni, haikueleza iwapo Mkutano Mkuu wa Kikatiba utaitishwa katika hatua za awali za mchakato husika. Utata huu unaongezeka zaidi kwa kuwa Waziri Mkuu Pinda akilihutubia bunge tarehe 8 Februari 2011 pamoja na kueleza kwamba muswada kuhusu mchakato husika utawasilishwa kwenye mkutano wa tatu wa bunge mwezi Aprili, ameelezea kuwa sheria husika itahusu kuundwa kwa tume.

Katika muktadha huo nilitoa kauli ya kuitaka serikali iwapo muswada unaopelekwa bungeni mwezi Aprili iwapo utaweka utaratibu wa kuitishwa kwa Mkutano Mkuu wa Kitaifa wa Katiba kuanzia hatua za awali pamoja na mwishowe kupigwa kwa kura kwa kura za maoni. Ni muhimu kwa tume ya mchakato wa katiba kuandaliwa hadidu rejea zake na kuundwa na mkutano wa kikatiba ambao utaweka tunu/misingi muhimu kabla ya kuanza kwa mchakato, ili tume ikusanye maoni, ipeleke rasimu kwa mkutano mwingine wa kikatiba na hatimaye katiba ithibitishwe kwa kura ya maoni. Nilitoa mwito pia kwa serikali kutoa ufafanuzi iwapo sheria husika inayokusudiwa kutungwa itagusa marekebisho ya katiba ibara ya 98 ili kutoa uhalali kwa katiba mpya kupitishwa na umma kupitia mkutano wa kikatiba na kura za maoni badala ya bunge pekee ambalo kwa sasa ndicho chombo chenye mamlaka ya mabadiliko ya katiba.

Ikumbukwe kwamba msimamo wa awali wa Waziri Mkuu Mizengo Pinda kuhusu mabadiliko ya katiba alioutoa wakati akizungumza na wahariri wa vyombo vya habari tarehe 17 Disemba 2010 ulikuwa na kumshauri Rais aunde jopo shirikishi ili kuratibu na kusimamia mchakato husika.

Kutokana na msimamo huo tarehe 19 Disemba 2010 nilifanya Mkutano na waandishi wa habari na kupinga msimamo huo na kueleza kwamba ni muhimu kwa mchakato wa katiba mpya kuanzia bungeni kupitia kutungwa kwa sheria ya bunge ya kuratibu na kusimamia mchakato husika badala ya kuundwa kwa jopo shirikishi la wataalamu kama alivyotaka Waziri Mkuu. Aidha katika mkutano huo nilipingana na azma ya Waziri Mkuu Pinda ya kutaka marekebisho ya katiba badala yake nikaitaka serikali itangaze rasmi kuanzisha mchakato wa katiba mpya. Katika Mkutano huo na waandishi wa habari nilidokeza kuwa kutokana na serikali kutoa msimamo wa kutokupeleka hoja au muswada wa serikali bungeni wa kuratibu na kusimamia mchakato husika nitalazimika kupeleka hoja binafsi bungeni ili bunge litipishe maazimio ya kuanzishwa kwa mchakato wa katiba mpya ili hatimaye kuwezesha kutungwa kwa sheria ya kuratibu na kusimamia mchakato husika.

Tarehe 27 Disemba 2010 nilitekeleza azma hiyo kwa kuwasilisha taarifa ya hoja kwa katibu wa bunge ya kutaka kuwasilisha hoja ili bunge lipitishe azimio la kuanzishwa kwa mchakato wa katiba mpya na kupitisha utaratibu wa kisheria wa kuratibu na kusimamia mchakato mzima. Katika Mkutano wangu na waandishi wa habari siku hiyo nilieleza kwamba baadhi ya mambo ya msingi yatayozingatiwa katika hoja binafsi ni pamoja na kuhakikisha kwamba kunatungwa sheria ya kuwezesha kuitishwa kwa mkutano mkuu wa taifa wa kikatiba, tunatunga sheria ya kuwezesha tume ya kuratibu mchakato husika kuundwa kwa sheria ya bunge badala ya kuteuliwa na Rais, kutoa kwa mujibu wa sheria elimu ya uraia kwa umma kuhusu maudhui na mchakato husika na kuweka utaratibu wa kisheria wa kuwezesha kufanyika kwa kura za maoni.

Tarehe 31 Disemba 2010 Rais Jakaya Kikwete akilihutubia taifa akatangaza kukubaliana na suala la kuanzishwa kwa mchakato wa katiba mpya na kutangaza dhamira yake kuwa ya kuunda tume ya kusimamia mchakato husika na hatimaye vyombo vya kikatiba kufanya mabadiliko husika.
Tarehe 2 Januari 2011 nilitoa kauli yangu kwa umma ya kuitaka serikali kutoa ufafanuzi kuhusu kauli ya Rais Kikwete na kueleza bayana iwapo serikali inakubaliana na hoja ya kupeleka suala husika ili mchakato uratibiwe na kusimamia kwa sheria itayotungwa na bunge itayaozingatia kufanyika kwa mkutano wa kitaifa wa katiba, kuundwa kwa tume kwa mujibu wa sheria badala ya uteuzi wa Rais na hatimaye kufanyika kwa kura za maoni; na nikaeleza bayana kwamba wakati nasubiria ufafanuzi wa serikali taarifa yangu ya hoja binafsi kuhusu katiba inaendelea.

Tarehe 7 Januari 2011 badala ya kutoa ufafanuzi na kueleza azma ya serikali kupeleka suala husika bungeni Rais Jakaya Kikwete akarudia tena mbele ya mabalozi kwenye hafla ya mwaka mpya kuwa anakusudia kuunda moja kwa moja tume ya kuratibu na kuongoza mchakato mzima wa maoni bila kuhusisha bunge katika hatua za msingi.

Kutokana na serikali kuendeleza msimamo huo tarehe 9 Januari 2011 nilitoa tamko kwa umma la kupinga utaratibu wa Rais kuunda moja kwa moja tume ambapo ni kuendeleza hodhi ya serikali na kusababisha mapitio (review) ya katiba na hivyo kuendeleza kasoro za msingi kama zilivyojitokeza katika vipindi vilivyopita. Katika tamko langu hilo nilieleza wazi kuwa kama serikali itaendelea na msimamo wake wa kutaka kuunda tume ya Rais badala ya mchakato husika kuanzia bungeni hali hiyo itadhihirisha serikali kutokuwa na dhamira ya kuandikwa kwa katiba mpya na umma wenyewe. Kutokana na hali hiyo nilitoa tamko ya kuendelea na uamuzi wangu wa kuwasilisha hoja binafsi bungeni ili mchakato husika uanzishwe kwa maazimio ya bunge na kusimamia kwa sheria itayotungwa na bunge.

Siku chache kabla ya kuanza kwa Mkutano wa Pili wa bunge (ambao ulianza tarehe 8 Februari 2011 ) hatimaye serikali kupitia Rais Jakaya Kikwete na Waziri Mkuu Mizengo Pinda ilieleza dhamira ya kulipeleka suala la mchakato wa katiba mpya bungeni kupitia kuwasilisha muswada wa serikali na hivyo kubadili msimamo wa awali wa kutaka kuunda moja kwa moja tume ya Rais na kukubaliana na sehemu ya hoja yangu ya kutaka mchakato husika kuanzishwa na kusimamiwa kwa sheria iliyotungwa na bunge.

Wakati wote nimekuwa nikisisitiza kuwa ipo haja ya suala hili la mchakato wa katiba mpya kupata uhalali wa umma kwa kurejea ibara 8 ambayo inatamka kwamba madaraka na mamlaka ni umma serikali inafanya kazi kwa niaba na Bunge ndicho chombo kikuu cha kusimamia wajibu huo kwa kutokana na mamlaka ya kikatiba yaliyopo kwenye ibara ya 63(2) na (3) na ibara ya 98 inayohusika na mabadiliko ya katiba.

Rais Jakaya Kikwete akihutubia Mkutano wa CCM tarehe 5 Februari 2011 alitoa kauli kuwa Kiserikali matayarisho yanaendelea ya kupeleka Bungeni Mswada wa Sheria wa kuanzisha mchakato wa katiba mpya ikijumuisha kuundwa kwa Tume ya kuongoza mchakato huo. Aidha katika Mkutano huo Rais Kikwete aliwataka wananchi kujitokeza kwa wingi katika kutoa maoni na katika kupiga kura ya maoni itakayoidhinisha katiba hiyo.

Kwa upande mwingine Waziri Mkuu Mizengo Pinda akisoma tamko la serikali bungeni tarehe 8 Februari 2011 alisema kwamba serikali katika kuitikia mwito wa wananchi kuundwa kwa katiba mpya imetangaza kuwa itawasilisha bungeni muswada wa kuundwa kwa tume itayoratibu mchakato wa katiba mpya katika mkutano wa tatu wa bunge la kumi Aprili mwaka 2011.
Wenu katika utumishi wa umma,

John Mnyika (Mb)
Jimbo la Ubungo
30/03/2011

Mbunge Awasilisha Hoja Binafsi Kuhusu Uvamizi wa viwanja vya Wazi

Mbunge wa Jimbo la Ubungo, John Mnyika amewasilisha hoja binafsi kuhusu uuzwaji/uvamizi wa viwanja vya umma maarufu kama viwanja vya wazi kwenye baadhi ya kata za jimbo hilo katika manispaa ya Kinondoni.

Mnyika amewasilisha hoja hiyo kwa Mkurugenzi wa Manispaa ya Kinondoni, Rafael Ndunguru tarehe 21 Machi 2011 kwa ajili ya kujadiliwa katika mkutano ujao wa Baraza la Madiwani wa Halmashauri ya Manispaa ya Kinondoni.

Kwa mujibu wa sheria na kanuni wabunge ni wajumbe wa mabaraza ya madiwani ya halmashauri wanazotoka, hivyo Mnyika kwa nafasi yake ya mbunge wa jimbo la Ubungo ni mjumbe wa Halmashauri ya Manispaa ya Kinondoni.

Mnyika amewasilisha hoja binafsi hiyo kwa mujibu wa kanuni ya 19 ya Kanuni za kudumu za Halmashauri na kanuni nyingine husika.

Katika kipindi cha kati ya mwaka 2005 mpaka 2010 pamekuwepo malalamiko mbalimbali ya wananchi kuhusu uvamizi ama uuzwaji wa viwanja vya umma maarufu kama viwanja vya wazi katika maeneo ya kata mbalimbali za jimbo la Ubungo.

Kutokana na malalamiko hayo Mnyika na viongozi wengine wamekuwa wakitoa shinikizo kwa serikali kuweza kuchukua hatua za haraka ikiwemo kwa kuweka hadharani baadhi ya taarifa za uuzwaji ama uvamizi wa viwanja vya umma.

Kutokana na msukumo huo wa umma tarehe 24 May 2010 Rais Jakaya Kikwete wakati akifanya majumuisho ya ziara ya kukagua hali ya maji katika mkoa wa Dar es Salaam alikiri kuwa yapo maeneo mengi ya wazi yaliyovamiwa na kuwa madiwani wanahusika na sakata hilo.

Kufuatia kauli hiyo ya Rais na malalamiko ya umma aliyekuwa Mkuu wa Mkoa wa Dar es Salaam wakati huo William Lukuvi alitembelea Manispaa ya Kinondoni tarehe 15 Juni 2010 na kubaini mapungufu kadhaa ya kiutendaji kuhusiana na masuala ya ugawaji wa ardhi yakiwemo maeneo ya umma yaliyozoeleka kuitwa viwanja vya wazi.

Baada ya ziara hiyo Mkuu wa Mkoa aliunda kamati maalumu tarehe 18 Juni 2010 ya kuchunguza maeneo yote ya wazi yaliyovamiwa katika mkoa wa Dar es Salaam.

Taarifa ya tume hiyo ilibaini kuwa Manispaa ya Kinondoni inaongoza kwa kuwa na maeneo mengi ya wazi yaliyovamiwa. Maeneo hayo yanahusisha pia viwanja vya wazi katika kata mbalimbali za jimbo la Ubungo ambalo lakini ripoti kamili haijawahi kuwekwa hadharani isipokuwa Mkuu wa Mkoa alitoa tu muktasari wa baadhi ya mambo katika ripoti hiyo; ripoti nzima kwa ujumla wake imefanywa kuwa siri mpaka hivi sasa.

Katika hoja yake Mbunge Mnyika ameelezea kwa kina aina ya uvamizi au uuzwaji wa viwanja vya wazi na kutaka hatua mahususi za kuchukuliwa ambazo ataziweka hadharani wakati wa kuwasilishwa kwa hoja hiyo.

Baadhi ya Viwanja ya wazi/umma ambavyo vimevamiwa au kuuzwa kinyemela katika kata za jimbo la Ubungo ni pamoja Kiwanja Na. 1022 Kitalu E Sinza; Eneo karibu na kiwanja Na. 636 Kitalu E Sinza; Kiwanja Na. 814, 818 Sinza Block D; Eneo jirani na viwanja Na. 75 na 77 Sinza Block D; Eneo lililopo mkabala na kiwanja Na. 475 Sinza B Eneo karibu na kiwanja Na. 23 Sinza C; Eneo karibu na kiwanja Na. 24 Sinza C; Eneo karibu Na. 765, 789, 790, na 797 Sinza C; Eneo la wazi lililozungukwa na viwanja Na. 21, 23, 25, 27, 29 Sinza B; Eneo la wazi lililozungukwa na viwanja Na.72-74.; Eneo la wazi linalozungukwa na viwanja Na. 1, 2, 89, 90, 141 na 142 Sinza E; Eneo la kiwanja cha michezo na Shule ya Msingi Sinza E; Eneo la wazi jirani na viwanja Na. 77, 79, 81, 151-154; Viwanja Na. 9 na 10 Sinza A; Kiwanja Na. 846 Sinza A. ; Jirani na viwanja Na. 18 na 19 Mtaa wa Malala Makurumla; Jirani na viwanja Na. 73, 78, 80, 82, 84 na 86 Mtaa wa Mengo Makurumla; Eneo la wazi lililopo Mtaa wa Kagera Makurumla ; Eneo la wazi nyuma ya Ubungo terminal (“buffer zone” ya reli); Eneo lipo jirani na kiwanja Na. 148; Nyuma ya jengo la RUBADA na viwanja vingine vya kata zingine za jimbo la Ubungo kwa kadiri ya ripoti ya Kamati/Tume iliyoundwa na Mkoa wa Dar es salaam na taarifa za nyingine.

Itakumbukwa kwamba Mbunge wa Jimbo la Ubungo, John Mnyika alishiriki ziara ya Waziri wa Ardhi, Nyumba na Maendeleo ya Makazi, Prof Anna Tibaijuka na viongozi na watendaji wa mkoa wa Dar es salaam iliyofanyika tarehe 14 Disemba 2010.

Mnyika alishiriki ziara hiyo kama sehemu ya kuunga mkono jitihada za kuhakikisha maeneo ya matumizi ya umma (ambayo yamezoeleka kuitwa viwanja vya wazi )yanalindwa na kuendelezwa.
Katika ziara hiyo Mnyika alimpongeza Waziri kwa kuamua kuanza kulifuatilia suala la viwanja vya umma vilivyovamiwa ama kuuzwa kinyemela kwa kuwa ni ajenda ambayo hata yeye kama mbunge wananchi wa jimbo lake la Ubungo walimtuma kuisimamia.

Mnyika alitoa mwito kwa Wizara husika na mamlaka za Mkoa wa Dar es salaam kuiweka wazi ripoti ya tume iliyoundwa mwaka huu kuchunguza kuhusu maeneo ya wazi (maarufu kama Tume ya Lukuvi) ambayo mpaka sasa imegongwa muhuri wa siri.

“Ripoti hiyo ikiwekwa wazi, hatua stahili zinaweza kuchukuliwa kwa haraka zaidi kurejesha maeneo husika kwa matumizi ya umma na kuchukua hatua kwa wote waliotoa vibali vya ujenzi kinyemela ama hati za viwanja kinyemela na kuuza viwanja husika katika mazingira yenye tuhuma za ufisadi”.

Aidha Mnyika alimuomba Waziri wa Ardhi kutembelea pia viwanja vya umma vilivyovamiwa katika jimbo la Ubungo kwenye kata ya Sinza, Makurumla pamoja na maeneo yenye migogoro ya ardhi ili hatua za haraka zaidi ziweze kuchukuliwa. Waziri alikubali ombi hilo na kuahidi kutembelea maeneo husika katika ziara zake za baadaye.

Siku hiyo hiyo ya tarehe 21 Machi 2011 wakati Mnyika akiwasilisha hoja binafsi kwa mkurugenzi kuhusu viwanja vya umma kwa upande mwingine Waziri wa Ardhi, Profesa Anna Tibaijuka amemuomba Rais Jakaya Kikwete wakati alipotembelea Wizara yake kumkingia kifua katika kurejesha viwanja vilivyoporwa.

MBUNGE AELEZWA CHANZO CHA WIZI KUIBUKA TENA KATIKA ENEO LA UBUNGO MATAA

Mbunge wa Jimbo la Ubungo, John Mnyika ameelezwa chanzo cha kuibuka tena kwa wimbi la wizi katika eneo la Ubungo mataa linalounganisha barabara za Morogoro, Mandela na Sam Nujoma.
Mnyika alielezwa hayo na Diwani wa Kata ya Ubungo Boniface Jacob alipomuita ofisi ya mbunge Jimbo la Ubungo jana (24 Machi 2011) kueleza sababu za kuibuka tena kwa vibaka na waporaji kwenye eneo hilo katika siku za karibuni ili hatua za haraka ziweze kuchukuliwa kudhibiti hali hiyo.

Awali Mnyika aliumueleza Diwani kuwa katika kipindi cha kuanzia mwishoni mwa mwezi Februari na mpaka mwezi Machi amepokea malalamiko toka kwa wananchi wenye magari na wanaotembea kwa miguu katika maeneo hayo kuporwa mali zao katika eneo hilo ambalo vitendo hivyo vilidhibitiwa mwanzoni mwa mwaka 2011 kutokana na ulinzi shirikishi.

Itakumbukwa kwamba katika kipindi cha miaka iliyopita palikuwa na wimbi kubwa la wizi katika eneo hilo ambavyo vilidhibitiwa kuanzia mwishoni mwa mwaka 2010 na mwanzoni mwa mwaka 2011 baada ya kutokea kwa mabadiliko katika kimkakati katika jeshi la polisi na kiungozi wa kisiasa na hivyo kufanya suala la usalama katika eneo hilo kupewa kipaumbele cha ziada.

Kwa upande wa Jeshi la Polisi Kamanda wa Kanda Maalum wa Mkoa wa Dar es salaam Seleman Kova na Kamanda mpya wa polisi Mkoa wa Kinondoni Charles Kenyela waliweka mkazo kwenye ulinzi shiriki ukiungwa mkono na Diwani mpya wa kata ya Ubungo Boniface Jacob na mbunge wa jimbo hilo.

Kama sehemu ya hatua zilizochukuliwa paliundwa kikundi cha vijana wa ulinzi shirikishi ambacho kilipatiwa vifaa na wadau na kuanza kazi ya kushirikiana na jeshi la polisi na hivyo kupunguza kwa kiasi kikubwa vitendo vya wizi katika eneo hilo hususani katika kipindi cha mwezi Januari mpaka Februari 2011.

Diwani Boniface Jacob alimueleza mbunge kwamba chanzo cha kuibuka kwa hali hiyo ni vitendo vinavyofanywa na baadhi ya askari polisi wasiowaaminifu ambao kwa miaka kadhaa walikuwa wakishirikiana na wezi kuanza tena kuuhujumu mfumo wa ulinzi shirikishi uliowekwa kwa kuwakamata vijana ambao walikuwa wakifanya ulinzi katika eneo hilo na hivyo kuwaacha vibaka na waporaji kurejea katika eneo hilo kwa kuwa wanahongwa mgawo.

Mnyika alimuelekeza Diwani kukutana na Kamanda wa Polisi Mkoa wa Kinondoni Charles Kenyela kumweleza kwa kina suala hilo hili hatua za haraka ziweze kuchukuliwa na jeshi hilo kuhakikisha usalama wa raia katika eneo hilo hususani nyakati za jioni.

“ Kwa kuwa sasa niko katika jukumu la kuwawakilisha wananchi kwenye vikao vya kamati ya nishati na madini ya bunge vinavyoendelea hivi sasa, niwakilishe katika kukutana na uongozi wa jeshi la polisi. Na usisite kuwataja kwa majina askari wanaotuhumiwa kushirikiana na wezi toka maeneo ya nje ya kata ya Ubungo kuja kufanya wizi katika eneo letu ili hatua stahiki ziweze kuchukuliwa kulinda usalama wa wananchi na mali zao”, Alisema Mnyika.

Wananchi kuandamana kuhusu bomoa bomoa Ubungo

LICHA ya Rais Jakaya Kikwete kuwaonya viongozi wa Chadema kwa kuandaa maandamano na kupandikiza kile alichoita mbegu mbaya za chuki dhidi ya serikali, Chama hicho kipo katika harakati za kuongoza maandamano mengine, jijini Dar es Salaam.Hayo yatakuwa maandamano ya tatu kufanywa na Chadema tangu kumalizika kwa uchaguzi mkuu Oktoba Mwaka jana.

Maandamano ya kwanza yalifanyika mkoani Arusha kupinga uchaguzi wa Meya wa jiji hilo na maandamano mengine yakafanyika katika mikoa ya Kanda ya Ziwa.Maandamano ya Dar es Salaam ambayo Mbunge wa Jimbo la Ubungo, John Mnyika (Chadema) amethibitisha kuyaongoza, yatafanywa na wananchi wanaoishi kando ya barabara ya Morogoro, kuanzia eneo la Ubungo mpaka Kimara ambao nyumba zao zipo katika mpango wa kubomolewa kupisha upanuzi wa barabara hiyo.

“Mmesema mmemwandikia barua Mkuu wa Mkoa, Waziri wa Ardhi, Nyumba na Maendeleo ya Makazi, Waziri wa Ujenzi, Mkurugenzi wa jiji na Mkuu wa wilaya ya Kinondoni kuomba msaada na kukutana nao lakini hamjajibiwa lolote,” alisema MnyikaAliongeza, “Kama ni hivyo pitisheni azimio ili serikali itoe ufafanuzi wa sakata hili. Wapeni siku saba ili wawajibu, wakishindwa kufanya hivyo, itabidi mwende kwa Waziri Mkuu mkamweleze matatizo haya, mtaniambia tu ni lini, mimi pia nitashiriki.

”Mnyika alisema kama mwakilishi wa wananchi bungeni na kwa mujibu wa Katiba Ibara ya 63 (2), kama sakata hilo litakuwa halijapatiwa ufumbuzi, atalipeleka bungeni ili lijadiliwe.“Kwanza naweza kuliuliza kama swali la papo kwa papo, ikishindikana nitalichangia katika hoja mbalimbali, pia hiyo ikishindikana nitalipeleka suala hili kama hoja binafsi,”alisema Mnyika.Aliongeza, “Ila njia nzuri kwangu ni kulipeleka suala hili kama ombi, tena sio langu bali ni ombi la wananchi. Hili litakwenda bungeni kama hoja ya wananchi.

”Baada ya kauli hiyo, Mwenyekiti wa Kamati ya waathirika wa bomoa bomoa hiyo ambao wamepewa siku 60 wawe wameondoka maeneo hayo, Naomi Alimanoti alipitisha azimio hilo na kuongeza kuwa wanaipa serikali siku saba zinazoanzia kesho.“Tutakutana Jumamosi ijayo, pale pale katika eneo letu la siku zote ili kuona kama tumejibiwa ama laa. Kama tutakuwa hatutajibiwa tutaandamana hilo halina mjadala. Hapa mpaka kieleweke, hatuwezi kuvunjiwa nyumba zetu wakati tuna hati halali na sheria inatulinda,” alisema Alimanoti.

Awali Mnyika alisema kuwa propaganda zinazoenezwa kwamba Chadema wanapinga mikakati mbalimbali ya maendeleo si za kweli bali maendeleo hayo yanatakiwa kufanywa bila kukiuka sheria na haki.“Iweje mwaka 1973 katika ubomoaji wa nyumba katika barabara hii watu walipwe, lakini hivi sasa watu hawa waambiwe kuwa wamevamia eneo la hifadhi ya barabara,” alihoji Mnyika.Kwa mujibu wa Mnyika, katika eneo hilo kuna nyumba ambazo zitaathirika kutokana na mradi wa mabasi yaendayo kasi (DAT) hivyo akatoa wito kwa serikali kumjibu kimaandishi juu ya miradi yote ya barabara katika eneo hilo kwa kuwa inawezekana wanaobomolewa nyumba zao wakati eneo lenyewe halihusiki na mradi wowote.

“Kwa tafsiri ya serikali, wananchi walioko katika eneo la barabara hii hawatalipwa fidia, mwaka 1997 mpaka 2001 watu walivunjiwa na hawakulipwa kwa maelezo kwamba wote walilipwa mwaka 1973,” alisema Mnyika.Alifafanua kuwa serikali inatakiwa kutorudia makosa ya mwaka 1997, ambapo wakimbizi wa Tanzania walihifadhiwa ndani ya nchi yao wenyewe.

“Waliovunjiwa kipindi hicho walihifadhiwa katika ofisi za Umoja wa Mataifa jijini Dar es Salaam, serikali isipokuwa makini itatengeneza mazingira ya mwaka 1997. Katika hili hauwezi kukaa kimya, tena bomoa bomoa hii si Kimara ni karibu mikoa yote nchini,”alisema Mnyika.

Mnyika aliwataka wananchi hao kujiorodhesha ikiwa ni pamoja na kuwa na vielelezo vyao vyote kwa kuwa kati yao wapo waliovamia na wapo walio na umiliki halali wa maeneo hayo.Alisema wanatakiwa kuwa na jopo la mawakili watakaowasimamia katika kesi ambayo wataifungua kama hatua zote watakazozichukua zitagonga mwamba pamoja na kuandaa utaratibu wa kufanya uthamini wa nyumba zao kabla hazijavunjwa.

Mnyika aliendelea kueleza kuwa jambo lolote linapotokea kabla ya kuanza kulizungumza, inatakiwa ufanyike uchunguzi na kusisitiza kuwa ilitakiwa uchunguzwe uhalali wa wananchi wa Kimara kudai haki zao kwanza kuliko kuanza kuwashutumu kuwa wanapinga maendeleo.“Huu si wakati wa serikali kuendeshwa kwa shinikizo.

Ni wakati wa kuchunguza na kujua ukweli. Hatua yoyote itakayochukuliwa na wananchi hawa itakuwa ya kidemokrasia,”alisema Mnyika.Mmoja wa wananchi hao, Charles Mwandembwa alisema kuwa Rais Jakaya Kikwete anatakiwa kuwa makini, kwa kuwa wanaomwangusha ni watendaji wake ambao wamekuwa waking’ang’ania kuwaondoa wananchi wa Kimara ili wao wamiliki ardhi.

Naye Joshua Mlekani alisema wanatakiwa kuweka kutafuta zuio la Mahakama ili ubomoaji wa nyumba katika eneo hilo, usitishwe kwa muda ili wapate nafasi ya kufuatilia haki zao.Mwisho


Chanzo: Mwananchi-6/3/2011

Serikali itoe kauli katika wiki ya maji

Tarehe 22 Machi 2011 ni kilele cha wiki ya taifa ya maji ambayo pia ni siku ya kimataifa ya maji ambapo ujumbe wa mwaka huu ni “Maji kwa ajili ya Miji: Kukabiliana na changamoto mbalimbali mijini”.

Maadhimisho ya mwaka huu kwa ngazi ya Mkoa wa Dar es salaam yatafanyika katika kata ya Mburahati ndani ya Jimbo la Ubungo katika Manispaa ya Kinondoni.
Pamoja na kushiriki katika uzinduzi wa miradi ya maji, nitatumia siku hiyo kuendelea kufanya ufuatiliaji na kuisimamia serikali ili kuweza kuongeza kasi ya utekelezaji wa mipango ya sekta husika.

Nakubaliana na uamuzi wa serikali uliofanyika mwezi Machi wa kuweka programu maalumu ya kuongeza upatikanaji wa huduma za maji safi na maji taka katika mkoa wa Dar es salaam kama moja ya vipaumbele katika muongozo wa bajeti ya mwaka 2011/12 kuwa kuwa umeendana na mwito ambao tuliutoa katika Kongamano la Maji Jimbo la Ubungo lililofanyika tarehe 31 Januari 2011.

Aidha nakubaliana na uamuzi wa serikali wa kutaka kutenga bilioni 654 kwa ajili ya kuteleza mpango husika huku asilimia 80 za fedha hizo zikipangwa kutoka kwenye vyanzo vya ndani; hata hivyo uamuzi huo utakuwa wa maana ukianza kutekelezwa kwa ukamilifu kuanzia mwaka huu wa fedha. Uchimbaji wa Visima virefu Kimbiji na Mpera na ujenzi wa bwawa la Kidunda pamoja na uboreshaji wa miundombinu ya Ruvu juu na Ruvu chini ni mipango inayopaswa kuungwa mkono na kufuatiliwa kwa karibu na kila mpenda maendeleo.
Hatahivyo, siridhishwi na viwango na kasi ya utekelezaji wa mipango husika. Kati ya mwaka 2005 mpaka 2010 kiwango cha fedha ambacho kimetumiwa na DAWASA/DAWASCO na mamlaka zingine kutokana na fedha za umma ikiwemo mikopo toka kwa washirika wa kimaendeleo hakilingani na ubora wa miundombinu na huduma inayopatikana; hivyo mifumo thabiti ya usimamizi na ukaguzi inahitajika ili hatua stahili ziweze kuchukuliwa.
Natoa mwito kwa mamlaka mbalimbali za kiserikali kutumia kilele cha siku ya maji kutoa taarifa za kina zaidi kwa umma kuhusu utatuzi wa kero ya maji kwa wananchi wa mkoa wa Dar es salaam hususani wa jimbo la Ubungo.

Mathalani akihutubia Bunge mwezi Juni mwaka 2010 wakati wa kuwasilisha makadirio ya bajeti ya Wizara ya Maji ya mwaka wa fedha 2010/11 Waziri Mark Mwandosya aliahidi kwamba usanifu wa bwawa la Kidunda linatarajiwa kutoa mchango mkubwa wa utatuzi wa kero ya maji kwa wananchi wa Ubungo ungekamilika mwezi Septemba mwaka huo wa 2010; lakini mwezi Machi mwaka huu Waziri ametoa kauli tofauti kuwa upembuzi yakinifu wa ujenzi wa bwawa hilo utakamilika mwezi Juni mwaka 2011 na ujenzi mwaka 2013. Natoa mwito kwa Waziri Mwandosya kueleza wananchi wa Ubungo na watanzania kwa ujumla sababu za kuchelewa kwa mpango huo na mikakati iliyopo ya kuhakikisha bwawa husika linajengwa mapema zaidi ya muda uliotangazwa.

Aidha wakati hatua hizi za muda mrefu zinaendelea kutekelezwa ni muhimu kwa DAWASA, DAWASCO, Manispaa na Wizara husika kuongeza kasi ya kuchukua hatua za muda mfupi za kupunguza kero ya maji kwa kutimiza wajibu ipasavyo.

Mfano mwezi Mei mwaka 2010 Rais Jakaya Kikwete alifanya ziara katika jimbo la Ubungo kata za Mburahati na Kimara eneo la Mavurunza na kuahidi idadi maalum ya visima ambavyo serikali imengevichimba lakini mpaka sasa ahadi hiyo haijatimizwa kwa ukamilifu wake katika muda ambao uliahidiwa. Hivyo, kupitia siku hii ya maji ni muhimu kwa Rais Kikwete au wasaidizi wake kutoa kauli kuhusu utekelezaji wa ahadi husika ama sivyo itabidi tuunganishe nguvu ya umma katika kuchukua hatua za ziada kukabiliana na kero husika ambayo inawasumbua wananchi miaka 50 baada ya uhuru wa nchi yetu.

Kadhalika, upungufu wa maji unachangiwa pia na upotevu wa maji uliopo sasa wa karibu asimilia hamsini (50%) ambao unaambatana na hujuma mbalimbali katika ratiba za mgawo wa maji katika baadhi ya maeneo. Katika kikao cha saba tarehe 18 Februari 2011 niliuliza Swali la Nyongeza kutokana na majibu ya Swali namba 85 kwa Wizara ya Maji. Kwenye swali langu la Nyongeza kuwa pamoja na uwekezaji wa fedha za miradi ya maji za Benki ya Dunia na Wadau wengine wa maendeleo kwenye Ruvu Juu na Ruvu chini ikiwemo kuweka mtandao mpya wa mabomba ya maji maarufu kama mabomba ya wachina; bado maji kwenye kata za Kwembe, Kibamba, Msigani, Mbezi, Saranga, Kimara nk maji hayatoki kwa pamoja na mambo mengine upotevu wa maji na wafanyabiashara wanauza maji bei juu kujiunganishia kinyemela; je Naibu Waziri yuko tayari kufanya ziara ya kukagua miundombinu ya maji ili hatua za haraka ziweze kuchukuliwa? Naibu Waziri alijibu kwa kunipongeza kwa kuweka kipaumbele cha kwanza suala la maji katika kazi zangu na kuahidi kutembelea miundombinu husika. Hata hivyo, ziara ya kutembelea miundombinu husika katika maeneo ambayo wananchi wametoa tuhuma mbalimbali bado haijafanyika. Natoa mwito kwa Wizara husika ambayo ofisi zake zipo ndani ya Jimbo la Ubungo, DAWASCO au Kamati husika ya Bunge kutumia fursa ya maadhimisho ya siku ya maji ambao ujumbe wake mwaka huu ni muhususi kwa mijini kutembelea maeneo husika na kuchukua hatua ili maadhimisho ya mwaka huu yaweze kuchukua sura tofauti kwa kushughulikia kero za msingi za wananchi katika sekta ya maji badala ya hotuba za viongozi pekee.

Imetolewa tarehe 20 Machi 2011 na:

John Mnyika
Mbunge wa Ubungo

MNYIKA AANDAA BONANZA LA SOKA KUADHIMISHA SIKU YA WANAWAKE

Mbunge wa Jimbo la Ubungo, John Mnyika ameandaa bonanza la soka kwa wanawake katika kuadhimisha siku ya Wanawake Duniani.

Bonanza hilo la siku mbili litafanyika katika Uwanja wa Santos Barafu kuanzia tarehe 8 Machi mpaka 9 Machi mwaka 2011.

Bonanza hilo litashirikisha jumla ya timu nne za wanawake; tatu za wanawake katika jimbo la Ubungo za Mlimani, Mburahati na Uzuri pamoja na timu mwalikwa ya Tanzanite toka jimbo la Kinondoni.

Wabunge wanawake wa viti maalum wa CCM na CHADEMA toka manispaa ya Kinondoni na madiwani wa viti maalum jimbo la Ubungo wamealikwa kuwa wageni rasmi kwenye mechi za ufunguzi wa Bonanza hilo wakati mbunge wa Jimbo hilo, John Mnyika atakuwa mgeni rasmi katika kilele cha bonanza hilo.

Izingatiwe kuwa tarehe 8 Machi ni siku ya Wanawake Duniani ambayo kwa mwaka huu ujumbe wake kimataifa ni “Fursa sawa ya elimu na teknolojia ni njia ya ajira bora kwa wanawake”.

Ni muhimu kwa vijana wa kike, wanawake na mashabiki wengine wa soka kujitokeza katika bonanza hilo ambalo halitakuwa na kiingilio chochote ambalo litafanyika kwenye uwanja huo wa wazi uliopo katika kata ya mburahati.

Mechi za Bonanza hilo zitatoa fursa ya kufikisha ujumbe kuhusu masuala mbalimbali yanayowagusa wanawake hasa katika wakati huu ambao dunia inaadhimisha miaka mia moja toka kuanza kwa siku hiyo ya wanawake mnamo mwaka 1911.

TAMKO LA AWALI KUHUSU KUBOMOLEWA KWA SOKO LA URAFIKI

Tarehe 2 Machi 2011 nikiwa mkoani Kagera kwenye maandamano ya kitaifa ya kupinga kupanda kwa gharama za maisha, kupanda kwa bei na mgawo wa umeme, , kutaka uchaguzi wa Meya wa Arusha, kutaka waziri wa ulinzi awajibike kutokana na milipuko na mabomu ya Gongo la Mboto na kupinga malipo ya fidia kwa kampuni ya Dowans yenye mitambo yake katika jimbo la Ubungo- masuala ambayo yanagusa maisha ya watanzania wakiwemo wakazi wenzangu wa jimbo la Ubungo; nimepokea taarifa za kuvunjwa kwa Soko la Wafanyabiashara wa mitumba Urafiki maarufu kama “Big Brother” usiku wa kati ya saa 6 na 7 wa kuamkia siku hiyo.

Awali ya yote ieleweke wazi kuwa kwa nafasi ya yangu ya ubunge wa Ubungo naunga mkono uamuzi wa upanuzi wa Barabara ya Morogoro kwa ajili ya njia ya mabasi ya haraka mkoani Dar es salaam (DART) kwa kuwa ni kati ya masuala ambayo niliyaweka mstari wa mbele kwenye miundombinu na kwa miaka kadhaa nimekuwa nikiilaumu serikali kwa uzembe wa kuchelewesha utekelezaji wa mradi husika.

Hata hivyo, nalaani hatua ya serikali kutokuwa makini katika utendaji wake kwenye utekelezaji wa miradi na hatimaye kusababisha migogoro isiyokuwa ya lazima na madhara katika mali za watu kama ilivyokuwa kwenye uvunjaji wa soko la mitumba la Urafiki maarufu kama Big Brother.

Ni muhimu umma wa watanzania ukafahamu kuwa wafanyabiashara wa eneo la Urafiki Big Brother hawakuvamia eneo husika bali walihamishiwa na manispaa ya Kinondoni toka eneo la Manzese Darajani na kutengewa eneo husika kwa ajili ya mabanda yao ya biashara ya mitumba. Hivyo, uamuzi wowote wa kuwahamisha ulipaswa kuambatana na maandalizi thabiti ya eneo mbadala la kufanyia biashara zao ama sivyo serikali inakuwa imeingia katika kashfa ya kuondoa watu wake kwa ajira zao bila sababu za msingi.

Pia, serikali makini inapaswa kutoa taarifa za ukweli na kwa wakati kwa wananchi wake katika hatua zote za utekelezaji wa miradi katika masuala yanayowagusa wananchi. Kimsingi, katika suala la uvunjaji wa soko la Mitumba la Urafiki maarufu kama Big Brother serikali imeshiriki kutoa taarifa za uongo kwa wananchi na pia waliotumwa kutekeleza zoezi husika wanatuhumiwa kufanya wizi. Pia, hatua za kuwaondoa kwa notisi ya siku chache ni kuweka mazingira ya hasara na kuwakosesha ajira na hivyo kuchangia katika kuongeza umasikini hususani kwa wanawake na vijana.

Ni muhimu wananchi wakafahamu kwamba tarehe 1 Februari mwaka 2011 tulifanya ziara ya kukagua miradi ya Barabara mkoani Dar es salaam na kati ya miradi ambayo tuliikagua ni ya Barabara hiyo ya Morogoro kuhusiana na mradi wa mabasi yaendayo haraka (DART) na kati ya maeneo tuliyotembelea ni hilo la soko la mitumba Urafiki maarufu kama Big Brother.

Tukiwa kwenye eneo hilo mbele ya baadhi ya wafanyabiashara hao ndogondogo wakiongozwa na Mwenyekiti wa Soko hilo Iddi Toatoa maofisa wa mradi wa mabasi ya haraka (DART) waliulizwa kwa mujibu wa mipango ya mradi wao ni jambo gani linahitajika kufanyika katika eneo hilo ili mradi utekelezwe kwa haraka. Ilielezwa kwamba kinachohitajika ni kusogezwa kwa nguzo moja ya umeme ambayo itahusishwa kuondolewa kwa muda kwa vibanda vichache kuwezesha nguzo hiyo kuhamishwa na kwamba biashara ya mitumba katika eneo hilo ingeendelea kama kawaida.

Maelezo hayo yalitolewa mbele ya Afisa Tawala wa Manispaa ya Kinondoni Ndugu Benard ambaye alikuwa akimwakilisha mkuu wa Wilaya Jordan Rugimbana na mbele yangu pamoja na maofisa wengine wa mamlaka mbalimbali wakiwakilisha manispaa, wakala wa barabara (TANROADS).

Katika mazungumzo hayo ilielezwa kwamba Afisa Tawala Manispaa ya Kinondoni atatoa taarifa kwa mkuu wa wilaya na pia Mkurugenzi wa Manispaa ili hatimaye manispaa ambayo ndiyo wameingia makubaliano na wafanyabiashara wa eneo husika kuweza kufanya taratibu ili kazi husika iweze kufanyika.

Taarifa hiyo ya ukaguzi wa miradi ikiwemo kuhusu eneo husika ilitolewa kwenye kikao cha bodi ya barabara cha tarehe 2 Februari 2011 ambacho mimi ni mjumbe. Katika vikao hivyo, hakukutolewa maelezo ya kwamba soko zima litavunjwa badala yake kilichoelezwa ni uhamishaji wa nguzo. Na wakati wote manispaa imekuwa ikisisiza kwamba kwa wafanyabiashara wataothirika watapatiwa maeneo mbadala ya kufanyia biashara zao.

Toka tarehe hiyo, serikali haikutangaza kwa umma hatua mbadala na kuwezesha wafanyabiashara hao kwenda maeneo mbadala mpaka nilipotaarifiwa siku ya tarehe 2 Machi 2011 baada ya kuvunjiwa kuwa Mkurugenzi wa Manispaa ya Kinondoni alitoa ilani yenye tarehe 14 Februari 2011 iliyosainiwa kwa niaba yake na L.B.KIMOI kuwataarifu watu wote waliojenga mabanda yao yaliyopo ndani ya hifadhi ya barabara ya Morogoro kwenye soko la mitumba la Urafiki kuwa wabomoe na kuondoa mali zao kwa muda wa siku tatu kuanzia tarehe ya ilani tajwa; kwa wengi wa wafanyabiashara hao ilani hiyo ilifika ikiwa imechelewa. Nimeelezwa kwamba kutokana na kuchelewa huko wafanyabiashara hao waliuandikia barua mkurugenzi wa manispaa ya tarehe 1 Machi 2011 wakiomba kupatiwa maeneo mbadala ili waweze kuhamia huko.

Wakati hatua hizo zikiendelea usiku wa siku hiyo hiyo ndipo uvunjaji ukafanyika ambapo wafanyabiashara wanatuhumu kuharibiwa na kuibiwa mali zao na mgambo wa manispaa ambao ndio waliotumwa kutekeleza zoezi husika.

Kutokana na hali hiyo kupitia taarifa hii ya awali natoa matamko yafuatayo:
Mosi; Serikali ikutane na wafanyabiashara hao walioathirika kubaini athari walizozipata na kuwapatia eneo mbadala la biashara kwa kushughulikia mapendekezo yaliyoko kwenye barua yao ya tarehe 1 Machi 2011 ambayo baadhi yake yako ndani kabisa ya uwezo wa manispaa.

Pili; Manispaa ifanye uchunguzi kuhusu vitendo vya uwizi vinavyoelezwa kufanywa na mgambo waliotuma kufanya zoezi husika na kueleza sababu za zoezi hilo kufanyika usiku. Serikali inastahili kuchukua hatua na kutoa fidia ya uwizi huo.

Nne; tarehe 2 Machi 2011 baada ya tukio hilo nilimtuma Diwani wa Kata ya Ubungo Boniface Jacob kufanya mazungumzo ya awali na wafanyabiashara husika pamoja na kuhamasisha utulivu wakati hatua zikiendelea kuchukuliwa, kati ya mambo ambayo yalijitokeza katika mazungumzo yao ni hoja ya wafanyabiashara kutaka kufanya maandamano na haja ya kuchukua hatua za kisheria. Nimepokea mapendekezo hayo na tutafanya maamuzi ya pamoja nikirejea.

Tatu; Katika muktadha huo naitisha Mkutano na wafanyabiashara husika pamoja na watanzania wengine ambao wanatarajiwa kuathiriwa na upanuzi wa barabara ya Morogoro kwa ajili ya mradi wa mabasi yaendayo haraka (DART) ili kupeana taarifa na kukubaliana kuchukua hatua mbalimbali. Mkutano huo utafanyika eneo la Kimara Baruti uwanja wa Central kuanzia saa 4 asubuhi mpaka saa 7 Mchana siku ya jumamosi ya tarehe 5 Machi 2011 ambapo nitakuwa nimerejea jimboni Ubungo. Tamko langu kamili nitalitoa baada ya mkutano huo.

Iwapo Mkurugenzi wa Manispaa ya Kinondoni na Mkuu wa Wilaya ya Kinondoni hawatatoa taarifa ya kujitosheleza kuhusu suala husika ikiwemo kukutana na waathirika wa bomoa bomoa hiyo kabla au kupitia mkutano huo basi tutajibika kupeleka suala husika kwa mamlaka ya juu zaidi katika hatua ya sasa ikiwa ni kwa Waziri Mkuu Mizengo Pinda ambaye pia ni msimamizi wa Tawala za Mikoa na Serikali za Mitaa na kuunganisha nguvu ya umma ili suluhisho la mapema liweze kupatikana.

Wenu katika utumishi wa umma,

John Mnyika
Mbunge-Jimbo la Ubungo
03/03/2011-Kagera

Taarifa ya Mkutano wa Mbunge na Wananchi Goba

TAARIFA YA MKUTANO WA MBUNGE WA JIMBO LA UBUNGO NA WANANCHI W A KATA YA GOBA TAREHE 27/02/2011.

Utangulizi
Mnamo tarehe 07/02/2011 Mbunge wa Jimbo la uchaguzi Ubungo aliziandikia mamlaka za kiserikali barua yenye kumb: OMU/UW/002/2011 kutoa taarifa kuwa atakuwa na mkutano wa hadhara wa kiserikali katika kata ya Goba eneo la Mwembemadole tarehe 27/02/2011 kuanzia saa tisa alasiri hadi saa kumi na mbili jioni.

Lengo la mkutano tajwa lilikuwa kuzungumza na wananchi kuhusu mambo mabalimbali ya kimaendeleo hususani sekta za Maji, Ardhi, Umeme, Barabara pamoja na ulinzi na usalama.

Mkutano huo ulifanyika kama ulivyokuwa umepangwa na kuhudhuriwa na Afisa Mtendaji wa Kata ya Goba, Diwani wa Kata ya Goba, Diwani wa viti maalumu wa Kata ya Goba pamoja na mwenyekiti wa mtaa wa Goba.

Ufunguzi
Afisa Mtendaji wa Kata ya Goba alifungua mkutano saa 9:25 alasiri na kumkaribisha Diwani wa Kata hiyo Mh. Kisoki ili aweze kutoa nasaha na maelezo kwa ufupi kabla ya kumkaribisha Mbunge. Diwani alitoa maelezo ya awali kama ifuatavyo;
Diwani alimshukuru Mbunge wa kuitisha Mkutano na wananchi ambao ndio mkutano wa kwanza kufanyika kwenye kata ya Goba toka uchaguzi wa mwaka 2010 na kutumia fursa hiyo kumshukuru wananchi kwa kumchagua yeye pamoja na mbunge.
Usafiri; alisema lipo daraja la kuunganisha Goba na Makongo ambapo tayari mkandarasi DEL MONTE amekwisha kuteuliwa ili ujenzi uanze.
Ulinzi na Usalama; wamewasiliana na polisi ili kuwe na uwezekano wa kujenga kituo cha polisi na wakapewa kazi ya kutafuta eneo ili kituo kijengwe. Eneo limepatikana ingawaje nusu ya shamba hilo lina kesi na wanafanya utaratibu wa kuanza kutumia sehemu ambayo haina kesi ili kuanza ujenzi. Alisema pia wanafanya mchakato wa kujenga vituo vidogovidogo ili kuweza kuboresha ulinzi kulingana na jiografia ya eneo la Goba ambayo ni kubwa mno.

Ardhi; alimuomba Mbunge kubeba swala la fidia kwa wananchi kwa wale ambao maeneo yao yanapitiwa na miradi hasa ya barabara kwa sababu swala hilo lineleta migogoro baina ya wananchi na mamlaka za kiserikali. Na pia alimuomba Mbunge kusemea barabara ya Mbezi Luis Tangi Bovu kupitia Goba ijengwe kwa kiwango cha lami. Pia Kata ya Goba ina mapori mengi sana na pindi wananchi wanapotaka kuyatumia wanaambiwa kuwa yanamilikiwa. Hivyo Diwani alimuomba Mbunge kufuatilia hilo ili pale inapowezekana wananchi wajue ni maeneo gani ambayo wanaweza kuyatumia.

Maji; Diwani alitoa taarifa kuwa Kata ya Goba miradi ya maji mitatu na tayari mradi wa Goba-Kisauke umekamilika kwa kuwa tank limeshajengwa na maji yataanza kuingia usiku wa siku hiyo na tatizo lililopo sasa ni miundombinu kwa ajili ya usambazaji. Mradi wa maji Goba alisema wenyewe unaendelea kuhudumia wananchi. Lakini kamati iliyokuwepo ilishamaliza muda wake na ilishindikana kuivunja kutokana na uchaguzi na pia zipo kazi ambazo zilikua hazijakamilika. Alisema kuwa tayari walishawatangazia wananchi kuwa wateue wawakilishi wawili kila mtaa ili waweze kuingia kwenye kamati ya maji kwenye kikao cha tarehe 06/03/2011.

Baada ya maelezo/ taarifa hiyo Diwani alimkaribisha Mbunge, lakini baada ya kuwasalimia wananchi aliomba kwanza isomwe risala ya wananchi ndipo ataweza kuhutubia wananchi katika mkutano huo.

Risala ya wananchi

Risala ya wananchi ilisomwa na Bw. Dickson mbele ya Mbunge, viongozi wengine pamoja na wananchi . Pamoja na mambo mengine risala hiyo ilijikita kwenye kero sugu ya maji ambayo lawama kubwa ilipelekwa kwa kamati ya muda ya mwaka 2007.

Malalamiko ya wananchi kupitia risala yao ni kama ifuatavyo;

Kwamba kuna unyanyasaji katika upatikanaji wa maji kwa kuwa kuna ubaguzi katika mgawanyo wa huduma hii pale inapopatikana na kwa ujumla kuna upendeleo kwa kuwa kuna wafanyabiashara wa matofali wanapata maji ya kumwagilia matofali huku wananchi wakiendelea kutaabika.

Kuhoji utendaji wa kamati ni kikwazo kwa wananchi, hii inatokea pale baadhi ya wananchi kusingiziwa tuhuma za kuweka sumu kwenye maji ya mradi pale wanapojaribu kuhoji utendaji wa kamati ya maji au wanapoikosoa.
Pia wananchi walisema kuwa kamati ya maji iliyopo sio halali kwa kuwa ilikuwa ni kamati ya muda ilipoundwa mwaka 2007 na kuamriwa kutoa ripoti yake kwa wananchi lakini kamati hiyo haikufanya hivyo toka kipindi hicho mpaka leo.

Pia kuna njama kati ya Dawasco na watendaji wa kamati iliyopo katika kudanganya kiwango cha maji ya kinachotumika swala ambalo linafanya kiwango cha maji kinachotumika kwa mujibu wa mita za Dawasco kuwa tofauti na hali halisi ya maji yanayowafikia wananchi na maji wanayotumia.

Pia kamati hii haina akaunti maalumu ya mradi huu kitu ambacho kinafanya Mwenyekiti na Katibu wa mradi huu kuwa na akaunti ya pamoja ambayo siyo ya mradi. Na wananchi wana mashaka na utendaji wa watu hawa.
Mambo mengine yaliyozungumzwa na wananchi katika risala yao ni pamoja na haja ya kuwa na barabara ya kiwango cha lami pamoja na barabara za mitaa na pia walidokeza kuwa swala la salama linahitaji kupewa uzito wa uwajibikaji kwa kuwa katika kayo kuna changamoto nyingi sana za kiusalama.

Pendekezo : Msomaji wa risala alimalizia kwa kusema kuwa umma uliopo katika mkutano huo ndo uamua kuhusu mapendekezo.

Baadhi ya wananchi walitoa maoni yao baada ya risala hiyo kama ifuatavyo;

i. Wananchi wa Goba wawe kitu kimoja katika kutetea maswala mbalimbali ya kimaendeleo na kuzingatia kwa umakini yale yaliyoainishwa kwenye risala hiyo ya wananchi.

ii. Walimuomba Mbunge kushirikiana na wananchi awaongoze ili kuivunja kamati ya maji ya mradi wa maji Goba na kupata kamati nyingine.


iii. Kusiwe na itikadi za kisiasa katika maendeleo ya watu.

iv. Wajumbe wa kamati ya maji wasichaguliwe kwa mfumo diwani amependekeza kwa kuwa tayari wananchi hawana imani, jambo hilo limetamkwa baada ya mbunge kuitisha mkutano na wananchi kabla ya hapo hakukuwa na dhamira hiyo.


v. Mradi wa maji usiwe ni mali ya watu wachache kwa kuwa ulikuwa ni msaada kutoka shirika la Japan la JICA kwa hiyo inabidi watu wote bila kujali itikadi wanufaike nao.

vi. Kamati ya uchunguzi iundwe ili kubaini ukweli wa tuhuma za kamati ya maji iliyopo ili hatua za kisheria zichukue mkondo wake. Aidha chombo chochote kitakachoundwa kutekeleza mradi kiwe na chombo kingine juu yake kama bodi kwa ajili ya usimamizi.


Hotuba ya Mbunge
Mbunge aliwashukuru wananchi kwa umoja wao kwa kumchagua kuwa mwakilishi wao katika Bunge na pia aliwashukuru kwa kuitikia mwito na kuhudhuria katika mkutano huo muhimu.

Pili alimshukuru Diwani pamoja na viongozi wa kiserikali kushiriki katika mkutano huo na akawaahidi ushirikiano wake wa karibu kwao katika mambo mbalimbali ya kiutumishi.
Alianza kwa kugusia mambo mbalimbali kama ifuatavyo;

Barabara; alisema kuwa amejenga hoja katika kikao cha bodi ya barabara ili barabara ya Mbezi Luis kupitia Goba itajengwa kwa kiwango cha lami ili kuendana na mradi wa mabasi yaendayo kasi ili kuinusuru barabara ya Morogoro na foleni. Alisema kwamba upembuzi yakinifu wa barabara hiyo umekwishanyika isipokuwa tathmini ya fidia bado haijafanywa. Aliomba uongozi wa kiserikali kutoa ushirikiano kwa maafisa watakaofika maeneo yao kutathmini mali za wananchi zitakaoathiriwa na ujenzi wa barabara hiyo. Kuhusu barabara zinazounganisha mitaa Mbunge alimshauri Diwani kuliongelea hilo kwenye vikao vya WDC ili baadae iende Manispaa na akaahidi kuchangia pale atakaombwa kufanya hivyo.

Kituo cha Polisi; alisema kuwa RPC wa Mkoa wa kipolisi Kinondoni alikubali kuhusu ujenzi wa kituo cha polisi akaagiza litafutwe eneo. Na kwa kuwa Diwani amesema eneo limepatikana aliahidi kuwa baada ya kupata specifications atajitahidi kulifuatilia ili kazi ujenzi ianze haraka.

Umeme; kuhusu mtaa wa Matosa ambao bado hakuna umeme alisema kuwa amewasiliana na Waziri wa Nishati na madini na alimuahidi kuwa kwenye mwaka wa wa fedha ujao fedha zitatengwa kwa ajili ya kusambaza umeme katika mtaa huo.

Maji; alijikita sana kwenye swala la maji kwa kuwa alipokea malalamiko mengi sana kutoka kwa wananchi na mengi yaligusa mradi wa maji Goba yaani GOBA WATER USERS ASSOCIATION. Na kwa maana hiyo alishauri kuwa mjadala unahitajika ili kufikia maazimio kuhusu mapungufu ya mradi huo kama ulivyoibuliwa na katika risala ya wananchi pamoja na wananchi wengine waliotoa maoni katika mkutano huo. Kwa miradi mingine alishauri wananchi kuishughulikia kwa karibu ili kuelewa mienendo yake kwa manufaa ya watu wote.

Kuhusu kuvunja kamati ya maji; alisema yafuatayo;
Kuwa kimamlaka yeye hana uwezo wa kuvunja kamati, uwezo huo upo kwa wananchi wenyewe wakiamua kufanya hivyo.

Alitoa angalizo kuwa binafsi hapendi kufanya mambo kwa haraka na akashauri kuwa swala hilo lisiwe kwa haraka ili kuwe na ufanisi wa kupata kamati mpya.

Pia alishauri kuwa mapendekezo ya ripoti ya ukaguzi ya mradi wa maji ya 2007 (ambayo aliigawa siku hiyo kwa wananchi) yazingatiwe.

Uamuzi wa kuvunja kamati iliyokuwepo tarehe 06/03/2011 ulipingwa na wananchi katika mkutano huo, na mbunge alifafanua kuwa kimsingi uhalali wa kamati ya mwanzo ulishapotea toka awali (ab initio) kwa kuwa ilipewa muda maalumu ambao ulishapita toka mwaka 2007

Pia aliasa kuwa swala la maji katika Kata hiyo lisipotafutiwa ufumbuzi linaweza kuhatarisha amani na utulivu katika maeneo hayo. Hivyo inatakiwa ufumbuzi wa haraka kuhusu utatuzi wa swala hilo na la kudumu.

Alishauri pia iundwe kamati ndogo ya wajumbe wanne na kila mtaa utoe mjumbe mmoja. Na baada ya hapo kamati hiyo ndogo itashirikiana na Afisa Mtendaji ili kuandaa mkutano wa tarehe sita ili kupata wajumbe wengine wane na pia kujadili ripoti ya kamati iliyokuwepo. Mbunge ameahidi kuhudhuria katika mkutano huo.



Maazimio
Baada ya hotuba ya mbunge mkutano huo kwa pamoja ulifikia maazimio kama ifuatavyo;

i. Kuwa kamati ya maji iliyopo ivunjwe na wananchi wenyewe.

ii. Wajumbe wanne wachaguliwe ili kuandaa mkutano wa tarehe 06/03/2011 kushirikiana na Afisa Mtendaji wa Kata ya Goba ili kupata kamati kamili.


iii. Kuwa iundwe timu ya uchunguzi ili kuchunguza tuhuma za kamati iliyokuwepo ili kubaini ukweli wa mambo na hatimaye hatua za kisheria zichukuliwe.

iv. Kamati iliyomaliza muda wake ilete ripoti yake iletwe kwenye mkutano wa tarehe 06/03/2011 na ijadiliwe siku hiyo na wananchi.


v. Wajumbe waliochaguliwa ni wafuatao;

a. Monica Modestus Kimario- Mtaa wa Goba

b. Leonard Haule- Mtaa wa Matosa


c. Dickson Luyela- Mtaa wa Kinzudi

d. Nickson Mbando-Mtaa wa Kulangwa

Hadibu za rejea

Kamati ndogo iliyoundwa ilitakiwa kufanya yafuatayo;

i. Kamati ishirikiane na Afisa mtendaji wa Kata ili kuandaa mkutano wa tarehe 06/03/2011.

ii. Kamati hii iandae ripoti yake na itajadiliwa katika mkutano ujao.

iii. Mkutano huo wa tarehe 06/03/2011 uwe na ajenda ya kupokea taarifa kutoka kamati iliyomaliza muda wake.




Mwisho
Mbunge wa Jimbo la Ubungo aliwakaribisha Afisa Mtendaji, Diwani, na Diwani wa viti maalumu kuongea maneno machache kwa ajili ya kufunga mkutano.
Mwisho kabisa Mbunge aliwashukuru wananchi kwa kuhudhuria katika mkutano huo na aliwaomba tena kujitokeza kwa wingi katika mkutano wa tarehe 06/02/2011 ili kupata kamati kamili ya maji.